Hechos 27:1-44
27 Joʼkan bʼiʼ, saʼ xkʼabʼaʼ naq xkʼubʼamank naq saʼ li nimla jukubʼ tooxik Italia, laj Pablo ut wiibʼ oxibʼ laj preex xeʼqʼaxtesiik saʼ ruqʼ laj Julio. Li winq aʼin aʼan jun rehebʼ li nataqlank rehebʼ laj puubʼ* li wank saʼ xchʼuutal ebʼ laj puubʼ li nekeʼkʼabʼaʼiik Augusto.*
2 Xootaqeʼk saʼ jun li nimla jukubʼ re Adramitio li ok re chi xik saʼebʼ li naʼaj chire li palaw li wank saʼ xweent Asia ut xqachap qabʼe. Yook qochbʼeeninkil jun li winq aj Macedonia re Tesalónica, aj Aristarco xkʼabʼaʼ.
3 Saʼ li jun chik kutan xookubʼeek saʼ li nimla jukubʼ aran Sidón, laj Julio chaabʼil rikʼin laj Pablo ut kixkanabʼ naq txik rulaʼaninkilebʼ li ramiiw ut naq ebʼ li ramiiw teʼtenqʼanq re.
4 Xooʼelk aran ut xookoho saʼ jun li nimla jukubʼ chixkʼatq Chipre bʼarwiʼ xqakol qibʼ chiru li kawil iqʼ li yook chi chalk chiqu.
5 Chirix chik aʼan, xookoho saʼ jun li nimla jukubʼ chire Cilicia ut Panfilia ut xooxaqliik aran Mira re Licia.
6 Saʼ li naʼaj aʼin, li winq li nataqlank rehebʼ laj puubʼ* kixtaw jun li nimla jukubʼ re Alejandría li yook chi xik Italia ut kixye qe naq tootaqeʼq chisaʼ.
7 Naq ak naabʼal kutan qaxikik saʼ li nimla jukubʼ, raachisa xoowulak Cnido xbʼaan naq timil yooko chi xik. Saʼ xkʼabʼaʼ naq li kawil iqʼ inkʼaʼ nokooxkanabʼ jilok, xookoho saʼ li nimla jukubʼ chixkʼatq li naʼaj Creta ut xoonumeʼk chiru Salmone bʼarwiʼ xqakol qibʼ chiru li iqʼ.
8 Raachisa yook chi xik li jukubʼ chire li palaw xbʼaan li kawil iqʼ, usta joʼkan, xoowulak saʼ jun li naʼaj li nakʼabʼaʼiik Bellos Puertos* li wank chixkʼatq li tenamit Lasea.
9 Ak xnumeʼk naabʼal kutan, xiwxiw xik saʼ jukubʼ, ut ak xnumeʼk Xkutankil li Chʼajobʼresink Maak.* Joʼkan naq li apóstol Pablo kixye rehebʼ:
10 «Ex was wiitzʼin, laaʼin ninkʼoxla naq inkʼaʼ us naq tooxik. Wi tqabʼaanu, li nimla jukubʼ txik rubʼel haʼ, t-osoʼq li iiq ut naru nokookamk».
11 Abʼanan, li nataqlank rehebʼ laj puubʼ* kixpaabʼ re laj chʼeʼol jukubʼ ut laj echal re li jukubʼ abʼan inkʼaʼ kixpaabʼ li kixye laj Pablo.
12 Saʼ xkʼabʼaʼ naq li naʼaj bʼarwiʼ nekeʼhilank ebʼ li jukubʼ moko us ta re xnumsinkil li habʼalqʼe, li xkʼihalil xeʼxye naq teʼelq aran, maare anchal teʼruuq chi wulak Fenice ut aran teʼxnumsi li habʼalqʼe. Aran Creta wank saʼ li naʼaj bʼarwiʼ nekeʼhilank li jukubʼ chiru li naʼaj bʼarwiʼ naʼelk li saqʼe.
13 Naq li iqʼ kiʼapunk chaq chi timil bʼarwiʼ naʼok li iqʼ xeʼxkʼoxla naq teʼwulaq Fenice. Joʼkan naq xeʼxwaklesi ebʼ li ankla li wank rubʼel haʼ ut xkohebʼ chire li palaw re li naʼaj Creta.
14 Abʼanan moko najt ta xnumik aʼin, naq kichalk jun li kawil iqʼ, euroaquilón xkʼabʼaʼ.
15 Saʼ xkʼabʼaʼ naq kaw li iqʼ li xchalk chiru li nimla jukubʼ inkʼaʼ chik xooruuk chi jilok ut xqakanabʼ naq tooxkʼam li iqʼ.
16 Chirix chik aʼan, xookoho saʼ li nimla jukubʼ chixkʼatq jun li chʼina naʼaj li sutsu chi haʼ, Cauda xkʼabʼaʼ. Usta joʼkan, kichʼaʼajkoʼk chiqu xxokbʼal li chʼina jukubʼ* li wank chirix li nimla jukubʼ.
17 Naq xeʼxtaqsi li chʼina jukubʼ, xeʼxbʼakʼ chiʼus chi rubʼel li nimla jukubʼ. Yookebʼ xxiw xbʼaan naq xeʼxkʼoxla naq teʼtʼilq saʼ li samahibʼ re Sirte, ut xeʼxbʼakʼ wiibʼ oxibʼ li kʼaam re xmochbʼal xtʼikrul li nimla jukubʼ ut xeʼxkanabʼ naq teʼkʼameʼq xbʼaan li iqʼ.
18 Wulajaq chik, xeʼok xjebʼal riiq li nimla jukubʼ xbʼaan naq li kawil iqʼ yook qachiqʼchiqʼinkil.
19 Saʼ li rox kutan, rikʼinebʼ ruqʼ xeʼxkut saʼ palaw wiibʼ oxibʼ li kʼanjelobʼaal.
20 Chiru naabʼal kutan inkʼaʼ xqil li saqʼe chi moko ebʼ li chahim ut li kawil iqʼ inkʼaʼ naxkanabʼ qekʼasinkil, joʼkan naq xqakʼoxla naq inkʼaʼ tookoleʼq.
21 Li wankebʼ saʼ li nimla jukubʼ inkʼaʼ xeʼwaʼak chiru naabʼal kutan. Tojaʼ naq laj Pablo kixaqli saʼ xyiihebʼ ut kixye: «Ex winq, wi xeerabʼi raj li xinye ut xookanaak raj Creta, inkʼaʼ raj xqakʼul li rahilal aʼin chi moko xqakut raj li iiq saʼ haʼ.
22 Abʼan anaqwan nintzʼaama cheeru naq kawaq eechʼool xbʼaan naq maaʼani eere tkamq, kaʼajwiʼ li nimla jukubʼ t-osoʼq.
23 Chiru li qʼoqyink aʼin, li Yos aʼ laj echal we ut li ninkʼanjelak chiru kixtaqla chaq li xʼánjel.
24 Li ánjel aʼin kixye we: “Matxuwak Pablo! Tatwulaq rikʼin li awabʼej re Roma;* joʼkan ajwiʼ, li Yos tixkol laayuʼam ut tixkol ajwiʼ xyuʼamebʼ li wankebʼ aawochbʼeen saʼ li jukubʼ”.
25 Joʼkan naq, kawaq eechʼool ex winq, ninpaabʼ re li Yos ut ninnaw naq tkʼulmanq chi tzʼaqal re ru li kixye we.
26 Abʼanan, xbʼaan li kawil iqʼ, li jukubʼ ttʼilq chixkʼatq jun li naʼaj li sutsu chi haʼ».
27 Ak kaalaju qʼoqyink ut kutan qokik saʼ li palaw re Adria ut li kawil iqʼ yook qekʼasinkil. Ut naq tuqtu qʼoqyink, ebʼ li winq li nekeʼkʼanjelak saʼ li nimla jukubʼ xeʼxkʼoxla naq yooko chi wulak chi chʼochʼel.
28 Joʼkan naq xeʼxbʼis xchamal li haʼ, ut xeʼxkʼe reetal naq 36 meetr tana xchamal. Xeʼjilok bʼayaq chik ut xeʼxbʼis wiʼ chik xchamal li haʼ ut aran xeʼxkʼe reetal naq numenaq 27 meetr xchamal.
29 Yookebʼ xxiw xbʼaan naq xeʼxkʼoxla naq li nimla jukubʼ tixpikʼa ribʼ chiruhebʼ li pek ut ttʼilq. Joʼkan naq, xeʼxkut chirix li jukubʼ kaahibʼ li ankla ut nekeʼraj naq ak xsaqewk.
30 Abʼan li nekeʼkʼanjelak saʼ li nimla jukubʼ xeʼxyal elelik, xeʼxkubʼsi li chʼina jukubʼ saʼ palaw ut xeʼxbʼaanu ribʼ naq xkohebʼ xkutbʼal ebʼ li ankla chiru li nimla jukubʼ.
31 Tojaʼ naq laj Pablo kixye re li nataqlank rehebʼ laj puubʼ* ut ebʼ laj puubʼ: «Wi ebʼ li winq aʼin teʼxkanabʼ li nimla jukubʼ, laaʼex inkʼaʼ texkoleʼq».
32 Joʼkan naq ebʼ laj puubʼ keʼxyokʼ xkʼaamal li chʼina jukubʼ ut xeʼxkanabʼ chi tʼaneʼk saʼ haʼ.
33 Joʼkan bʼiʼ, naq kachʼin chik ma nasaqewk, laj Pablo kiʼok xyeebʼal rehebʼ chixjunil naq teʼwaʼaq bʼayaq. Kixye rehebʼ: «Ak kaalaju kutan eerokik chi roybʼeninkil kʼaru tkʼulmanq chi kʼajoʼ eekʼaʼuxl, ut maajun tzʼuqul li wa saʼ eesaʼ.
34 Joʼkan naq ninye eere naq texwaʼaq bʼayaq. Ninye eere aʼin re naq us wanqex xbʼaan naq maaʼani eere ttʼaneʼq junjisilaq rismal xjolom».
35 Naq ak kixye aʼin, kixchap jun li kaxlanwa, kibʼanyoxink chiru li Yos chiruhebʼ chixjunil, kixjach ut xʼok chi waʼak.
36 Tojaʼ naq chixjunilebʼ xeʼok chi waʼak.
37 Chiqajunilo li wanko saʼ li jukubʼ 276 chi qas qiitzʼin.
38 Naq ak xoowaʼak ut xkʼojlaak qachʼool, xeʼxkut li triiw saʼ palaw re xjeʼbʼal riiq li nimla jukubʼ.
39 Naq kisaqewk, xeʼril jun li naʼaj li inkʼaʼ chik nekeʼxnaw ru. Li naʼaj aʼin wank chire li haʼ ut numtajenaq chi samahibʼ. Ut xeʼxkʼoxla xkʼambʼal aran li jukubʼ wi teʼruuq xbʼaanunkil.
40 Joʼkan naq xeʼxyokʼ xkʼaamal ebʼ li ankla ut xeʼxkut saʼ palaw. Joʼkan ajwiʼ, xeʼxkʼos xkʼaamal ebʼ li cheʼ* li nekeʼxbʼeresi wiʼ li jukubʼ ut naq ak xeʼxhel li tʼikr li wank chiru li jukubʼ, xkohebʼ chire li haʼ.
41 Naq kixpikʼa ribʼ chiru jun tuubʼ li samahibʼ li wank rubʼel haʼ, li nimla jukubʼ kitʼilk. Li ruʼuj kixlap ribʼ saʼ samahibʼ ut inkʼaʼ chik kiʼekʼank, abʼan li rit li nimla jukubʼ kiʼok chi jukʼeʼk xbʼaan xkawil roq li palaw.
42 Tojaʼ naq ebʼ laj puubʼ xeʼxkʼoxla xkamsinkil ebʼ laj preex re naq inkʼaʼ teʼeleliq naq yooqebʼ chi numxik.
43 Abʼan li nataqlank rehebʼ laj puubʼ* kiraj xkolbʼal laj Pablo, joʼkan naq kixram chiruhebʼ xbʼaanunkil li yookebʼ xkʼoxlankil. Kixtaqla xyeebʼal rehebʼ li nekeʼxnaw numxik naq teʼxkut ribʼ saʼ palaw re naq teʼwulaq xbʼeenwa saʼ chaqi ru,
44 ut ebʼ li junchʼol teʼxik saʼ xbʼeen tzʼalamcheʼ malaj xperaasil li jukubʼ. Ut chiqajunilo xoowulak chi chʼochʼel chi maakʼaʼ xqakʼul.
Xtzʼaqobʼ ebʼ li naʼlebʼ
^ Li winq aʼin xaqabʼanbʼil re xtaqlankil jun siʼeent aj puubʼ.
^ Aʼin maawaʼ xkʼabʼaʼ jun li qas qiitzʼin, ruuchil bʼan xkʼabʼaʼ wiibʼ oxibʼ li awabʼej re Roma.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Aʼin jun li naʼaj bʼarwiʼ nekeʼhilank ebʼ li nimla jukubʼ.
^ Malaj «Xkutankil li Wank saʼ Usilal». Taawil xchʼolobʼankil li aatin, Xkutankil li Chʼajobʼresink Maak.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Li chʼina jukubʼ aʼin nakʼanjelak re risinkilebʼ li qas qiitzʼin saʼ li nimla jukubʼ naq nawakliik chaq li kawil iqʼ saʼ palaw.
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Malaj «ebʼ li kanaleet».
^ Li winq aʼin xaqabʼanbʼil re xtaqlankil jun siʼeent aj puubʼ.
