Juan 15:1-27
15 »Laaʼin tzʼaqal xtoonal li uubʼ ut Linyuwaʼ aʼan li nakʼehok re chi kʼiik.
2 Aʼan naxyokʼ chixjunil li ruqʼ li inkʼaʼ naʼuuchink wikʼin, ut chixjunil li naʼuuchink naxsaabʼesi re naq numtajenaq wiʼ chik li ru tixkʼe.
3 Laaʼex saq chik eeru saʼ xkʼabʼaʼ li aatin li xinye eere.
4 Chexwanq saʼ junajil wikʼin ut laaʼin tinwanq saʼ junajil eerikʼin. Joʼ naq li ruqʼ li cheʼ inkʼaʼ naʼuuchink wi inkʼaʼ chapcho rikʼin xtoonal li uubʼ, laaʼex ajwiʼ inkʼaʼ naru nekexʼuuchink wi inkʼaʼ wankex saʼ junajil wikʼin.
5 Laaʼin xtoonal li uubʼ ut laaʼex ebʼ li ruqʼ. Li nawank saʼ junajil wikʼin ut laaʼin wankin saʼ junajil rikʼin aʼan li naʼuuchink chiʼus. Xbʼaan naq wi nekeerisi eeribʼ wikʼin maakʼaʼ texruuq xbʼaanunkil.
6 Wi junaq inkʼaʼ nawank saʼ junajil wikʼin, natzʼeqmank joʼ li ruqʼ cheʼ ut nachaqik. Ebʼ li ruqʼ li cheʼ aʼin naxokmank, nakʼemank saʼ xaml ut nakʼatmank.
7 Wi nekexwank saʼ junajil wikʼin ut junelik nekeepaabʼ li waatin, patzʼomaq li nekeeraj ut teekʼul.
8 Aʼin naxkʼe xloqʼal Linyuwaʼ: naq junelik texʼuuchinq ut teekʼutbʼesi naq laaʼex intzolom.
9 Joʼ naq xinxra chaq li Yuwaʼbʼej, laaʼin xexinra; chexwanq junelik saʼ linrahom.
10 Wi nekeepaabʼ lintaqlahom, texwanq junelik saʼ linrahom, joʼ chanru naq ninpaabʼ li xtaqlahom li Yuwaʼbʼej ut ninwank junelik saʼ li xrahom.
11 »Xinye eere aʼin re naq teerekʼa li sahil chʼoolejil li nawekʼa laaʼin* ut re naq numtajenaq xsahil leechʼool.
12 Aʼin lintaqlahom: naq teera eeribʼ cheeribʼil eeribʼ joʼ naq xexinra laaʼin.
13 Maaʼani qʼaxal narahok joʼ li naxqʼaxtesi li xyuʼam saʼ xkʼabʼaʼebʼ li ramiiw.
14 Laaʼex wamiiw wi nekeebʼaanu li nekexintaqla wiʼ.
15 Moko laaʼex ta chik linmoos xbʼaan naq li moos inkʼaʼ naxnaw li naxbʼaanu laj echal re. Ninye eere naq laaʼex wamiiw xbʼaan xinseeraqʼi eere li xwabʼi chi xyeebʼal Linyuwaʼ.
16 Moko laaʼex ta xexsikʼok wu. Laaʼin bʼan xinsikʼok eeru. Xexinxaqabʼ re naq texxik ut inkʼaʼ teekanabʼ uuchink ut li teeruuchi twanq chi junelik. Chi joʼkan li Yuwaʼbʼej tixkʼe eere yalaq kʼaru li teepatzʼ saʼ inkʼabʼaʼ.
17 »Ninye eere aʼin re naq teera eeribʼ cheeribʼil eeribʼ.
18 Wi xikʼ nekexril li ruuchichʼochʼ, ak nekeenaw naq xbʼeenwa xikʼ xinril cheeru laaʼex.
19 Wi rehex raj li ruuchichʼochʼ, li ruuchichʼochʼ teʼxra raj xbʼaan naq rehex. Abʼan saʼ xkʼabʼaʼ naq moko rehex ta li ruuchichʼochʼ, laaʼin bʼan xinsikʼok eeru saʼ xyanq li ruuchichʼochʼ joʼkan naq xikʼ nekexril li ruuchichʼochʼ.
20 Misach saʼ leechʼool li xinye eere: moko qʼaxal nim ta li moos chiru laj echal re. Wi xikʼ xineʼril laaʼin, xikʼ texʼileʼq ajwiʼ laaʼex. Wi aʼanebʼ xeʼxpaabʼ li waatin, teʼxpaabʼ ajwiʼ leeraatin.
21 Xbʼaan linkʼabʼaʼ teʼxbʼaanu eere chixjunil aʼin xbʼaan naq inkʼaʼ nekeʼxnaw ru li kitaqlank chaq we.
22 Wi inkʼaʼ raj xinkʼulunk ut wi inkʼaʼ raj xwaatinahebʼ, moko wank ta raj maak saʼ xbʼeenebʼ. Abʼan anaqwan inkʼaʼ naru nekeʼxye naq inkʼaʼ xeʼmaakobʼk.
23 Li xikʼ nikinril, xikʼ ajwiʼ naril Linyuwaʼ.
24 Wi inkʼaʼ raj xinbʼaanu chiruhebʼ wiibʼ oxibʼ li naʼlebʼ li maaʼani chik kixbʼaanu, maakʼaʼ raj maak saʼ xbʼeenebʼ. Abʼan anaqwan xineʼril ut xikʼ nikineʼril ut xikʼ ajwiʼ nekeʼril Linyuwaʼ.
25 Abʼan kikʼulmank aʼin re naq ttzʼaqloq ru li aatin li tzʼiibʼanbʼil saʼebʼ li Xchaqʼrabʼ: “Xikʼ xineʼril chi maakʼaʼ xyaalal”.
26 Naq twulaq li santil musiqʼej li ttenqʼanq eere aʼan tixkʼe cheenaw anihin, aʼan li santil musiqʼej li naxkʼut li yaal ut li nachalk rikʼin Linyuwaʼ.
27 Ut laaʼex ajwiʼ teekʼe chi naweʼk chiwix xbʼaan naq wankex wikʼin chalen saʼ xtiklajik.
Xtzʼaqobʼ ebʼ li naʼlebʼ
^ Malaj «re naq li xsahil linchʼool wanq eerikʼin».
