Hechos 24:1-27
24 Oobʼ kutan chirix aʼin, laj Ananías li xyuwaʼil aj tij kikubʼeek rochbʼeen wiibʼ oxibʼ li cheekel winq ut jun laj nawol chaqʼrabʼ aj Tértulo xkʼabʼaʼ, ut ebʼ aʼan xeʼwulak chi xqʼabʼankil laj Pablo chiru li ruuchil awabʼej.
2 Naq kibʼoqeʼk laj Tértulo, kiʼok chi aatinak chi joʼkaʼin re xqʼabʼankil laj Pablo:
«Naqanaw naq saʼ aakʼabʼaʼ wanko saʼ tuqtuukilal ut xbʼaan naq nakaakʼubʼ chi rubʼelaj li us choʼq re li qatenamit, li qatenamit yook chi usaak.
3 Naqakʼe reetal aʼin yalaq joqʼe ut yalaq bʼar ut naqabʼanyoxi chaawu, at Félix li xnimal ruuchil awabʼej.
4 Abʼan re naq inkʼaʼ tqisi laahoonal, nintzʼaama chaawu naq tooʼaawabʼi junpaataq joʼ kʼaynaqat xbʼaanunkil rikʼin xnimal laawusilal.
5 Xqanaw naq li winq aʼin nawulak chiru poqoqink ibʼ.* Naxbʼaanu naq chixjunilebʼ laj judiiy li wankebʼ saʼ xbʼeen li ruuchichʼochʼ teʼxqʼet ribʼ chiru li awabʼejilal ut aʼan xjolomil li nekeʼtaqenk re xkʼutumebʼ laj nazareen.
6 Kixyal ajwiʼ xmuxbʼal li rochoch li Yos joʼkan naq xqachap.
7 *
8 Naq tat-oq xbʼaanunkil re ebʼ li patzʼom aran taakʼe reetal naq yaal chixjunil li naqaye chirix».
9 Chirix chik aʼan, ebʼ laj judiiy xeʼokenk ajwiʼ chi xyeebʼal naq yaal chixjunil aʼin.
10 Li ruuchil awabʼej kirekʼasi li xjolom chiru laj Pablo re naq t-aatinaq. Tojaʼ naq laj Pablo kixye:
«Laaʼin ninnaw naq ak naabʼal chihabʼ aawokik choʼq aj raqol aatin saʼ li tenamit aʼin, joʼkan naq chi anchal inchʼool tinchʼolobʼ aawe li kikʼulmank.
11 Joʼ nakaakʼe reetal, kabʼlaju kutan anaqwan xintaqeʼk Jerusalén chi xloqʼoninkil li Yos.
12 Inkʼaʼ xineʼxtaw chi xchoqinkil junaq li qas qiitzʼin saʼ rochoch li Yos chi moko chi xpoqoqinkilebʼ* li qas qiitzʼin saʼebʼ li naʼaj re loqʼonink malaj saʼ li tenamit.
13 Chi moko teʼruuq xkʼutbʼesinkil chaawu naq yaal li yookebʼ wiʼ inqʼabʼankil anaqwan.
14 Abʼan ninye aawe naq yookin xloqʼoninkil li Xyos ebʼ linxeʼtoon rikʼin xyuʼaminkil li nekeʼxye naq jachbʼil paabʼal xbʼaan naq ninpaabʼ chixjunil li wank saʼ Xchaqʼrabʼ laj Moisés ut li xeʼxtzʼiibʼa chaq ebʼ li Propeet.
15 Ut chʼolchʼo chiwu joʼ naq chʼolchʼo chiruhebʼ li winq aʼin naq li Yos tixwaklesi chi yoʼyo ebʼ li kamenaq li tiikebʼ xchʼool joʼ ajwiʼ li inkʼaʼ tiikebʼ xchʼool.
16 Joʼkan naq junelik ninkʼe inqʼe re naq linchʼool* inkʼaʼ tinxqʼabʼa chiru li Yos ut chiruhebʼ li winq.
17 Naq ak xnumeʼk naabʼal chihabʼ, xinchalk chi xkanabʼankil li kubʼsiil arin Jerusalén re xtenqʼankil lintenamit ut xinchalk chi mayejak.
18 Naq yookin chaq xbʼaanunkil aʼin ak chʼajobʼresinbʼilin naq xineʼxtaw saʼ rochoch li Yos. Moko kʼihebʼ ta wankebʼ wikʼin ut maaʼani yookin xkʼebʼal saʼ chʼaʼajkilal. Abʼan aran wankebʼ wiibʼ oxibʼ aj judiiy li chalenaqebʼ saʼ xweent Asia
19 li wankebʼ raj chaawu re inqʼabʼankil wi wank inmaak chiruhebʼ.
20 Malaj, wi inkʼaʼ, xyeehaqebʼ li winq li wankebʼ chaawu kʼaru xinmaakoni naq xinwank chiruhebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy.
21 Li teʼruuq wiʼ inqʼabʼankil aʼan naq xinjap we naq xinye: “Anaqwan yook chi raqmank aatin saʼ inbʼeen cheeru saʼ xkʼabʼaʼ naq ninpaabʼ naq ebʼ li kamenaq teʼwakliiq chi yoʼyo!”».
22 Abʼanan, laj Félix li naxnaw chaq chiʼus chirix li Xbʼe li Yos, toj kixkanabʼ li chʼaʼajkilal ut kixye re chixjunilebʼ: «Toj naq tkubʼeeq chaq laj Lisias li najolomink rehebʼ laj puubʼ, aran tinye chanru tkanaaq li xchʼaʼajkilal».
23 Ut kixye re li winq li nataqlank rehebʼ laj puubʼ* naq tixkʼaakʼale laj Pablo, abʼan tixkanabʼ naq tixbʼaanu wiibʼ oxibʼ li naʼlebʼ li naʼajmank chiru ut tixkanabʼ ajwiʼ naq ebʼ li ramiiw teʼwulaq chi xtenqʼankil.
24 Wiibʼ oxibʼ kutan chirix aʼin, kiwulak laj Félix rochbʼeen li xDrusila, li rixaqil. Li xDrusila aj judiiy. Laj Félix kixtaqla xkʼambʼal chaq laj Pablo ut kirabʼi chi aatinak chirix li naxpaabʼ chirix li Kristo Jesús.
25 Abʼan, naq laj Pablo kiʼok chi aatinak chirix li tiikilal, li kuyuk ibʼ ut naq li Yos traqoq aatin saʼ xbʼeenebʼ li qas qiitzʼin, laj Félix kiʼok xxiw ut kixye re: «Anaqwan aayu. Ut tatinbʼoq naq wanq inhoonal».
26 Laj Félix kiroybʼeni naq ttuminaaq xbʼaan laj Pablo. Joʼkan naq kokʼaj xsaʼ naxtaqla xbʼoqbʼal ut naʼaatinak rikʼin.
27 Wiibʼ chihabʼ chirix aʼin, laj Porcio Festo kikanaak choʼq reqaj laj Félix. Abʼan saʼ xkʼabʼaʼ naq laj Félix kiraj naq sa t-ileʼq xbʼaanebʼ laj judiiy, kixkanabʼ laj Pablo saʼ tzʼalam.
Xtzʼaqobʼ ebʼ li naʼlebʼ
^ Malaj «mululink ibʼ».
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Malaj «xmululinkilebʼ».
^ Taawil xchʼolobʼankil li aatin, chʼool.
^ Malaj «saʼ li Sanedrín».
^ Li winq aʼin xaqabʼanbʼil re xtaqlankil jun siʼeent aj puubʼ.
