Lucas 17:1-37
17 Tojaʼ naq kixye li Jesús rehebʼ li nekeʼtaqenk re: «Junelik wanq junaq li naʼlebʼ li tixkʼehebʼ chi maakobʼk ebʼ li qas qiitzʼin. Abʼan, ra tchalq saʼ xbʼeen li tbʼaanunq re aʼin!
2 Qʼaxal us raj choʼq re li qas qiitzʼin aʼin naq tbʼakʼmanq chi xkux jun li nimla pek re keʼek ut tkutmanq saʼ palaw, chiru naq tixkʼe chi maakobʼk jun rehebʼ li kachʼin.
3 Cheekʼaakʼale eeribʼ. Qʼus laawas aawiitzʼin* wi namaakobʼk. Ut kuy xmaak wi naxyotʼ xchʼool ut naxjal xnaʼlebʼ.
4 Usta wuqubʼ sut tmaakobʼq chaawu chiru jun kutan ut wuqubʼ sut nasutqʼiik chi xyeebʼal aawe “Chaakuy inmaak”, tento taakuy xmaak».
5 Tojaʼ naq ebʼ li apóstol xeʼxye re li Qaawaʼ: «Tenqʼaho re naq wanq xtzʼaqobʼ li qapaabʼal».
6 Li Qaawaʼ kixye rehebʼ: «Wi leepaabʼal chirix li Yos chanchan raj xnimal jun tʼorol li mostaas, texruuq xyeebʼal re li cheʼ aʼin “Michʼ aawibʼ ut awk aawibʼ saʼ palaw!”, ut li cheʼ t-abʼinq cheeru.
7 »Ani eere wi wank jun xmoos li yook xkʼanjelankil li chʼochʼ malaj yook rilbʼal ebʼ li karneer, tixye re, naq ak xsutqʼiik chik saʼ xkʼanjel “Kim saʼ junpaat saʼ meex chi waʼak”?
8 Tixye bʼan re “Kʼe laadelantal, kʼubʼ bʼayaq intzekemq. Ut naq tinraqeʼq chi waʼak, tatwaʼaq laaʼat”.
9 Peʼyaal naq inkʼaʼ tixbʼanyoxi re li xmoos naq kixbʼaanu li kiyeeheʼk re?
10 Joʼkan ajwiʼ laaʼex, naq ak xeebʼaanu chixjunil li kiyeemank eere, teeye: “Laaʼo yal mooso ut maakʼaʼ qawankil. Li xqabʼaanu aʼan li tento xbʼaanunkil”».
11 Naq yook chi xik Jerusalén, kinumeʼk chire li tenamit Samaria ut Galilea.
12 Ut naq yook chi ok saʼ jun li kʼalebʼaal, lajeebʼ chi winq li saqlepebʼ rix xeʼxtaw ribʼ rikʼin, abʼan najt bʼayaq xeʼkanaak chi xaqxo.
13 Ut japjokebʼ re chi xyeebʼal: «Jesús, at Kʼutunel, toqʼobʼa qu!».*
14 Naq li Jesús kirilebʼ li winq, kixye rehebʼ: «Ayuqex xkʼutbʼal eeru rikʼinebʼ laj tij». Ut naq yookebʼ chi xik, xeʼkʼiraak.
15 Naq jun rehebʼ kiril naq kʼirajenaq chik kiʼok xkʼebʼal xloqʼal li Yos chi kaw xyaabʼ xkux. Ut kixbʼaanu aʼin naq yook chaq chi sutqʼiik.
16 Kixkut ribʼ chiru chʼochʼ chi roq li Jesús ut kixbʼanyoxi re. Li winq aj Samaria.
17 Naq li Jesús kiril aʼin, kixye rehebʼ: «Peʼyaal naq lajeebʼ xeʼkʼirtasiik? Joʼkan bʼiʼ, bʼar wankebʼ li bʼeleebʼ chik?
18 Ma maaʼani chik kisutqʼiik chi xkʼebʼal xloqʼal li Yos? Ma kaʼajwiʼ li winq aʼin li jalan xtenamit?».
19 Ut kixye re: «Waklin ut ayu; xatkʼiraak xbʼaan naq nakaapaabʼ naq li Yos tatxtenqʼa».
20 Ebʼ laj pariseey xeʼxpatzʼ re joqʼe tchalq li Xʼawabʼejilal li Yos, ut li Jesús kixye rehebʼ: «Naq tchalq li Xʼawabʼejilal li Yos inkʼaʼ t-ilmanq chi kutankil.
21 Chi moko teʼxye ta ebʼ li qas qiitzʼin “Ilomaq, arin wank!” malaj “Wank leʼ!”. Xbʼaan naq kʼehomaq reetal, li Xʼawabʼejilal li Yos wank saʼ eeyanq».
22 Tojaʼ naq kixye rehebʼ li xtzolom: «Twulaq xqʼehil naq teeraj rilbʼal jun rehebʼ li kutan naq li Ralal li Winq twanq saʼ eeyanq, abʼan inkʼaʼ teeril.
23 Ebʼ li qas qiitzʼin teʼxye eere “Ilomaq, wank leʼ” malaj “Ilomaq, arin wank!”. Mexʼelk chi moko texxik chirixebʼ.
24 Xbʼaan naq joʼ chanru naq li xrepom kaaq naxlemtzʼuni chixjunil li choxa joʼkanaq ajwiʼ saʼ xkutankil li Ralal li Winq.
25 Abʼan xbʼeenwa tixkʼul naabʼal li rahilal ut ttzʼeqtaanaaq xbʼaan li tenamit li wank chiruhebʼ li kutan aʼin.
26 Joʼkan ajwiʼ, joʼ chanru kikʼulmank saʼ xkutankil laj Noé, joʼkanaq ajwiʼ saʼ xkutankil li Ralal li Winq:
27 ebʼ li qas qiitzʼin yookebʼ chaq chi waʼak, chi ukʼak, ebʼ li winq yookebʼ chaq chi sumlaak, ebʼ li ixq qʼaxtesinbʼilebʼ re sumlaak... toj reetal kiwulak xkutankil naq laj Noé kiʼok saʼ li jukubʼ kabʼl, ut kichalk li Bʼutʼihaʼ ut kixsach chixjunilebʼ.
28 Tkʼulmanq ajwiʼ joʼ kikʼulmank saʼ xkutankil laj Lot: ebʼ li qas qiitzʼin yookebʼ chaq chi waʼak, chi ukʼak, chi loqʼok, chi kʼayink, chi awok, chi kabʼlak...
29 Abʼan saʼ xkutankil naq laj Lot kiʼelk chaq Sodoom, saʼ choxa kiʼelk chaq xaml ut asuupr ut kixsach chixjunilebʼ.
30 Joʼkanaq ajwiʼ saʼ li kutan naq li Ralal li Winq tkʼutbʼesiiq chiruhebʼ li qas qiitzʼin.
31 »Saʼ li kutan aʼan, li wanq saʼ xbʼeen li kabʼl* abʼan wanq li kʼaru re saʼ rochoch, mikubʼeek chaq chi xxokbʼal. Joʼkan ajwiʼ, li wanq saʼ li awimq misutqʼiik chi xxokbʼal li kixkanabʼ chiʼixbʼej.
32 Jultikoʼq eere li rixaqil laj Lot.
33 Li tixyal xkolbʼal li xyuʼam, tixsach xyuʼam, abʼan li tixsach xyuʼam, tixkol xyuʼam.
34 Ninye eere naq saʼ li qʼoqyink aʼan, wiibʼ li qas qiitzʼin wanqebʼ saʼ jun li chʼaat: jun tkʼameʼq abʼan li jun chik tkanabʼaaq.
35 Wanq wiibʼ li ixq li yooqebʼ chi keʼek saʼ wiibʼal: jun tkʼameʼq abʼan li jun chik tkanabʼaaq».
36 *
37 Naq xeʼrabʼi aʼin, aʼanebʼ xeʼxye re: «Bʼar Qaawaʼ?». Aʼan kixye rehebʼ: «Bʼarwiʼ wanq li kamenaq, aran ajwiʼ teʼxchʼutubʼ ribʼ ebʼ li tʼiw».
Xtzʼaqobʼ ebʼ li naʼlebʼ
^ Arin yook chi aatinak chirix li rechpaabʼanelil.
^ Malaj «uxtaana qu».
^ Li xkʼihalil ebʼ li ochoch kiyiibʼamank chi tachʼto xbʼeen re xbʼaanunkil jalan jalanq li kʼanjel.
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
