Lucas 20:1-47
-
Nekeʼxpatzʼ re li Jesús chirix li xwankil (1-8)
-
Li eetalil chirixebʼ laj kʼanjel li nekeʼxkamsi li junchʼol (9-19)
-
Li Yos ut li awabʼej re Roma (20-26)
-
Li patzʼom chirix li wakliik chi yoʼyo (27-40)
-
Ma ralal laj David li Kriist? (41-44)
-
Nekeʼyeeheʼk re, naq weent teʼxbʼaanu rikʼinebʼ laj tzʼiibʼ (45-47)
20 Saʼ jun rehebʼ li kutan aʼan, naq yook xtzolbʼalebʼ li qas qiitzʼin saʼ rochoch li Yos ut yook xkʼebʼal chi naweʼk li chaabʼil esil, xeʼchalk ebʼ li xbʼeenil aj tij, ut ebʼ laj tzʼiibʼ joʼ ajwiʼ ebʼ li cheekel winq
2 ut xeʼxpatzʼ re: «Ye qe, kʼaru aawankil naq nakaabʼaanu aʼin? Ani xkʼehok re aawankil?».
3 Aʼan kixye rehebʼ: «Laaʼin ajwiʼ tinbʼaanu eere jun li patzʼom, ut tineesume.
4 Li kubʼihaʼ li kixbʼaanu chaq laj Juan, ma chalenaq saʼ choxa, malaj rikʼinebʼ li winq?».
5 Joʼkan naq xeʼok xkʼoxlankil ut xeʼxye chiribʼilebʼ ribʼ: «Wi tqaye naq chalenaq saʼ choxa, aʼan tixye qe: “Kʼaʼut inkʼaʼ xeepaabʼ re?”.
6 Abʼan wi naqaye naq chalenaq rikʼinebʼ li winq chixjunil li tenamit tooxkʼe chi pek xbʼaan naq chʼolchʼo chiruhebʼ naq laj Juan aʼan jun propeet».
7 Joʼkan naq xeʼxye naq inkʼaʼ nekeʼxnaw bʼar chalenaq.
8 Ut li Jesús kixye rehebʼ: «Joʼkan ajwiʼ laaʼin inkʼaʼ tinye eere kʼaru inwankil naq ninbʼaanu aʼin».
9 Tojaʼ naq kixkʼe li eetalil* aʼin re li tenamit: «Jun li winq kiraw li uubʼ saʼ xchʼochʼ ut kixkʼe chi toʼ re wiibʼ oxibʼ aj kʼanjel ut xkoho chi najt ut kibʼayk chaq.
10 Naq kiwulak xqʼehil, kixtaqla jun li moos rikʼinebʼ laj kʼanjel re xkʼulbʼal ru li uubʼ li ttzʼaq. Abʼan naq ak xeʼxteni, xeʼxsutqʼisi chi maakʼaʼ xeʼxkʼe re.
11 Li winq kixtaqla jun chik li moos, li moos aʼin xeʼxteni ajwiʼ, xeʼxkubʼsi xwankil* ut xeʼxsutqʼisi chi maakʼaʼ xeʼxkʼe re.
12 Ut toj kixtaqla jun chik aʼ li rox. Xeʼxrahobʼtesi ajwiʼ ut xeʼrisi saʼ li naʼaj aʼin.
13 Chirix chik aʼan laj echal chʼochʼ bʼarwiʼ awbʼil li uubʼ, kixye: “Kʼaru tinbʼaanu? Tintaqla li walal li raaro inbʼaan. Maare anchal aʼan teʼroxloqʼi”.
14 Naq ebʼ laj kʼanjel xeʼril ru, xeʼok xkʼubʼankil kʼaru teʼxbʼaanu re. Ut xeʼok xyeebʼal: “Aʼin laj echal re li ereens. Qakamsihaq re naq tookanaaq rikʼin li xʼereens”.
15 Joʼkan naq, xeʼrisi saʼ li naʼaj aʼin ut xeʼxkamsi. Abʼanan, kʼaru tixbʼaanu rehebʼ laj echal chʼochʼ?
16 Naq tchalq, tixkamsi ebʼ laj kʼanjel aʼin ut re jalanebʼ chik tixkʼe li chʼochʼ li awbʼil wiʼ li uubʼ».
Naq xeʼrabʼi aʼin, xeʼxye: «Mikʼulmank taxaq aʼin!».
17 Abʼan li Jesús kixkaʼyahebʼ ut kixye: «Kʼaru naraj xyeebʼal li tzʼiibʼ aʼin: “Li pek li xeʼxtzʼeqtaana ebʼ laj kabʼlanel, aʼan li kikanaak choʼq li xnimal ru pek li naxik saʼ xxuk ut nakʼemank taqeʼq”?
18 Wi junaq li qas qiitzʼin natʼaneʼk saʼ xbʼeen li pek aʼin, teninbʼil tkanaaq. Ut wi li pek aʼin ttʼaneʼq saʼ xbʼeen junaq li qas qiitzʼin, kokʼpukʼ tkanaaq».
19 Tojaʼ naq ebʼ laj tzʼiibʼ ut ebʼ li xbʼeenil aj tij xeʼxyal xchapbʼal saʼ li hoonal ajwiʼ aʼan xbʼaan naq xeʼxkʼe reetal naq li eetalil* li kiroksi li Jesús yook chi aatinak chirixebʼ. Abʼan nekeʼxxuwa ru li tenamit.
20 Joʼkan bʼiʼ, naq ak xeʼxkaʼya chiʼus li Jesús, xeʼxtaqla wiibʼ oxibʼ li winq li xeʼtuminaak ru saʼ muqmu. Ebʼ li winq aʼin xeʼxbʼaanu ribʼ naq chaabʼilebʼ xnaʼlebʼ re naq teʼruuq xqʼabʼankil li Jesús naq tpaltoʼq saʼ li raatin. Xeʼxkʼoxla aʼin re xqʼaxtesinkil saʼ ruqʼ li awabʼej ut li ruuchil awabʼej.
21 Ebʼ li winq aʼin, xeʼxpatzʼ re: «At Kʼutunel, naqanaw naq nakat-aatinak ut nakatkʼutuk chi tzʼaqal re ru ut inkʼaʼ nakatsikʼok u,* nakaakʼut bʼan xbʼe li Yos rikʼin li yaal.
22 Ma us naq tqakʼe li toj* li nachʼutubʼamank choʼq re li awabʼej re Roma,* malaj inkʼaʼ?».
23 Abʼan naq li Jesús kixkʼe reetal naq yookebʼ xkʼubʼankil chanru teʼxbʼalaqʼi, kixye rehebʼ:
24 «Kʼutumaq chiwu jun li denario».* «Ani aj jalam u aʼin ut ani aj kʼabʼaʼ tzʼiibʼanbʼil chiru?». «Re li awabʼej re Roma»,* chankebʼ re.
25 Li Jesús kixye rehebʼ: «Tojomaq re li awabʼej li re li awabʼej, aʼut re li Yos li re li Yos».
26 Abʼan, inkʼaʼ xeʼruuk xchapbʼal xbʼaan naq inkʼaʼ kipaltoʼk saʼ li raatin naq kiraatina li tenamit. Ut sachsokebʼ xchʼool xeʼkanaak chi rabʼinkil chanru kisumenk ut maakʼaʼ chik xeʼxye.
27 Abʼanan, xeʼchalk wiibʼ oxibʼ aj saduseey li nekeʼxye naq maakʼaʼ li wakliik chi yoʼyo, ut xeʼxpatzʼ re:
28 «At Kʼutunel, laj Moisés kixkanabʼ qe chi tzʼiibʼanbʼil: “Wi nakamk junaq li winq chi maakʼaʼ ralal xkʼajol, li riitzʼin* tento tsumlaaq rikʼin li malkaʼan re naq twanq ralal xkʼajol li ras”.*
29 Kiwank wuqubʼ li winq riitzʼinebʼ ribʼ.* Li xbʼeen kisumlaak, ut kikamk abʼan inkʼaʼ kiwank xkokʼal rikʼin li rixaqil.
30 Joʼkan ajwiʼ kixkʼul li xkabʼ, kisumlaak rikʼin li ixq aʼin ut kikamk
31 ut joʼkan ajwiʼ kixkʼul li rox. Li wuqubʼ chi winq aʼin xeʼkamk ut inkʼaʼ xeʼwank xkokʼal.
32 Chirix chik aʼan, kikamk ajwiʼ li ixq.
33 Joʼkan bʼiʼ, naq twanq li wakliik chi yoʼyo, ani rehebʼ li wuqubʼ tkanaaq choʼq xbʼeelom? Xbʼaan naq li wuqubʼ xeʼsumlaak rikʼin».
34 Li Jesús kixye rehebʼ: «Li ralal xkʼajol li ruuchichʼochʼ* aʼin nekeʼsumlaak ut kʼebʼilebʼ chi sumlaak,
35 abʼan li ilbʼilebʼ naq wankebʼ xkʼulubʼ chi rechaninkil li ruuchichʼochʼ* li yook chi chalk ut chi xtawbʼal li wakliik chi yoʼyo saʼ xyanqebʼ li kamenaq inkʼaʼ teʼsumlaaq chi moko kʼebʼilaqebʼ chi sumlaak.
36 Joʼkan ajwiʼ, inkʼaʼ chik teʼruuq chi kamk xbʼaan naq chanchanebʼ li ánjel, ut ralalaqebʼ li Yos xbʼaan naq teʼwakliiq chi yoʼyo.
37 Ut chirix li xwaklijik chi yoʼyo ebʼ li kamenaq, laj Moisés kixchʼolobʼ ajwiʼ aʼin naq li Yos kiraatina saʼ li cheʼ li kachʼin xteram. Aran laj Moisés kixye naq li Jehobʼa* aʼan “li Xyos laj Abrahán, li Xyos laj Isaac ut li Xyos laj Jacob”.
38 Aʼan maawaʼ Xyosebʼ li kamenaq, Xyos bʼan li yoʼyokebʼ. Xbʼaan naq choʼq re* yoʼyokebʼ chixjunilebʼ».
39 Naq xeʼrabʼi aʼin wiibʼ oxibʼ aj tzʼiibʼ, xeʼxye re: «Xatsumenk chiʼus, at Kʼutunel».
40 Ut maaʼani kiraj xbʼaanunkil re junaq chik li patzʼom.
41 Tojaʼ naq kixpatzʼ rehebʼ: «Chanru nekeʼxye naq li Kriist aʼan ralal laj David?
42 Xbʼaan naq laj David kixye saʼ li hu Salmo: “Li Jehobʼa* kixye re Linqaawaʼ: «Kʼojlan saʼ linnim uqʼ
43 toj reetal tinkʼe rubʼel laawoq ebʼ li xikʼ nekeʼilok aawe re naq taayeqʼihebʼ»”.
44 Joʼkan bʼiʼ, laj David naxkʼabʼaʼi Qaawaʼ. Wi joʼkan, chanru naq ralalaq?».
45 Chirix chik aʼan, naq chixjunil li tenamit yook chi abʼink, kixye rehebʼ li xtzolom:
46 «Weent teebʼaanu rikʼinebʼ laj tzʼiibʼ li nekeʼwulak chiru xbʼeeninkil ribʼ rikʼinebʼ li xjut-aqʼ. Qʼaxal nekeʼwulak chiru naq teʼkʼeheʼq xsahilebʼ xchʼool saʼebʼ li kʼayil. Ut saʼebʼ li naʼaj re loqʼonink nekeʼwulak chiru chunlaak toj chiru. Joʼkan ajwiʼ saʼ li nimla waʼak nekeʼwulak chiru chunlaak saʼebʼ li naʼaj li wankebʼ xwankil.
47 Nekeʼxmaqʼ xjunkabʼlal* ebʼ li malkaʼan ut najt roq ebʼ li xtij nekeʼxbʼaanu yal re naq teʼileʼq. Qʼaxal ra wiʼ chik teʼxkʼul naq traqmanq aatin saʼ xbʼeenebʼ».
Xtzʼaqobʼ ebʼ li naʼlebʼ
^ Malaj «li jaljokil ru aatin».
^ Malaj «inkʼaʼ xeʼroxloqʼi».
^ Malaj «li jaljokil ru aatin».
^ Malaj «juntaqʼeet nakaawil chixjunilebʼ».
^ Aʼin naraj xyeebʼal, li toj li tento tixkʼe li junjunq chi qas qiitzʼin.
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
^ Maare «li ras».
^ Maare «li riitzʼin».
^ Li Santil Hu inkʼaʼ naxye chi tzʼaqal re ru ani li asbʼej malaj li iitzʼinbʼej saʼ xyanqebʼ li winq li xeʼkamk.
^ Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, Jehobʼa.
^ Malaj «chiru aʼan».
^ Taawil xchʼolobʼankil li aatin, Jehobʼa.
^ Saʼ griego «rochoch».
