Lucas 13:1-35
-
Li yotʼik chʼool ut li jalok naʼlebʼ malaj li osoʼk (1-5)
-
Li eetalil chirix xtoonal li iig li inkʼaʼ naʼuuchink (6-9)
-
Li ixq li kʼutzkʼu rix, nakʼirtasiik saʼ sábado (10-17)
-
Li eetalil chirix jun tʼorol li mostaas ut li chʼam aj qʼem (18-21)
-
Kʼehomaq eeqʼe chi ok saʼ li okebʼaal li kachʼin ru (22-30)
-
Laj Herodes «li nabʼalaqʼik joʼ li xtzʼiʼ kʼicheʼ» (31-33)
-
Li Jesús nayotʼeʼk xchʼool xbʼaan li tenamit Jerusalén (34, 35)
13 Chiru li kutan aʼan, wiibʼ oxibʼ li wankebʼ aran xeʼxseeraqʼi re li Jesús naq laj Pilaat kixkamsi wiibʼ oxibʼ laj Galilea li yookebʼ chaq chi mayejak.
2 Naq kirabʼi aʼin, li Jesús kixye rehebʼ: «Ma nekeekʼoxla naq ebʼ laj Galilea aʼin ra xeʼxkʼul xbʼaan naq qʼaxal nimebʼ wiʼ chik xmaak chiruhebʼ li rechtenamitul?
3 Laaʼin ninye eere naq moko joʼkan ta. Ut wi laaʼex inkʼaʼ nekeeyotʼ eechʼool ut inkʼaʼ nekeejal eenaʼlebʼ, laaʼex ajwiʼ texʼosoʼq.
4 Ma nekeekʼoxla naq li waqxaqlaju li xeʼkamk naq kitʼaneʼk saʼ xbʼeenebʼ li ochoch li najt xteram aran Siloam numtajenaq wiʼ chik xmaakebʼ chiru li wankebʼ Jerusalén?
5 Laaʼin ninye eere naq moko joʼkan ta. Ut wi laaʼex inkʼaʼ nekeeyotʼ eechʼool ut inkʼaʼ nekeejal eenaʼlebʼ, laaʼex ajwiʼ texʼosoʼq, joʼ xeʼosoʼk aʼanebʼ».
6 Tojaʼ naq kixkʼe rehebʼ li eetalil* aʼin: «Jun li winq xkoho xsikʼbʼal ru li iig li wank saʼ xyanq xtoonal li uubʼ li awbʼil xbʼaan, abʼan maakʼaʼ kixtaw.
7 Chirix chik aʼan kixye re laj ilol awimq: “Rajlal yookin chi kʼulunk re xsikʼbʼal ru li iig, abʼan maakʼaʼ nintaw, ut ak oxibʼ chihabʼ wokik chi xbʼaanunkil aʼin. Yokʼ li cheʼ xbʼaan naq yal yook xlaatzʼankil li chʼochʼ”.
8 Li winq kixye re: “Waʼ, kanabʼ jun chihabʼ chik, tinbʼek li chʼochʼ chi xsutam ut tinkʼe xkʼot xul chisaʼ.
9 Wi saʼ jun kutan t-uuchinq, chaabʼil; aʼut wi inkʼaʼ, taayokʼ”».
10 Saʼ jun li sábado,* li Jesús yook chaq chi kʼutuk saʼ jun rehebʼ li naʼaj re loqʼonink.
11 Ut aran wank chaq jun li ixq li ak waqxaqlaju chihabʼ rokik xyajel xbʼaan jun li maaʼus aj musiqʼej: kʼutzkʼu rix ut inkʼaʼ naru xyuʼbʼal rix.
12 Naq li Jesús kiril li ixq, kixye re: «At ixq, maakʼaʼ chik li yajel saʼ aabʼeen».
13 Kixkʼe li ruqʼ saʼ xbʼeen li ixq ut li ixq saʼ junpaat kitiikoʼk li rix ut kiʼok xkʼebʼal xloqʼal li Yos.
14 Naq kiril aʼin, li winq li najolomink re li naʼaj bʼarwiʼ nekeʼloqʼonink ebʼ laj judiiy, kichʼaʼajkoʼk xbʼaan naq li Jesús kikʼirtansink saʼ sábado.* Kixye re li kʼiila tenamit: «Wank waqibʼ kutan re kʼanjelak; joʼkan naq chalqex chiruhebʼ li kutan aʼan re naq texkʼirtasiiq ut inkʼaʼ saʼ sábado».*
15 Li Qaawaʼ kixye re: «Ex aj kaʼpakʼal u, ma inkʼaʼ tabʼiʼ nekeehit* leeteelom wakax malaj leebʼuur saʼ li xwaʼlebʼaalebʼ chiru li kutan sábado* ut nekeekʼam chi ukʼak?
16 Li ixq aʼin xrabʼin laj Abrahán li kirahobʼtesiik xbʼaan laj Tza chiru waqxaqlaju chihabʼ, ma inkʼaʼ raj us xkʼirtasinkil saʼ li kutan sábado?».*
17 Naq li Jesús kixye aʼin, chixjunilebʼ li xikʼ nekeʼilok re xeʼxutaanak; abʼanan, li kʼiila tenamit kʼajoʼ naq kichalk xsahil xchʼool xbʼaan li xninqal ru bʼaanuhom li yook chaq xbʼaanunkil li Jesús.
18 Ut kiʼok xyeebʼal rehebʼ: «Rikʼin kʼaru tinruuq xjuntaqʼeetankil li Xʼawabʼejilal li Yos? Ut rikʼin kʼaru li eetalil tinruuq xchʼolobʼankil chanru li Xʼawabʼejilal li Yos?
19 Chanchan jun tʼorol li mostaas li kixchap jun li winq ut kiraw saʼ xnaʼaj li ruutzʼuʼuj. Li xtʼorolal li mostaas kikʼiik ut nimla cheʼ kiwulak wiʼ ut ebʼ li xul li nekeʼrupupik chiru choxa xeʼxyiibʼ xsok saʼebʼ li ruqʼ».
20 Tojaʼ naq kixye wiʼ chik rehebʼ: «Rikʼin kʼaru tinruuq xjuntaqʼeetankil li Xʼawabʼejilal li Yos?
21 Chanchan li chʼam aj qʼem li kixyukʼi jun li ixq saʼ xyanq oxibʼ nimla bʼiis* chi ariin. Chi joʼkaʼin, kitzʼubʼoʼk chixjunil li qʼem».
22 Naq yook chi xik Jerusalén, yook chaq xtzolbʼalebʼ li qas qiitzʼin saʼ jalan jalanq chi tenamit ut saʼ jalan jalanq chi kʼalebʼaal.
23 Tojaʼ naq jun li winq kixpatzʼ re: «Qaawaʼ, ma inkʼaʼ kʼihebʼ li nekeʼkoleʼk?». Li Jesús kixye rehebʼ:
24 «Kʼehomaq eeqʼe chi ok saʼ li okebʼaal kachʼin ru* xbʼaan naq naabʼalebʼ teʼxyal ok, abʼan inkʼaʼ teʼruuq.
25 Naq laj echal ochoch twakliiq chaq ut tixtzʼap li okebʼaal rikʼin laaw, aʼut laaʼex texkanaaq chi xaqxo chirix kabʼl, yooqex xtochʼbʼal li okebʼaal ut yooqex xyeebʼal: “Qaawaʼ, te chiqu li okebʼaal!”. Abʼan aʼan tixsumehebʼ: “Inkʼaʼ ninnaw aj bʼarex”.
26 Tojaʼ naq texʼoq xyeebʼal: “Xoowaʼak, xooʼukʼak chaawu ut xooʼaatzol saʼebʼ li xnimal ru bʼe”.
27 Aʼut aʼan tixye eere: “Inkʼaʼ ninnaw aj bʼarex. Elenqex chiwu ex aj bʼaanuhom maaʼusilal!”.
28 Naq teeril naq laj Abrahán, laj Isaac, laj Jacob ut chixjunilebʼ li propeet wankebʼ saʼ li Xʼawabʼejilal li Yos aʼut laaʼex kutbʼilaqex chirix kabʼl, aran texyaabʼaq ut teekʼuxuxi ruch eere.*
29 Joʼkan ajwiʼ, teʼchalq ebʼ li qas qiitzʼin saʼ li naʼaj bʼarwiʼ naʼelk ut naʼok li saqʼe, ut bʼarwiʼ naʼelk ut naʼok li iqʼ; ut teʼchunlaaq saʼ meex saʼ li Xʼawabʼejilal li Yos.
30 Abʼihomaq aʼin: wiibʼ oxibʼ li wankebʼ chiʼixbʼej, teʼkanaaq chiʼubʼej ut jalanebʼ chik li wankebʼ chiʼubʼej, teʼkanaaq chiʼixbʼej».
31 Saʼ li hoonal ajwiʼ aʼan, wankebʼ laj pariseey xeʼchalk ut xeʼxye re: «Elen arin ut ayu xbʼaan naq laj Herodes* naraj aakamsinkil».
32 «Ayuqex rikʼin li winq aʼan li nabʼalaqʼik joʼ li xtzʼiʼ kʼicheʼ ut yeehomaq re: “Kʼe reetal, anaqwan ut wulaj yooqin risinkil ebʼ li maaʼus aj musiqʼej ut xkʼirtasinkilebʼ li qas qiitzʼin, ut kabʼej tinraqeʼq”.
33 Abʼan, toj tento tinbʼaanu linkʼanjel anaqwan, wulaj ut kabʼej xbʼaan naq inkʼaʼ naru naq junaq li propeet tkamsiiq saʼ jalan chik naʼaj, kaʼajwiʼ saʼ Jerusalén.
34 Jerusalén, Jerusalén, li nakaakamsi ebʼ li propeet ut nakaakʼehebʼ chi pek li taqlanbʼilebʼ aawikʼin..., naabʼal sut xwaj xchʼutubʼankil ebʼ laawalal aakʼajol joʼ naq li kaxlan naxchʼutubʼ ebʼ li ral rubʼel li xxikʼ! Abʼan laaʼex inkʼaʼ xeeraj.
35 Kʼehomaq reetal! Li Yos tixtzʼeqtaana leerochoch ut saʼ eeruqʼ chik tkanaaq. Ninye eere naq teeril wu toj saʼ li kutan naq teeye: Osobʼtesinbʼil taxaq li nachalk saʼ xkʼabʼaʼ li Jehobʼa!”».*
Xtzʼaqobʼ ebʼ li naʼlebʼ
^ Malaj «li jaljokil ru aatin».
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Malaj «nekeekʼix».
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Saʼ griego «xbʼiis li sea». Jun sea 7.33 liitr.
^ Malaj «laatzʼ ru».
^ Aʼin reetalil naq yookebʼ xjosqʼil ut inkʼaʼ nekeʼxtaw ru kʼaru teʼxbʼaanu.
^ Aʼin naraj xyeebʼal, laj Herodes Antipas. Taawil xchʼolobʼankil li aatin, Herodes.
^ Taawil xchʼolobʼankil li aatin, Jehobʼa.
