Hechos 6:1-15
6 Chiruhebʼ li kutan naq yookebʼ chaq chi kʼihank li nekeʼtaqenk re li Jesús, ebʼ laj judiiy li nekeʼaatinak saʼ griego xeʼchʼaʼajkoʼk saʼ xbʼeenebʼ laj judiiy li nekeʼaatinak saʼ hebreo xbʼaan naq inkʼaʼ yookebʼ xkʼebʼal saʼ ajl ebʼ li malkaʼan naq nekeʼxjekʼi li tzekemq wulaj wulaj.
2 Tojaʼ naq ebʼ li Kabʼlaju xeʼxchʼutubʼ chixjunil ebʼ laj paabʼanel ut xeʼxye: «Moko us ta naq tqakanabʼ li raatin li Yos yal re xjekʼinkil li tzekemq.
3 Joʼkan naq, ex qechpaabʼanel sikʼomaq saʼ eeyanq wuqubʼ chi winq li chaabʼil nayeemank chirixebʼ li nujenaqebʼ chi santil musiqʼej* ut nujenaqebʼ chi naʼlebʼ re naq tqaxaqabʼebʼ chi xbʼaanunkil li kʼanjel aʼin li naʼajmank.
4 Abʼan laaʼo tqakʼe qachʼool chi tijok ut xbʼaanunkil li xkʼanjel li Yos li naxchap ribʼ rikʼin xkʼutbʼal li raatin».
5 Ut ebʼ li nekeʼtaqenk re li Jesús xeʼxkʼul xchʼool li xeʼyeeheʼk rehebʼ. Joʼkan naq xeʼxsikʼ ru laj Esteban. Li winq aʼin kaw xpaabʼal ut nujenaq chi santil musiqʼej, joʼ ajwiʼ laj Felipe, laj Prócoro, laj Nicanor, laj Timón, laj Parmenas ut laj Nicolás aj Antioquía li kiʼok chi paabʼank saʼ xyanqebʼ laj judiiy.
6 Chirix chik aʼan xeʼkʼameʼk rikʼinebʼ li apóstol, ut naq ak xeʼraqeʼk chi tijok, ebʼ li apóstol xeʼxkʼe li ruqʼ saʼ xbʼeenebʼ li sikʼbʼilebʼ ru.
7 Saʼ xkʼabʼaʼ aʼin, li raatin li Yos inkʼaʼ kixkanabʼ wulak yalaq bʼar, ut ebʼ li nekeʼtaqenk re li Jesús aran Jerusalén inkʼaʼ xeʼxkanabʼ kʼihank. Ut naabʼalebʼ laj tij xeʼok chi paabʼank.
8 Joʼkan bʼiʼ, laj Esteban naxbʼaanu chaq ebʼ li sachbʼachʼoolej li kʼajoʼ xninqal ut ebʼ li xninqal ru naʼlebʼ saʼ xyanqebʼ li qas qiitzʼin saʼ xkʼabʼaʼ naq numtajenaq rikʼin li rusilal ut li xwankil li Yos.
9 Abʼan wiibʼ oxibʼ li winq re li chʼuut li nakʼabʼaʼiik ebʼ laj Liberto, joʼ ajwiʼ ebʼ aj Cirene ut ebʼ aj Alejandría ut wiibʼ oxibʼ re Cilisia ut Asia xkohebʼ xchoqinkil laj Esteban.
10 Abʼanan inkʼaʼ xeeruuk xchoqinkil xbʼaan naq laj Esteban yook chi aatinak rikʼin nimal ru kʼaʼuxl ut rikʼin li xtenqʼ li santil musiqʼej.
11 Tojaʼ naq saʼ muqmu xeʼxqʼunbʼesi wiibʼ oxibʼ li winq re naq teʼxye: «Xqabʼi naq kixye li inkʼaʼ us chirix laj Moisés ut chirix li Yos».
12 Ut xeʼxbʼaanu naq ebʼ li tenamit, ebʼ li cheekel winq ut ebʼ laj tzʼiibʼ teʼxpoqoqi ribʼ.* Tojaʼ naq xeʼwulak bʼarwiʼ wank aʼan, xeʼxchap chi kaw ut xeʼxkʼam saʼ li Nimla Raqlebʼaal Aatin* rehebʼ laj judiiy.
13 Aran xeʼxkʼam wiibʼ oxibʼ li winq li xeʼtikʼtiʼik chirix ut xeʼxye: «Li winq aʼin inkʼaʼ naxkanabʼ xyeebʼal li inkʼaʼ us chirix li santil naʼaj ut chirix li Chaqʼrabʼ.
14 Jun eetalil, xqabʼi xyeebʼal naq li Jesús, aj Nazaret, tixjukʼ li naʼajej aʼin ut tixjal li Chaqʼrabʼ li chalenaq rikʼin laj Moisés».
15 Ut chixjunilebʼ li chunchukebʼ saʼ li Nimla Raqlebʼaal Aatin* rehebʼ laj judiiy xeʼxkaʼya laj Esteban ut xeʼril naq li xnaqʼru chanchan xnaqʼru jun li ánjel.
Xtzʼaqobʼ ebʼ li naʼlebʼ
^ Li aatin saʼ griego, pnéuma. Taawil xchʼolobʼankil li aatin musiqʼ.
^ Malaj «teʼxmululi ribʼ».
^ Malaj «saʼ li Sanedrín».
^ Malaj «saʼ li Sanedrín».
