Marcos 10:1-52
-
Li sumlaak ut li kanabʼank ibʼ (1-12)
-
Li Jesús narosobʼtesi wiibʼ oxibʼ li kokʼal (13-16)
-
Li patzʼom li naxbʼaanu jun li winq bʼihom (17-25)
-
Xkanabʼankil chixjunil re xtaqenkil li Jesús (26-31)
-
Li Jesús naxye wiʼ chik chi rubʼelaj li xkamik (32-34)
-
Laj Santiago ut laj Juan nekeʼxpatzʼ li naʼaj li wank xwankil (35-45)
-
Li Jesús naxkʼe xyuʼam re xkolbʼal naabʼal li qas qiitzʼin (45)
-
-
Li Jesús naxkʼirtasi jun li mutzʼ aj Bartimeo xkʼabʼaʼ (46-52)
10 Moqon chik kiʼelk aran ut kiwulak saʼ xnubʼaal Judea, junpakʼal li nimaʼ Jordán. Li kʼiila tenamit kixchʼutubʼ wiʼ chik ribʼ saʼ xsutam. Ut joʼ kʼaynaq xbʼaanunkil, kiʼok xtzolbʼalebʼ.
2 Tojaʼ naq xeʼjilok chixkʼatq wiibʼ oxibʼ aj pariseey li xeʼraj xyalbʼal rix, ut xeʼxpatzʼ re ma naxkʼulubʼa li chaqʼrabʼ naq junaq winq tixkanabʼ* li rixaqil.
3 Aʼan kixye rehebʼ: «Kʼaru kixye laj Moisés naq teebʼaanu?».
4 Ebʼ aʼan xeʼxye: «Laj Moisés kixkanabʼ naq li winq tixtzʼiibʼa xhuhil li jachok ibʼ ut tixkanabʼ* li rixaqil».
5 Li Jesús kixye rehebʼ: «Laj Moisés kixkʼe chi tzʼiibʼanbʼil li taql aʼin xbʼaan naq leechʼool kixqʼet ribʼ.
6 Abʼanan, chalen chaq saʼ xtiklajik li xyobʼtesihom li Yos, “winq ut ixq naq kixyobʼtesihebʼ”
7 ut “saʼ xkʼabʼaʼ aʼin, li winq tixkanabʼ li xnaʼ ut li xyuwaʼ,
8 ut saʼ kabʼichal junajaqebʼ chik chi tibʼelej” joʼkan naq moko wiibʼebʼ ta chik, junebʼ bʼan chik.
9 Joʼkan bʼiʼ, li naxlaqʼabʼ li Yos maaʼani tjachoq re».
10 Naq xeʼsutqʼiik saʼ ochoch, ebʼ li xtzolom xeʼok xpatzʼinkil re chirix li naʼlebʼ aʼin.
11 Li Jesús kixye rehebʼ: «Li winq li naxkanabʼ* li rixaqil ut nasumlaak rikʼin jalan chik, naxmux li xsumlajik* ut naxkʼat roq li xbʼeen rixaqil.
12 Ut wi saʼ jun kutan, jun li ixq naxkanabʼ* li xbʼeelom ut nasumlaak rikʼin jalan chik, li ixq aʼin naxmux li xsumlajik».*
13 Tojaʼ naq ebʼ li qas qiitzʼin xeʼxkʼam chaq ebʼ li kokʼal rikʼin li Jesús re naq tixkʼe li ruqʼ saʼ xbʼeenebʼ,* abʼan ebʼ li xtzolom xeʼok xchʼilankil li xnaʼ xyuwaʼ ebʼ li kokʼal.
14 Naq kiril aʼin, li Jesús kichʼaʼajkoʼk ut kixye rehebʼ: «Kanabʼomaq naq ebʼ li kokʼal teʼjiloq chinkʼatq. Meeram chiruhebʼ xbʼaan naq li chanchanebʼ li kokʼal, rehebʼ aʼan li Xʼawabʼejilal li Yos.
15 Relik chi yaal ninye eere naq li inkʼaʼ naxkʼulubʼa li Xʼawabʼejilal li Yos joʼ jun li chʼinaʼal maajunwa t-oq saʼ li Awabʼejilal aʼin».
16 Kixqʼaluhebʼ li kokʼal ut kixkʼe li ruqʼ saʼ xbʼeenebʼ re rosobʼtesinkilebʼ.
17 Naq yook chiru bʼe, jun li winq kichalk saʼ aanil, kixkut ribʼ chi roq ut kixpatzʼ re: «At chaabʼil Kʼutunel, kʼaru tento tinbʼaanu re naq twechani li junelik yuʼam?».
18 Li Jesús kixye re: «Kʼaʼut nakaaye naq chaabʼilin? Maaʼani chaabʼil, kaʼajwiʼ li Yos.
19 Laaʼat nakaanaw li xtaql li Yos: matkamsink, matmuxuk sumlaak,* mat-elqʼak, matyoobʼank tikʼtiʼ chirixebʼ li junchʼol, matbʼalaqʼik re rechaninkil li kʼaru rehebʼ li junchʼol, oxloqʼi laanaʼ laayuwaʼ».
20 Li winq kixye re: «At Kʼutunel chalen chaq saʼ linkachʼinal yookin chaq xyuʼaminkil aʼin».
21 Li Jesús kixkaʼya li winq ut saʼ xkʼabʼaʼ naq naxra, kixye re: «Toj wank jun chik li naʼlebʼ li maajiʼ nakaabʼaanu: kʼayi chaq li kʼaru aawe ut li tumin taakʼe rehebʼ li nebʼaʼ; chi joʼkan twanq aabʼihomal saʼ choxa. Tojaʼ naq tatchalq ut tinaataqe».
22 Abʼan naq li winq kirabʼi li kixye li Jesús, kichʼinaak xchʼool. Joʼkan naq xkoho chi ra saʼ xchʼool xbʼaan naq naabʼal li kʼaru re.
23 Naq ak xʼilok saʼ xsutam, li Jesús kixye rehebʼ li xtzolom: «Qʼaxal tchʼaʼajkoʼq chiruhebʼ li wankebʼ xtumin ok saʼ li Xʼawabʼejilal li Yos!».
24 Abʼan ebʼ li xtzolom kʼajoʼ xeʼsach xchʼool chi rabʼinkil li raatin. Tojaʼ naq li Jesús kixye rehebʼ: «Ex inkokʼal, qʼaxal chʼaʼaj ok saʼ li Xʼawabʼejilal li Yos!
25 Moko chʼaʼaj ta chiru junaq li kameey* ok saʼ ru junaq li kuux chiru naq junaq li bʼihom t-oq saʼ li Xʼawabʼejilal li Yos».
26 Naq xeʼrabʼi aʼin, kʼajoʼ wiʼ chik xeʼsach xchʼool ut xeʼxye:* «Wi joʼkan, ani tkoleʼq?».
27 Li Jesús kikanaak rilbʼalebʼ ut kixye: «Chiruhebʼ li winq inkʼaʼ naruhank xbʼaanunkil aʼin, abʼan moko joʼkan ta chiru li Yos xbʼaan naq chiru li Yos naruhank chixjunil».
28 Laj Pedro kiʼok xyeebʼal re: «Kʼe reetal, laaʼo xqakanabʼ chixjunil re aataqenkil».
29 Li Jesús kixye rehebʼ: «Relik chi yaal ninye eere naq li kixkanabʼ rochoch, ras ut riitzʼin, ranabʼ, xnaʼ, xyuwaʼ, ralal xkʼajol malaj xchʼochʼ saʼ inkʼabʼaʼ ut saʼ xkʼabʼaʼ li chaabʼil esil
30 tixkʼul anaqwan, saʼebʼ li kutan aʼin, jun siʼeent sut chik saʼ xbʼeen chiru li kixkanabʼ chaq: rochoch, ras ut riitzʼin, ranabʼ, xnaʼ, ralal xkʼajol ut xchʼochʼ usta yooq li rahobʼtesiik, ut saʼ li kutan* li yook chi chalk tixkʼul li junelik yuʼam.
31 Abʼan naabʼal rehebʼ li wankebʼ chiʼubʼej, teʼkanaaq chiʼixbʼej, ut naabʼal rehebʼ li wankebʼ chiʼixbʼej, teʼkanaaq chiʼubʼej».
32 Joʼkan bʼiʼ, chixjunilebʼ yookebʼ chi taqeʼk saʼ xbʼehil Jerusalén. Li Jesús yook chi xik chiʼubʼej ut ebʼ li xtzolom yookebʼ chirix chi sachsokebʼ xchʼool, ut li yookebʼ chaq chiʼixbʼej teʼxuwaq. Li Jesús kirisi wiʼ chik li Kabʼlaju saʼ xyanq li komonil ut kiʼok xjultikankil rehebʼ li teʼxkʼul moqon.
33 Kixye rehebʼ: «Kʼehomaq reetal, yooko chi taqeʼk Jerusalén, ut aran li Ralal li Winq tqʼaxtesiiq saʼ ruqʼebʼ li xbʼeenilebʼ laj tij ut ebʼ laj tzʼiibʼ. Teʼxtenebʼ kamk saʼ xbʼeen ut teʼxqʼaxtesi saʼ ruqʼebʼ li maawaʼebʼ aj judiiy.
34 Ebʼ aʼin teʼxseʼe, teʼxchuubʼa, teʼxkʼe chi tzʼuum* ut teʼxkamsi, abʼan saʼ rox kutan twaklesiiq chi yoʼyo».
35 Ebʼ li ralal laj Zebedeo aʼ laj Santiago ut laj Juan xeʼjilok chixkʼatq ut xeʼxye re: «At Kʼutunel naqaj naq taabʼaanu li ok qe xpatzʼbʼal aawe».
36 Aʼan kixpatzʼ rehebʼ: «Kʼaru nekeeraj naq tinbʼaanu cheerix?».
37 Ebʼ aʼan xeʼxye re: «Naq wanqat saʼ Laaʼawabʼejilal, kanabʼ naq toochunlaaq chaakʼatq, jun saʼ laatzʼe ut jun saʼ laanim».
38 Abʼan li Jesús kixye rehebʼ: «Laaʼex inkʼaʼ nekeenaw li yookex xpatzʼbʼal. Ma texruuq tabʼiʼ rukʼbʼal li yookin rukʼbʼal malaj xkubʼsinkil eehaʼ rikʼin li kubʼihaʼ li yook wiʼ chi kubʼsiik inhaʼ?».
39 «Tooruuq», chankebʼ. Tojaʼ naq li Jesús kixye rehebʼ: «Laaʼex teerukʼ li yookin rukʼbʼal, ut tkubʼsiiq eehaʼ rikʼin li kubʼihaʼ li yook wiʼ chi kubʼsiik inhaʼ.
40 Abʼan moko laaʼin ta ninyeehok re ani tchunlaaq saʼ linnim ut saʼ lintzʼe. Ebʼ li naʼajej aʼin kawresinbʼil choʼq rehebʼ li ak sikʼbʼilebʼ ru».
41 Naq xeʼrabʼi aʼin li lajeebʼ chik, xeʼchʼaʼajkoʼk rikʼin laj Santiago ut laj Juan.
42 Abʼan, li Jesús kixchʼutubʼebʼ ut kixye rehebʼ: «Nekeenaw naq li nawbʼilebʼ ru chi xjolominkil li tenamit nekeʼnumtaak saʼ xbʼeenebʼ li qas qiitzʼin ut ebʼ li xninqal ru winq wankebʼ xwankil saʼ xbʼeenebʼ li qas qiitzʼin.
43 Moko joʼkanaq ta saʼ eeyanq. Li naraj naq nimaq saʼ eeyanq tento twanq choʼq xmoos ebʼ li junchʼol
44 ut li naraj wank chiʼubʼej saʼ eeyanq, tento twanq choʼq xmoos chixjunilebʼ.
45 Chi moko li Ralal li Winq kichalk re naq ebʼ li junchʼol teʼwanq choʼq xmoos, kichalk bʼan choʼq xmoos ebʼ li junchʼol ut xkʼebʼal li xyuʼam re xkolbʼal naabʼal li qas qiitzʼin».*
46 Tojaʼ naq xeʼok Jericó. Naq li Jesús ut ebʼ li xtzolom xeʼelk chaq Jericó rochbʼeen li kʼiila tenamit, laj Bartimeo (ralal laj Timeo) chunchu chaq chire bʼe. Li winq aj lemoox ut mutzʼ.
47 Naq kirabʼi naq li yook chi numeʼk aʼan li Jesús aj Nazaret, kiʼok xjapbʼal re: «Jesús, ralal laj David, toqʼobʼa wu!».*
48 Joʼkan naq, naabʼalebʼ xeʼok xchʼilankil ut xeʼxye re, naq tixkanabʼ xjapbʼal re, abʼan li winq qʼaxal kaw chik kiʼok xyeebʼal: «Ralal laj David, toqʼobʼa wu!».*
49 Joʼkan naq kixaqli li Jesús ut kixye rehebʼ: «Bʼoqomaq, chalqaq arin». Ebʼ aʼan xeʼxye re li mutzʼ: «Matxuwak! Waklin yook aabʼoqbʼal».
50 Tikto kirisi li tʼikr li lanlo wiʼ, kixaqli saʼ junpaat ut xkoho chi xtawbʼal li Jesús.
51 Tojaʼ naq li Jesús kixpatzʼ re: «Kʼaru nakaawaj naq tinbʼaanu aawe?». Li mutzʼ kixye re: «At Kʼutunel,* nawaj naq tteehonq wiʼ chik saʼ li wu».
52 Ut li Jesús kixye re: «Ayu, xatkʼiraak xbʼaan naq nakaapaabʼ naq li Yos tatxtenqʼa». Saʼ junpaat kiʼilok li winq, ut xkoho chirix li Jesús.
Xtzʼaqobʼ ebʼ li naʼlebʼ
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Malaj «namuxuk kaxaar».
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Malaj «namuxuk kaxaar».
^ Aʼin naraj xyeebʼal, naq trosobʼtesihebʼ.
^ Malaj «matmuxuk kaxaar».
^ Aʼin jun li nimla xul li wank xbʼuqʼulal rix.
^ Maare «xeʼxye chiribʼilebʼ ribʼ».
^ Malaj «saʼ li ruuchichʼochʼ». Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, kʼehok chi tzʼuum.
^ Malaj «re xloqʼbʼal wiʼ chik xyuʼam naabʼal li qas qiitzʼin».
^ Malaj «uxtaana wu».
^ Malaj «uxtaana wu».
^ Saʼ griego «Rabbóni».
