Lucas 1:1-80
-
Li nayeemank re laj Teófilo (1-4)
-
Laj Gabriel naxye chi rubʼelaj li xyoʼlajik laj Juan, aj Kubʼsihomhaʼ (5-25)
-
Laj Gabriel naxye chi rubʼelaj li xyoʼlajik li Jesús (26-38)
-
Li xMaría narulaʼani li xʼElisabet (39-45)
-
Li xMaría naxnima ru li Jehobʼa (46-56)
-
Nayoʼlaak laj Juan ut nekeʼxkʼe li xkʼabʼaʼ (57-66)
-
Li xpropesiiy laj Zacarías (67-80)
1 Naabʼalebʼ saʼ qayanq xeʼxtzʼiibʼa chi tustu ut chi tzʼaqal re ru li xkʼulmank,
2 joʼ chanru xeʼxkʼe chiqanaw ebʼ li xeʼilok re chalen chaq saʼ xtiklajik ut ebʼ laj kʼanjel li nekeʼxkʼe chi naweʼk li Raatin li Yos.
3 Joʼkan naq laaʼin ajwiʼ xintzʼili rix chixjunil chi tzʼaqal re ru ut xinkʼoxla xtzʼiibʼankil choʼq aawe chi tustu ru joʼ chanru xkʼulmank chalen chaq saʼ xtiklajik, waʼ Teófilo
4 re naq chʼolchʼooq chaawu naq paabʼajel li xeʼxkʼut chaq chaawu.
5 Naq yook chaq chi awabʼejink laj Herodes* aran Judea, wank jun laj tij, Zacarías xkʼabʼaʼ. Laj tij aʼin wank chaq saʼ xyanqebʼ laj tij li nekeʼkʼabʼaʼiik Abías. Ut li rixaqil chalenaq saʼ xjunkabʼal laj Aarón ut Elisabet* xkʼabʼaʼ.
6 Li sumal aʼin tiikebʼ xchʼool chiru li Yos, nekeʼxpaabʼ chi tzʼaqal re ru chixjunil li xtaql li Jehobʼa* ut chixjunil li kixye chaq rehebʼ naq tento teʼxbʼaanu.
7 Maakʼaʼebʼ ralal xkʼajol xbʼaan naq li xʼEIisabet* inkʼaʼ naru nawank xkʼuulaʼal ut saʼ kabʼichal tiixebʼ chik.
8 Laj Zacarías yook chaq chi kʼanjelak choʼq aj tij chiru li Yos xbʼaan naq li chʼuut bʼarwiʼ natzʼaqonk kitzʼaq kʼanjelak aran
9 ut joʼ kʼaynaqebʼ* chaq xbʼaanunkil ebʼ laj tij, kiʼok ajwiʼ saʼ li santil naʼaj re li rochoch li Jehobʼa* re xkʼatbʼal li pom.
10 Ut naq yook chi kʼatmank li pom, li kʼiila tenamit yook chi tijok chirix kabʼl.
11 Tojaʼ naq xaqamil li xʼánjel li Jehobʼa.* Xaqxo chixkʼatq li xnaʼaj li mayej.*
12 Naq laj Zacarías kiril aʼin, kisach xchʼool ut kʼajoʼ kixuwak.
13 Abʼan li ánjel kixye re: «Matxuwak Zacarías xbʼaan naq li Yos kirabʼi laatij. Li xʼElisabet* laawixaqil tixkʼe jun laawalal ut Juan taakʼe choʼq xkʼabʼaʼ.
14 Ut kʼajoʼaq xsahil aachʼool ut naabʼalebʼ sahaqebʼ saʼ xchʼool naq tyoʼlaaq
15 xbʼaan naq chiru li Jehobʼa* aʼanaq jun li winq li qʼaxal nim xwankil. Abʼan maajunwa trukʼ li bʼiin chi moko junaq chik li haʼ li nakaltesink. Toj maajiʼ ajwiʼ nayoʼlaak,* ak kʼebʼilaq re xbʼaan li Yos li santil musiqʼej.
16 Ut aʼan tixtenqʼa naabʼalebʼ laj Israel re naq teʼsutqʼiiq rikʼin li Xyos Jehobʼa.*
17 Joʼkan ajwiʼ, aʼan yooq chiʼubʼej chiru,* ut li xchʼool ut li xmetzʼew chanchanaq li re laj Elías. Tixbʼaanu ajwiʼ naq li xchʼoolebʼ li naʼbʼej yuwaʼbʼej chanchanaq li xchʼoolebʼ li alal kʼajolbʼej, ut tixbʼaanu naq ebʼ li qʼetqʼet teʼxtaw xnaʼlebʼ rikʼin li tiikebʼ xchʼool ut chi joʼkan tixkawresi jun li tenamit choʼq re li Jehobʼa».*
18 Laj Zacarías kixye re li ánjel: «Chanru tinnaw naq yaal aʼin? Xbʼaan naq tiixin chik ut li wixaqil xikenaq xchihabʼ».
19 Ut li ánjel kixye re: «Laaʼin laj Gabriel, li xaqxo chiru li Yos ut xintaqlaak chaq re aatinak aawikʼin re xnumsinkil aawe li chaabʼil esil aʼin.
20 Abʼan, kʼe reetal mem tatkanaaq toj reetal tkʼulmanq chixjunil aʼin xbʼaan naq inkʼaʼ xaapaabʼ li waatin li ttzʼaqloq ru saʼ li hoonal li xaqabʼanbʼil».
21 Naq laj Zacarías wank chaq saʼ rochoch li Yos, ebʼ li qas qiitzʼin yookebʼ roybʼeninkil chirix kabʼl ut xeʼok xkʼaʼuxl xbʼaan naq yook chaq chi bʼayk saʼ li santil naʼaj.
22 Naq kiʼelk chaq inkʼaʼ chik kiruuk raatinankilebʼ, ebʼ li qas qiitzʼin tikto xeʼxtaw ru naq kiril jun li moy u naq wank saʼ li santil naʼaj re li rochoch li Yos. Kaʼaj chik li ruqʼ naxkʼut chiruhebʼ xbʼaan naq inkʼaʼ naru chi aatinak.
23 Joʼkan bʼiʼ, naq kiraqeʼk chi kʼanjelak saʼ rochoch li Yos, kisutqʼiik saʼ rochoch.
24 Wiibʼ oxibʼ kutan chirix aʼan, li xʼElisabet,* li rixaqil, kikanaak saʼ yuʼam ut chiru oobʼ po inkʼaʼ kiʼelk saʼ rochoch. Naxye chaq:
25 «Aʼin kixbʼaanu li Jehobʼa* choʼq we. Kixkʼe xchʼool chiwix re naq inkʼaʼ chik tinwanq saʼ xutaan».
26 Naq ak wank waqibʼ po re, li Yos kixtaqla li ánjel Gabriel saʼ jun li tenamit re Galilea li naxkʼabʼaʼi Nazaret.
27 Aran xkoho rulaʼaninkil jun li ixqaʼal* li maajiʼ nawank rikʼin winq. Li ixqaʼal* aʼin María xkʼabʼaʼ ut ak wank saʼ aatin rikʼin jun li winq aj José xkʼabʼaʼ re naq teʼsumlaaq. Li winq aʼin chalenaq saʼ rochoch laj David.
28 Naq kiʼok li ánjel, kixye re: «Ninkʼe xsahil aachʼool, at ixq, li Jehobʼa* sa xchʼool aawikʼin ut yook aawosobʼtesinkil».
29 Abʼan qʼaxal sachso xchʼool kikanaak li ixqaʼal* rikʼin li kixye li ánjel ut yook xkʼebʼal xqʼe chi xtawbʼal ru aʼin.
30 Joʼkan naq li ánjel kixye re: «Matxuwak María xbʼaan naq li Yos sa xchʼool aawikʼin.
31 Kʼe reetal, tatkanaaq saʼ yuʼam* ut twanq jun aayum ut Jesús taakʼe choʼq xkʼabʼaʼ.
32 Qʼaxal nim xwankil ut Ralal li Nimajwal Yos tkʼabʼaʼiiq. Ut li Yos Jehobʼa* tixkʼe re li xkʼojaribʼaal laj David, li xyuwaʼ,
33 ut aʼan t-awabʼejinq chi junelik saʼ xbʼeen li rochoch laj Jacob. Li Xʼawabʼejilal maajunwa t-osoʼq».
34 Abʼan li xMaría kixpatzʼ re li ánjel: «Chanru twanq inkʼuulaʼal wi laaʼin toj maajiʼ ninwank rikʼin winq?».
35 Li ánjel kixye re: «Saʼ aabʼeen tchalq li santil musiqʼej ut li xwankil li Nimajwal Yos tmuhelanq aawe. Joʼkan naq li tyoʼlaaq aawikʼin saant tkʼabʼaʼiiq ut Ralal li Yos.
36 Ut kʼe reetal, li xʼElisabet* laawech-alal li cheek chik, twanq ajwiʼ jun xyum. Kiyeemank chirix naq inkʼaʼ twanq xkʼuulaʼal, abʼan ak waqibʼ po xkanajik saʼ yuʼam
37 xbʼaan naq chixjunil li naxye li Yos natzʼaqlok ru».
38 Tojaʼ naq li xMaría kixye: «Arin wank li xmoos li Jehobʼa!* Chiʼuxq wikʼin joʼ xaaye». Chirix chik aʼan li ánjel kiʼelk aran ut xkoho.
39 Moqon chik, li xMaría kixchap xbʼe ut xkoho saʼ junpaat saʼ jun li teep tzuul ru, jun li tenamit re Judá,
40 kiʼok saʼ rochoch laj Zacarías ut kixkʼe xsahil xchʼool li xʼElisabet.*
41 Ut toj maajiʼ ajwiʼ naraqeʼk li xMaría chi xkʼebʼal xsahil xchʼool li xʼElisabet* naq li xkʼuulaʼal li xʼElisabet* kiʼekʼank saʼ xsaʼ. Tojaʼ naq li xʼElisabet* kiʼekʼasiik xbʼaan li santil musiqʼej
42 ut chi kaw xyaabʼ xkux kixye: «Laaʼat li qʼaxal osobʼtesinbʼilat saʼ xyanqebʼ li ixq, ut osobʼtesinbʼil ajwiʼ li kʼuulaʼal li wank saʼ laasaʼ!
43 Kʼaru inwankil re naq tchalq chi wulaʼaninkil li xnaʼ Linqawaʼ?
44 Naq xwabʼi naq xaakʼe xsahil inchʼool, li kʼuulaʼal li wank saʼ linsaʼ kiʼekʼank xbʼaan xsahil xchʼool.
45 Sa ajwiʼ xchʼool li ixq li kixpaabʼ li kiyeemank xbʼaan naq ttzʼaqloq ru li kixye chaq li Jehobʼa».*
46 Ut li xMaría kixye: «Laaʼin ninnima ru li Jehobʼa,*
47 ut numtajenaq xsahil linchʼool saʼ xkʼabʼaʼ li Yos, aj Kolol We
48 xbʼaan naq kixkʼe li ru saʼ xbʼeen li xmoos li maakʼaʼ wank re. Ut chalen anaqwan us xaq aawe, chaʼqebʼ we chixjunilebʼ li qas qiitzʼin!
49 Xbʼaan naq li Nimajwal Yos kixbʼaanu xninqal ru naʼlebʼ chiwix, ut saant li xkʼabʼaʼ.
50 Ut junelik naruxtaana ruhebʼ* li nekeʼloqʼonink re.
51 Kixkʼut li xwankil rikʼin li ruqʼ ut kixchaʼchaʼi ebʼ li qʼetqʼet.
52 Li wankebʼ xwankil narisihebʼ saʼebʼ li xkʼojaribʼaal ut li kubʼenaqebʼ xwankil naxtaqsihebʼ xwankil;
53 li wankebʼ saʼ maajelal naxkʼojobʼebʼ xchʼool rikʼin chaabʼil echej ut ebʼ li bʼihom naxtaqlahebʼ chi maakʼaʼ naxkʼe rehebʼ.
54 Kichalk xtenqʼankil laj Israel, li xmoos, ut rikʼin xbʼaanunkil aʼin kixkʼutbʼesi naq kijultikoʼk re li xyeechiʼom.
55 Aʼan kixye chaq naq junelik truxtaana ru* laj Abrahán ut ebʼ li ralal xkʼajol, ut aʼin li kixye chaq rehebʼ li qaxeʼtoon».
56 Li xMaría oxibʼ po tana kikanaak rikʼin li xʼElisabet* ut chirix chik aʼan kisutqʼiik saʼ rochoch.
57 Tojaʼ naq kiwulak xkutankil naq t-usaaq li xʼElisabet* ut kiyoʼlaak jun xyum.
58 Naq ebʼ li rechkabʼal ut ebʼ li xkomon xeʼxnaw naq kitoqʼobʼaak ru* xbʼaan li Jehobʼa,* kʼajoʼ naq xeʼsahoʼk xchʼool rochbʼeen li xʼElisabet.*
59 Saʼ li xwaqxaq kutan xkohebʼ chi xsetbʼal xtzʼuumal xtzʼejwal li chʼinaʼal ut xeʼxkʼabʼaʼi raj Zacarías, joʼ xkʼabʼaʼ li xyuwaʼ.
60 Abʼan li xʼElisabet* kixye: «Inkʼaʼ! Juan tkʼabʼaʼiiq».
61 Ebʼ aʼan xeʼxye re: «Saʼ laajunkabʼal maaʼani nakʼabʼaʼiik chi joʼkan».
62 Tojaʼ naq rikʼinebʼ ruqʼ, xeʼxpatzʼ re li yuwaʼbʼej chanru naraj naq tkʼabʼaʼiiq li chʼinaʼal.
63 Laj Zacarías kixpatzʼ jun li tzʼalamcheʼ ut kixtzʼiibʼa chiru: «Juan xkʼabʼaʼ». Sachsokebʼ xchʼool xeʼkanaak chixjunilebʼ.
64 Saʼ junpaat kiteehonk saʼ re, kiʼok chi ekʼank li ruʼuj raqʼ ut naq kiʼaatinak kixnima ru li Yos.
65 Ut chixjunilebʼ li rechkabʼal sachsokebʼ xchʼool xeʼkanaak, ut saʼ chixjunil xteepal Judea xeʼok chi aatinak chirix aʼin.
66 Li nekeʼabʼink re li naʼlebʼ aʼin, nekeʼxkʼula saʼ xchʼool ut xeʼok xyeebʼal: «Kʼaru tixbʼaanu li chʼinaʼal aʼin naq tkʼiiq?». Xbʼaan naq chʼolchʼo tzʼaqal naq li Jehobʼa* wank rikʼin.
67 Tojaʼ naq laj Zacarías, li xyuwaʼ, kinujak chi santil musiqʼej ut kiʼaatinak joʼ propeet naq kixye:
68 «Loqʼoninbʼil taxaq li Jehobʼa,* li Xyos aj Israel xbʼaan naq kixtoqʼobʼa ru* li xtenamit ut kixkol.
69 Aʼan kixxaqabʼ choʼq qe jun aj kolonel li qʼaxal wank xmetzʼew* li chalenaq saʼ rochoch laj David, li xmoos.
70 Aʼin naxchap ribʼ rikʼin li kixye chaq li Yos chi xtzʼuumal rehebʼ li chaabʼil propeet li xeʼwank chaq junxil.
71 Aʼan kixye naq tooxkol chiruhebʼ li xikʼ nekeʼilok qe ut tooxkol saʼ ruqʼebʼ li inkʼaʼ sa nokooʼeʼril.
72 Aʼan truxtaana qu* joʼ kixye chaq rehebʼ li qaxeʼtoon ut tixjultika li xsantil sumwank.
73 Aʼin li kixyeechiʼi re laj Abrahán li qaxeʼtoon.
74 Naq ak kooxkol li Yos saʼ ruqʼebʼ li xikʼ nekeʼilok qe, tooruuq xloqʼoninkil ru chi maakʼaʼ qaxiw
75 re naq chi joʼkan tookʼanjelaq chiru chi anchal qachʼool ut tooʼabʼinq chiru saʼ chixjunil li qayuʼam.
76 Ut laaʼat chʼinaʼal, laaʼataq jun li propeet li tatxik chiru li Jehobʼa* re xkawresinkil li xbʼe.
77 Ut re naq li xtenamit tixnaw naq aʼan tixkolebʼ naq tixkuyebʼ xmaak
78 saʼ xkʼabʼaʼ naq li Yos natoqʼobʼank u.* Ut xbʼaan li toqʼobʼank u* aʼin, li Yos tooxkutanobʼresi joʼ naq nahikʼeʼk ru li kutan
79 re xkutanobʼresinkil li chunchukebʼ saʼ qʼoqyink ut wankebʼ rubʼel xmu li kamk. Ut tixkʼut chiqu kʼaru tento tqabʼaanu re naq wanq li tuqtuukilal saʼ li qachʼool».
80 Li chʼinaʼal kikʼiik ut kikʼiik ajwiʼ saʼ li xpaabʼal. Ut kikanaak saʼ li chaqichʼochʼ toj reetal kiwulak li kutan naq tkʼemanq chi naweʼk li resil li Yos rehebʼ laj Israel.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Herodes.
^ Malaj «Isabel».
^ Taawil xchʼolobʼankil li aatin, Jehobʼa.
^ Malaj «li xʼIsabel».
^ Malaj «joʼ xaqabʼanbʼil».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «Li xʼIsabel».
^ Taawil xchʼolobʼankil li aatin, Jehobʼa.
^ Malaj «Toj wanq chaq saʼ xkʼubʼ xsaʼ li xnaʼ».
^ Taawil xchʼolobʼankil li aatin, Jehobʼa.
^ Aʼin naraj xyeebʼal, li Yos.
^ Taawil xchʼolobʼankil li aatin, Jehobʼa.
^ Malaj «li xʼIsabel».
^ Taawil xchʼolobʼankil li aatin, Jehobʼa.
^ Malaj «li tuqʼixq».
^ Malaj «Li tuqʼixq».
^ Taawil xchʼolobʼankil li aatin, Jehobʼa.
^ Malaj «li tuqʼixq».
^ Malaj «tsiyaaq saʼ xkʼubʼ aasaʼ».
^ Taawil xchʼolobʼankil li aatin, Jehobʼa.
^ Malaj «li xʼIsabel».
^ Taawil xchʼolobʼankil li aatin, Jehobʼa.
^ Malaj «li xʼIsabel».
^ Malaj «li xʼIsabel».
^ Malaj «li xʼIsabel».
^ Malaj «li xʼIsabel».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «naxtoqʼobʼa ruhebʼ».
^ Malaj «tixtoqʼobʼa ru».
^ Malaj «li xʼIsabel».
^ Malaj «li xʼIsabel».
^ Malaj «kiʼuxtaanaak ru».
^ Malaj «li xʼIsabel».
^ Taawil xchʼolobʼankil li aatin, Jehobʼa.
^ Malaj «li xʼIsabel».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «kiruxtaana ru».
^ Saʼ griego «xxukubʼ li kolbʼa ibʼ». Taawil xchʼolobʼankil li aatin, xukubʼ.
^ Malaj «tixtoqʼobʼa qu».
^ Taawil xchʼolobʼankil li aatin, Jehobʼa.
^ Malaj «naʼuxtaanank u».
^ Malaj «li uxtaanank u».
