Lucas 15:1-32
15 Joʼkan bʼiʼ, chixjunilebʼ laj maak ut li nekeʼxchʼutubʼ li toj choʼq re li awabʼej xeʼchʼutlaak chi xsutam li Jesús re rabʼinkil.
2 Ebʼ laj pariseey ut ebʼ laj tzʼiibʼ yookebʼ chi aatinak chirix xjolom ut xeʼok xyeebʼal: «Li winq aʼin naxkʼulebʼ laj maak chi sa saʼ xchʼool ut nawaʼak rikʼinebʼ».
3 Tojaʼ naq, kixye rehebʼ li eetalil* aʼin:
4 «Wi junaq eere wank 100 xkarneer ut nasach jun rehebʼ aʼan, ma inkʼaʼ tabʼiʼ tixkanabʼebʼ bʼarwiʼ yookebʼ chi ichajibʼk* li 99; ut txik xsikʼbʼal li jun, toj reetal tixtaw?
5 Naq naxtaw, qʼaxal nasahoʼk saʼ xchʼool ut naxkʼe saʼ xbʼeen xtel.
6 Ut naq nawulak saʼ rochoch, naxbʼoqebʼ li ramiiw ut ebʼ li rechkabʼal ut naxye rehebʼ: “Chisahoʼq saʼ leechʼool wikʼin xbʼaan naq xintaw linkarneer li sachenaq!”.
7 Joʼkan ajwiʼ ninye eere naq twanq nimla sahil chʼoolejil saʼ choxa wi jun laj maak naxyotʼ xchʼool ut naxjal xnaʼlebʼ chiru li 99 li tiikebʼ xchʼool li inkʼaʼ chik naʼajmank chiruhebʼ naq teʼxyotʼ xchʼool ut teʼxjal xnaʼlebʼ.
8 »Ut wi jun li ixq wank lajeebʼ xtumin re plaat* ut nasach jun rehebʼ aʼan, ma inkʼaʼ tabʼiʼ tixloch li xkandil* ut tixmesu chiʼus li rochoch toj reetal tixtaw?
9 Ut naq naxtaw, naxbʼoqebʼ li ramiiw ut ebʼ li rechkabʼal ut naxye rehebʼ: “Chisahoʼq saʼ leechʼool wikʼin xbʼaan naq xintaw li tumin re plaat* li kisach!”.
10 Joʼkan ajwiʼ ninye eere, ebʼ li xʼánjel li Yos nekeʼsahoʼk saʼ xchʼool naq jun laj maak naxyotʼ xchʼool ut naxjal xnaʼlebʼ».
11 Tojaʼ naq kixye: «Jun li winq wank wiibʼ ralal.
12 Ut li iitzʼinbʼej kixye re li xyuwaʼ: “Yuwaʼ, kʼe we li junkabʼlal li tento tintzʼaq”. Joʼkan naq, li yuwaʼbʼej kixjekʼi li xjunkabʼlal rehebʼ li ralal.
13 Wiibʼ oxibʼ kutan chirix aʼin, li iitzʼinbʼej kixkʼam chixjunil li kʼaru re ut xkoho saʼ najtil tenamit bʼarwiʼ kixsach li xjunkabʼlal saʼ joʼmaajoʼil.
14 Naq ak kixsach chixjunil li xjunkabʼlal, kiwank jun li nimla weʼej saʼ li tenamit aʼin, ut aʼan kiʼok xnumsinkil li maajelal.
15 Joʼkan naq, kiʼok chi kʼanjelak rikʼin jun li winq re li tenamit aʼin, ut li winq aʼin kixtaqla saʼ xchʼochʼ chi ilok aaq.*
16 Ut kiraj xwaʼbʼal xwa ebʼ li aaq* xbʼaan naq kʼajoʼ xtzʼokajik. Abʼan maaʼani nakʼehok xwa.
17 »Naq kixkʼe reetal naq memil naʼlebʼ kixbʼaanu, kixye: “Ebʼ li xmoos linyuwaʼ numtajenaqebʼ xtzekemq, ut laaʼin yookin chi kamk xbʼaan intzʼokajik!
18 Tinxik ut tinsutqʼiiq saʼ rochoch linyuwaʼ. Ut tinye re: «Yuwaʼ, xinmaakobʼk chiru li Yos ut chaawu.
19 Moko inkʼulubʼ ta chik naq tinkʼabʼaʼiiq joʼ aawalal. Tinaawil joʼ jun rehebʼ laamoos»”.
20 Joʼkan naq, xkoho ut kisutqʼiik saʼ rochoch li xyuwaʼ. Naq li yuwaʼbʼej kiril li ralal chi najt, kiril xtoqʼobʼaal ru. Xkoho saʼ aanil chi xtawbʼal, kixqʼalu* ut kixtzʼubʼ ru.
21 Tojaʼ naq li alalbʼej kixye re: “Yuwaʼ, xinmaakobʼk chiru li Yos ut chaawu. Moko inkʼulubʼ ta chik naq tinkʼabʼaʼiiq joʼ aawalal”.
22 Abʼan li yuwaʼbʼej kixye rehebʼ li xmoos: “Seebʼaqex! Kʼamomaq chaq jun li jut-aqʼ li qʼaxal chaabʼil ut tiqibʼomaq. Kʼehomaq jun li matqʼabʼ chi ruqʼ ut kʼehomaq ajwiʼ xxaabʼ.*
23 Joʼkan ajwiʼ, kʼamomaq chaq li saajil wakax li nim xtibʼel ut kamsihomaq re naq tqawaʼ ut tqaninqʼehi li xsutqʼijik
24 xbʼaan naq li walal aʼin kamenaq naq xwank chaq ut xwakliik wiʼ chik, kisach ut xtawmank wiʼ chik”. Ut xeʼok chi ninqʼehik.
25 »Ut li asbʼej yook chaq chi kʼanjelak saʼ li awimq. Naq yook chi sutqʼiik ut nachʼ chik wank rikʼin li ochoch, kirabʼi xyaabʼ li son ut li xajok.
26 Joʼkan naq kixbʼoq jun rehebʼ li moos ut kixpatzʼ re kʼaru yook chi kʼulmank.
27 Li moos kixye re: “Kisutqʼiik chaq laawiitzʼin, ut laayuwaʼ kixkamsi li saajil wakax li nim xtibʼel xbʼaan naq kixtaw wiʼ chik li ralal ut maakʼaʼ kixkʼul”.
28 Abʼan li asbʼej kichʼaʼajkoʼk ut inkʼaʼ chik kiraj ok saʼ ochoch. Joʼkan naq kiʼelk chaq li xyuwaʼ ut kiʼok xqʼunbʼesinkil re naq t-oq saʼ ochoch.
29 Aʼan kixye re li xyuwaʼ: “Kʼe reetal. Chiruhebʼ li chihabʼ aʼin yookin chi kʼanjelak chaawu joʼ aamoos ut junelik xinbʼaanu li nikinaataqla wiʼ; abʼanan, maajunwa xaakʼe junaq linchʼina chibʼaat re naq tintzaka rikʼinebʼ li wamiiw.
30 Abʼan, naq xkʼulunk laawalal li kixsach saʼ joʼmaajoʼil laajunkabʼlal rikʼinebʼ li ixq li nekeʼxkʼayi ribʼ, xaakamsi choʼq re li saajil wakax li nim xtibʼel”.
31 Tojaʼ naq li yuwaʼbʼej kixye re: “At walal, laaʼat junelik wankat wikʼin ut aawe chixjunil li kʼaru we.
32 Abʼan, yal xqaj xninqʼehinkil. Sa qachʼool naq xsutqʼiik chaq laawiitzʼin xbʼaan naq kamenaq naq xwank ut xwakliik wiʼ chik, kisach ut xtawmank wiʼ chik”».
Xtzʼaqobʼ ebʼ li naʼlebʼ
^ Malaj «li jaljokil ru aatin».
^ Saʼ griego «saʼ chaqichʼochʼ».
^ Saʼ griego «lajeebʼ dracma». Aʼan tana xtojbʼal jun li winq li nakʼanjelak maare chiru lajeebʼ kutan.
^ Malaj «li xlámpara».
^ Saʼ griego «li dracma».
^ Malaj «kuy».
^ Malaj «ebʼ li kuy».
^ Saʼ griego «kixkut ribʼ chi xkux».
^ Malaj «xperxaabʼ».
