Lucas 9:1-62
-
Xeʼyeeheʼk re li Kabʼlaju chanru teʼxkʼe chi naweʼk li raatin li Yos (1-6)
-
Laj Herodes naʼok xkʼaʼuxl chirix li Jesús (7-9)
-
Li Jesús naxchʼolani oobʼ mil chi winq (10-17)
-
Laj Pedro naxye naq li Jesús aʼan li Kriist (18-20)
-
Li Jesús naxye chi rubʼelaj li xkamik (21, 22)
-
Li tento tixbʼaanu junaq li qas qiitzʼin re naq tixtaqe li Jesús (23-27)
-
Najalaak li xjunxaqalil li Jesús (28-36)
-
Naxkʼirtasi jun li saaj al li echaninbʼil xbʼaan jun li maaʼus aj musiqʼej (37-43a)
-
Naxye wiʼ chik chi rubʼelaj li xkamik (43b-45)
-
Ebʼ li xtzolom nekeʼxchoqi ribʼ chirix ani li nim (46-48)
-
«Li inkʼaʼ xikʼ nekexril, naʼokenk cheerix» (49, 50)
-
Jun li kʼalebʼaal re Samaria inkʼaʼ naxkʼul li Jesús (51-56)
-
Chanru xtaqenkil li Jesús (57-62)
9 Tojaʼ naq kixchʼutubʼ li Kabʼlaju ut kixkʼehebʼ xwankil re naq teʼruuq chi taqlank saʼ xbʼeenebʼ li maaʼus aj musiqʼej, ut re naq teʼruuq ajwiʼ xkʼirtasinkil li yajel.
2 Ut kixtaqlahebʼ chi xkʼebʼal chi naweʼk li Xʼawabʼejilal li Yos ut chi xkʼirtasinkilebʼ li yaj.
3 Kixye rehebʼ: «Maakʼaʼ teekʼam choʼq re leebʼenik, chi moko eexuqʼ chi moko eechampa chi moko eetzekemq chi moko eetumin* chi moko wiibʼ ta leetʼikr.*
4 Naq texʼoq saʼ junaq li ochoch kanaqex aran ut aran ajwiʼ texʼelq naq texxik.
5 Abʼan wi saʼ junaq li tenamit inkʼaʼ texkʼuleʼq xbʼaanebʼ li qas qiitzʼin, naq texʼelq aran, chiqʼomaq li poqs cheeroq re naq teʼxnaw naq moko us ta wankebʼ».
6 Joʼkan naq xeʼxchap xbʼe ut xkohebʼ saʼ jalan jalanq chi kʼalebʼaal, yalaq bʼar yookebʼ xkʼebʼal chi naweʼk li chaabʼil esil ut xkʼirtasinkil ebʼ li yaj.
7 Joʼkan bʼiʼ laj Herodes,* li awabʼej re li teep, kirabʼi li yook chaq chi yeemank ut kʼajoʼ naq kiʼok xkʼaʼuxl. Wankebʼ nekeʼxye naq laj Juan kiwaklesiik chi yoʼyo saʼ xyanqebʼ li kamenaq;
8 wankebʼ nekeʼxye naq aʼan laj Elías, ut jalanebʼ chik nekeʼxye naq aʼan jun rehebʼ li propeet li kiwank chaq junxil ut kiwaklesiik chi yoʼyo.
9 Laj Herodes kixye: «Laaʼin xintaqla xchʼotbʼal xjolom laj Juan, ani li winq li yookin rabʼinkil naq yook xbʼaanunkil aʼin?». Joʼkan naq kiraj rilbʼal ru.
10 Naq xeʼsutqʼiik ebʼ li apóstol, xeʼxseeraqʼi re li Jesús chixjunil li xeʼxbʼaanu chaq. Tojaʼ naq aʼan kixkʼamebʼ saʼ xjayal jun li tenamit li naxkʼabʼaʼi Betsaida.
11 Abʼan li kʼiila tenamit kixnaw aʼin ut xeʼxtaqe. Aʼan kixkʼulebʼ chi sa saʼ xchʼool ut kiʼok chi aatinak rikʼinebʼ chirix li Xʼawabʼejilal li Yos, ut kixkʼirtasihebʼ li nekeʼraj kʼirtasiik.
12 Saʼ xkʼabʼaʼ naq yook chi ewuuk, ebʼ li kabʼlaju xeʼjilok chixkʼatq ut xeʼxye re: «Chaqʼrabʼi li kʼiila tenamit re naq txik saʼebʼ li kʼalebʼaal re naq teʼxsikʼ kʼaru teʼxwaʼ ut bʼar teʼhilanq xbʼaan naq najt wanko rikʼin li tenamit».
13 Abʼan aʼan kixye rehebʼ: «Kʼehomaqebʼ chi waʼak». Ebʼ aʼan xeʼxye: «Oobʼ ajwiʼ li kaxlanwa ut wiibʼ li kar wank, malaj tooxik xloqʼbʼal li tzekemq choʼq re chixjunilebʼ».
14 Xbʼaan naq aran wank tana oobʼ mil li winq. Abʼan li Jesús kixye rehebʼ li xtzolom: «Yeehomaq rehebʼ naq teʼchunlaaq saʼ kokʼ chʼuut re 50 tana li qas qiitzʼin».
15 Ut aʼan tzʼaqal xeʼxbʼaanu: xeʼxye re chixjunilebʼ naq teʼchunlaaq.
16 Tojaʼ naq li Jesús kixchap li oobʼ chi kaxlanwa ut li wiibʼ chi kar, kixtaqsi li rilobʼaal saʼ choxa, ut kitijok. Chirix chik aʼan kixjachi ut kiʼok xkʼebʼal rehebʼ li xtzolom re naq teʼxjekʼi rehebʼ li qas qiitzʼin.
17 Joʼkan naq chixjunilebʼ xeʼwaʼak toj reetal xeʼkʼojlaak xchʼool. Chirix chik aʼan, xeʼxxok kabʼlaju chakach xperaasil li kaxlanwa li kiʼelaʼank.*
18 Moqon chik, naq li Jesús yook chaq chi tijok xjunes, ebʼ li xtzolom xeʼnachʼok rikʼin ut aʼan kixye rehebʼ: «Anihin naq nekeʼxye ebʼ li qas qiitzʼin?».
19 Ebʼ aʼan xeʼxye re: «Laj Juan, aj Kubʼsihomhaʼ. Abʼan wankebʼ nekeʼxye naq laaʼat laj Elías. Ut jalanebʼ chik nekeʼxye, naq jun rehebʼ li propeet li kiwank chaq junxil li kiwaklesiik chi yoʼyo».
20 Li Jesús kixye rehebʼ: «Ut laaʼex, anihin naq nekeeye?». Laj Pedro kixye re: «Laaʼat li Xkriist li Yos».
21 Tojaʼ naq li Jesús kixye rehebʼ chi chʼolchʼo ru naq maaʼani ajʼe teʼxye,
22 ut kixye ajwiʼ: «Li Ralal li Winq tento tixkʼul naabʼal li rahilal ut inkʼaʼ tkʼulubʼaaq xbʼaanebʼ li cheekel winq, ebʼ li xbʼeenil aj tij ut ebʼ laj tzʼiibʼ. Tkamsiiq ajwiʼ ut saʼ rox kutan twaklesiiq chi yoʼyo».
23 Tojaʼ naq li Jesús kixye rehebʼ li xtzolom: «Li naraj wank choʼq intzolom, inkʼaʼ chik twanq joʼ naraj aʼan, tento tixkʼulubʼa li rahobʼtesiik* ut mixkanabʼ intaqenkil.
24 Xbʼaan naq li naraj xkolbʼal xyuʼam tixsach, abʼan li tixsach xyuʼam saʼ inkʼabʼaʼ, tixkol xyuʼam.
25 Kʼaru rusilal tixtaw junaq winq wi xbʼaan xtawbʼal li kʼaʼaq re ru li wank saʼ ruuchichʼochʼ tixkʼe ribʼ saʼ chʼaʼajkilal malaj tixsach li xyuʼam?
26 Xbʼaan naq, wi junaq li qas qiitzʼin naxutaanak inbʼaan ut xbʼaan li waatin, li Ralal li Winq txutaanaq ajwiʼ xbʼaan li qas qiitzʼin aʼin naq aʼan tchalq rikʼin li xloqʼal, rikʼin li xloqʼal li Xyuwaʼ ut rikʼin li xloqʼal ebʼ li ánjel.
27 Abʼan relik chi yaal ninye eere naq wiibʼ oxibʼ li wankebʼ arin maajoqʼe teʼkamq wi toj maajiʼ nekeʼril li Xʼawabʼejilal li Yos».
28 Joʼkan kikʼulmank. Waqxaqibʼ kutan xyeebʼal aʼin, naq kixkʼam chirix laj Pedro, laj Juan ut laj Santiago ut kitaqeʼk saʼ li tzuul chi tijok.
29 Ut naq yook chi tijok, kijalaak li rilobʼaal ut kilemtzʼunoʼk li raqʼ xbʼaan xsaqal.
30 Ut xaqamil chiru wiibʼ li winq yookebʼ chi seeraqʼik rikʼin li Jesús: aʼ laj Moisés ut laj Elías.
31 Ebʼ li winq aʼin xeʼxkʼut ribʼ rikʼinebʼ li xloqʼal ut yookebʼ chi aatinak chirix li xxikik li Jesús li ttzʼaqloq ru aran Jerusalén.
32 Laj Pedro ut ebʼ li junchʼol chik yookebʼ chi wark; abʼan, naq xeʼajk ru chiʼus, xeʼril li xloqʼal li Jesús ut li wiibʼ chi winq li xaqxokebʼ chixkʼatq.
33 Ut naq ebʼ li winq aʼin yookebʼ chi najtoʼk rikʼin li Jesús, laj Pedro kixye re: «At Kʼutunel, us naq wanko arin! Qayiibʼaq oxibʼ li kokʼ ochoch: jun choʼq aawe, jun choʼq re laj Moisés ut jun choʼq re laj Elías». Abʼan inkʼaʼ naxkʼe reetal li yook xyeebʼal.
34 Abʼan, toj yook ajwiʼ xyeebʼal aʼin, naq jun li choql kiʼok xmuqbʼalebʼ. Naq xeʼmuqunk saʼ li choql, kʼajoʼ xeʼxuwak.
35 Tojaʼ naq saʼ li choql kiʼelk chaq jun xyaabʼ kuxej li kixye: «Aʼin li Walal, li sikʼbʼil ru inbʼaan. Cheerabʼihaq».
36 Naq kiʼabʼimank li xyaabʼ kuxej, kaʼaj chik li Jesús wank aran. Ebʼ li xtzolom maakʼaʼ chik xeʼxye ut chiruhebʼ li kutan aʼan maaʼani ajʼe xeʼxye li xeʼril.
37 Xeʼkubʼeek chaq saʼ li tzuul naq kisaqewk ut li kʼiila tenamit xkoho xkʼulbʼal li Jesús.
38 Tojaʼ naq jun li winq kixjap re saʼ xyanq li kʼiila tenamit ut kixye: «At Kʼutunel, nintzʼaama chaawu naq taawil li walal, jun ajwiʼ chiwu!
39 Jun li maaʼus aj musiqʼej narechani li walal ut maakʼaʼ saʼ xchʼool naq naʼok xjapbʼal re. Li maaʼus aj musiqʼej naxbʼaanu naq tixchiqʼchiqʼi ribʼ chi kaw li walal ut naq t-elq woqx saʼ re. Ut elajik naxkanabʼ ut naq naxbʼaanu, kʼajoʼ naq naxrahobʼtesi.
40 Xintzʼaama rehebʼ laatzolom naq teʼrisi li maaʼus aj musiqʼej rikʼin abʼan inkʼaʼ xeʼruuk».
41 Kichaqʼok li Jesús ut kixye: «Li tenamit li wank chiruhebʼ li kutan aʼin qʼaxal maaʼus xnaʼlebʼ ut inkʼaʼ naxpaabʼ li Yos. Joʼ najtil chik wanqin eerikʼin ut texinkuy? Kʼam chaq arin laawalal».
42 Ut toj maajiʼ ajwiʼ nawulak li saaj al chixkʼatq, naq li maaʼus aj musiqʼej kixkut li al chiru chʼochʼ ut kixchiqʼle chi kaw. Abʼan li Jesús kixqʼus li maaʼus aj musiqʼej, kixkʼirtasi li saaj al ut kixkʼe re li xyuwaʼ.
43 Sachsokebʼ xchʼool xeʼkanaak chixjunilebʼ xbʼaan xnimal xwankilal li Yos.
Toj sachsokebʼ ajwiʼ xchʼool xbʼaan chixjunil li yook chaq xbʼaanunkil, li Jesús kixye rehebʼ li xtzolom:
44 «Kʼehomaq eechʼool chi rabʼinkil ebʼ li aatin aʼin ut misach saʼ leechʼool xbʼaan naq li Ralal li Winq tqʼaxtesiiq saʼ ruqʼebʼ li winq».
45 Abʼan ebʼ li xtzolom inkʼaʼ xeʼxtaw ru li yook xyeebʼal ut kimuqmank aʼin chiruhebʼ re naq inkʼaʼ teʼxtaw ru. Ut nekeʼxuwak xpatzʼbʼal re chirix aʼin.
46 Tojaʼ naq xeʼxchoqi ribʼebʼ chirix ani li qʼaxal nim.
47 Li Jesús naxnaw li yookebʼ xkʼoxlankil, kixchap jun li chʼinaʼal, kixkʼe chixkʼatq
48 ut kixye rehebʼ: «Li naxkʼul li chʼinaʼal aʼin saʼ inkʼabʼaʼ nikinxkʼul ajwiʼ laaʼin; ut li nakʼuluk we naxkʼul ajwiʼ li kitaqlank chaq we. Xbʼaan naq li nanaʼlebʼak saʼ eeyanq joʼ jun rehebʼ li kachʼin aʼan li nim».
49 Naq kirabʼi aʼin, laj Juan kixye re: «At Kʼutunel, xqil naq jun li qas qiitzʼin yook roksinkil laakʼabʼaʼ re risinkil ebʼ li maaʼus aj musiqʼej; abʼan xqayal xrambʼal chiru xbʼaan naq moko yook ta chiqix».
50 Abʼan li Jesús kixye re: «Meeram chiru xbʼaan naq li inkʼaʼ xikʼ nekexril, naʼokenk cheerix».
51 Naq yook chi nachʼok xkutankil re naq tkʼameʼq saʼ choxa, kixkawresi xchʼool re xik Jerusalén.
52 Joʼkan naq kixtaqla chiʼubʼej wiibʼ oxibʼ li xtaql. Ebʼ aʼan xkohebʼ ut xeʼok saʼ jun li kʼalebʼaal re Samaria re xkawresinkil li xnaʼaj.
53 Abʼan inkʼaʼ kikʼuleʼk aran xbʼaan naq ak kʼubʼkʼu xbʼaan, naq txik Jerusalén.
54 Naq laj Santiago ut laj Juan xeʼril aʼin xeʼxye re: «Qaawaʼ, ma nakaawaj naq tqapatzʼ naq tkubʼeeq chaq xaml saʼ choxa re naq teʼosoʼq?».
55 Abʼan aʼan kixkaʼyahebʼ ut kixqʼusebʼ.
56 Joʼkan naq xkohebʼ saʼ jalan chik kʼalebʼaal.
57 Joʼkan bʼiʼ, naq yookebʼ chiru bʼe, jun li winq kixye re: «Maakʼaʼ naxye bʼar tatxik, tatintaqe».
58 Abʼan li Jesús kixye re: «Ebʼ li xtzʼiʼ kʼicheʼ* wankebʼ xsok ut ebʼ li xul li nekeʼrupupik chiru choxa wankebʼ xsok, abʼan li Ralal li Winq maakʼaʼ xnaʼaj re xtolobʼankil xjolom».
59 Moqon chik kixye re jun chik li qas qiitzʼin: «Taaqehin». Abʼan li winq kixye: «Qaawaʼ, kanabʼin chi xik xbʼeenwa chi xmuqbʼal linyuwaʼ».
60 Abʼan li Jesús kixye re: «Kanabʼ naq ebʼ li kamenaq teʼxmuq li xkamenaq. Abʼan laaʼat ayu, ut kʼe chi naweʼk yalaq bʼar li Xʼawabʼejilal li Yos».
61 Ut jun chik kixye re: «Tatintaqe Qaawaʼ, abʼan kanabʼin chi xik xbʼeenwa chi xchaqʼrabʼinkilebʼ li wankebʼ saʼ wochoch».
62 Li Jesús kixye re: «Li winq li yook xpikbʼal li chʼochʼ ut yook chi ilok chirix moko xkʼulubʼ ta naq t-oq saʼ li Xʼawabʼejilal li Yos».
Xtzʼaqobʼ ebʼ li naʼlebʼ
^ Li tumin aʼin yiibʼanbʼil rikʼin chʼiichʼ, plaat xkʼabʼaʼ.
^ Malaj «jun chik leetʼikr».
^ Aʼin naraj xyeebʼal, laj Herodes Antipas. Taawil xchʼolobʼankil li aatin, Herodes.
^ Malaj «li kisobʼrin».
^ Malaj «tixpaqo li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Jun li xul li wank saʼ Israel li chanchan tzʼiʼ.
