Marcos 14:1-72
-
Ebʼ laj tij nekeʼxkʼubʼ chanru xkamsinkil li Jesús (1, 2)
-
Jun li ixq naxkʼe sununkil aseeyt saʼ xjolom li Jesús (3-9)
-
Laj Judas naqʼaxtesink re (10, 11)
-
Jun aj chik li Paswa (12-21)
-
Naxaqabʼaak li Xtzekemq li Qaawaʼ (22-26)
-
Li Jesús naxye chi rubʼelaj naq laj Pedro tixye naq inkʼaʼ naxnaw ru (27-31)
-
Natijok saʼ li naʼaj Getsemaní (32-42)
-
Nekeʼxchap ut nekeʼxkʼam (43-52)
-
Li nekeʼtzʼaqonk saʼ li Nimla Raqlebʼaal Aatin nekeʼraqok aatin saʼ xbʼeen (53-65)
-
Laj Pedro naxye naq inkʼaʼ naxnaw ru (66-72)
14 Joʼkan bʼiʼ, naq wiibʼ kutan chik ma nawulak li Paswa ut li Ninqʼe chirix li Kaxlanwa li Maakʼaʼ Xchʼamal,* ebʼ li xbʼeenil aj tij ut ebʼ laj tzʼiibʼ yookebʼ xkʼubʼankil chanru teʼxbʼalaqʼi re naq teʼruuq xchapbʼal ut xkamsinkil li Jesús.
2 Xbʼaan naq nekeʼxye chiribʼilebʼ ribʼ: «Inkʼaʼ tqachap saʼ li ninqʼe, maare tixpoqoqi ribʼ* li tenamit».
3 Naq li Jesús wank chaq Betania ut yook chi waʼak* saʼ rochoch laj Simón li saqlep rix, kijilok jun li ixq chixkʼatq ut rikʼin wank jun li meet* li nujenaq chi sununkil aseeyt, li qʼaxal terto ut tzʼaqal naard. Naq kixte re li meet kiʼok xkʼebʼal li aseeyt saʼ xjolom li Jesús.
4 Naq xeʼril aʼin, wankebʼ xeʼchʼaʼajkoʼk ut xeʼok xyeebʼal chiribʼilebʼ ribʼ: «Kʼaʼut yook chi hoymank li sununkil aseeyt?
5 Numenaq oxibʼ siʼeent denario* xtzʼaq li sununkil aseeyt aʼin, xeʼruuk raj xkʼayinkil... ut li xtuminal xeʼxkʼe raj rehebʼ li nebʼaʼ». Kʼajoʼ naq xeʼpoʼk rikʼin li ixq.*
6 Abʼan li Jesús kixye rehebʼ: «Kanabʼomaq xchʼiʼchʼiʼinkil. Kʼaʼut nekeeraj xchʼiʼchʼiʼinkil? Us xbʼaanu we.
7 Xbʼaan naq ebʼ li nebʼaʼ junelik wankebʼ eerikʼin ut naru teetenqʼahebʼ naq teeraj, abʼan laaʼin moko junelik ta wanqin eerikʼin.
8 Li ixq kixbʼaanu joʼnimal li wank chiru; rubʼelaj kixkʼe li sununkil aseeyt chiru lintibʼel re xkawresinkil linmuqbʼal.
9 Relik chi yaal ninye eere naq yalaq bʼar re li ruuchichʼochʼ bʼarwiʼ tkʼemanq chi naweʼk li chaabʼil esil, tkʼemanq ajwiʼ chi naweʼk li kixbʼaanu li ixq aʼin, ut chi joʼkan tjultikamanq».
10 Laj Judas Iscariote, jun rehebʼ li Kabʼlaju, xkoho rilbʼalebʼ li xbʼeenil aj tij re naq tixqʼaxtesi li Jesús rehebʼ.
11 Naq xeʼrabʼi, kʼajoʼ xeʼsahoʼk xchʼool ut xeʼxyeechiʼi xtumin.* Joʼkan naq laj Judas kiʼok xsikʼbʼal chanru tixqʼaxtesi rehebʼ.
12 Saʼ li xbʼeen kutan re li Ninqʼe chirix li Kaxlanwa li Maakʼaʼ Xchʼamal,* naq kʼaynaqebʼ chi xyeechiʼinkil li mayejanbʼil xul choʼq re li Paswa, ebʼ li xtzolom xeʼxpatzʼ re: «Bʼar nakaawaj naq tooxik xkawresinkil li Paswa re naq taawaʼ?».
13 Tojaʼ naq, li Jesús kixtaqla wiibʼ rehebʼ li xtzolom ut kixye rehebʼ: «Ayuqex saʼ li tenamit. Aran teetaw eeribʼ rikʼin jun li winq li yook xkʼambʼal xhaʼ saʼ jun chʼochʼil kuk. Teetaqe
14 ut bʼarwiʼ t-oq li winq, yeehomaq re laj echal ochoch: “Laj Kʼutunel naxye: «Bʼar wank li naʼaj rehebʼ li ulaʼ re naq tinwaʼ li Paswa rochbʼeenebʼ lintzolom?»”.
15 Ut aʼan tixkʼut cheeru jun li nimla naʼaj li wank taqeʼq ut chisaʼ wank chixjunil ut yamtesinbʼil chik. Aran texkawresinq choʼq qe».
16 Ebʼ li xtzolom xkohebʼ, xeʼok saʼ tenamit ut xeʼxtaw chixjunil joʼ kixye chaq li Jesús; tojaʼ naq xeʼok xkawresinkil li Paswa.
17 Naq xʼewuhoʼk, kiwulak aran rochbʼeen li Kabʼlaju.
18 Ut naq chunchukebʼ chi waʼak saʼ meex, li Jesús kixye rehebʼ: «Relik chi yaal ninye eere naq jun eere li yook chi waʼak wikʼin, tqʼaxtesinq we».
19 Kʼajoʼ naq xeʼrahoʼk xchʼool, ut chixjunqalebʼ xeʼok xyeebʼal: «Peʼyaal naq moko laaʼin ta?».
20 Aʼan kixye rehebʼ: «Jun rehebʼ li Kabʼlaju, li naxchʼik li ruqʼ wochbʼeen saʼ li nimla sekʼ.
21 Li Ralal li Winq txik joʼ chanru kitzʼiibʼamank chaq chirix. Abʼan, ra tchalq saʼ xbʼeen li tqʼaxtesinq re li Ralal li Winq! Us raj choʼq re li winq aʼin naq inkʼaʼ raj kiyoʼlaak».
22 Toj yookebʼ ajwiʼ chi waʼak naq li Jesús kixchap jun li kaxlanwa, xtijok, kixjach, kixkʼe rehebʼ li xtzolom ut kixye rehebʼ: «Kʼulumaq, aʼin reetalil lintibʼel».
23 Ut kixchap jun li ukʼlebʼ sekʼ li wank bʼiin chisaʼ, kibʼanyoxink chiru li Yos, kixkʼe rehebʼ li xtzolom ut chixjunilebʼ xeʼrukʼ.
24 Ut kixye rehebʼ: «Aʼin reetalil linkikʼel, “li xkikʼel li sumwank”, li thoymanq saʼ xkʼabʼaʼ naabʼalebʼ li qas qiitzʼin.
25 Relik chi yaal ninye eere naq maajunwa chik twukʼ li bʼiin aʼin toj reetal naq twulaq li kutan naq twukʼ li akʼ bʼiin saʼ li Xʼawabʼejilal li Yos».
26 Chirix chik aʼan, naq ak xeʼxbʼicha li bʼich re xloqʼoninkil li Yos, xkohebʼ saʼ li tzuul Olivo.
27 Ut li Jesús kixye rehebʼ: «Cheejunilex tineekanabʼ* xbʼaan naq tzʼiibʼanbʼil: “Tinkamsi laj ilol karneer, ut ebʼ li karneer teʼchaʼchaʼiiq”.
28 Abʼan, naq ak xinwaklesiik chi yoʼyo, tinxik cheeru saʼ xbʼehil Galilea».
29 Laj Pedro kixye re: «Usta chixjunilebʼ tateʼxkanabʼ* laaʼin inkʼaʼ tinbʼaanu».
30 Tojaʼ naq li Jesús kixye re: «Relik chi yaal ninye aawe naq hoon ajwiʼ, chiru li qʼoqyink aʼin, toj maajiʼ ajwiʼ nayaabʼak wiibʼ sut li tzoʼ kaxlan ak xaaye oxibʼ sut naq inkʼaʼ nakaanaw wu».
31 Abʼan laj Pedro inkʼaʼ naxkanabʼ xyeebʼal: «Usta tinkamq aawochbʼeen maajunwa tinye naq inkʼaʼ ninnaw aawu». Ut joʼkan ajwiʼ xeʼok xyeebʼal chixjunilebʼ li xtzolom.
32 Tojaʼ naq xeʼwulak saʼ jun li naʼaj li naxkʼabʼaʼi Getsemaní ut kixye rehebʼ li xtzolom: «Kanaqex arin chi chunchu ut laaʼin xik we leʼ chi tijok».
33 Ut kixkʼam chirix laj Pedro, laj Santiago ut laj Juan, ut kiʼok chi rahoʼk xchʼool ut qʼaxal yook xkʼaʼuxl.
34 Li Jesús kixye rehebʼ: «Qʼaxal yook inkʼaʼuxl, nawekʼa naq kamk we. Kanaqex arin ut yoʼlenqex».
35 Chirix chik aʼan, kinajtoʼk rikʼinebʼ, kixwiqʼibʼ ribʼ chiru chʼochʼ ut kiʼok xtzʼaamankil saʼ li xtij, wi naruhank, inkʼaʼ tchalq saʼ xbʼeen li hoonal li qʼaxal chʼaʼaj.
36 Naxye: «Abba,* at Inyuwaʼ, chixjunil naruhank chaawu, isi chiwu li ukʼlebʼ sekʼ aʼin. Abʼan mibʼaanumank li nawaj laaʼin, chibʼaanumanq bʼan li nakaawaj laaʼat».
37 Tojaʼ naq kisutqʼiik bʼarwiʼ wankebʼ li xtzolom ut kixtawebʼ chi wark. Ut kixpatzʼ re laj Pedro: «Simón, kʼaʼut xatwark? Ma inkʼaʼ xatruuk chi yoʼlek jun hooraq?
38 Meekanabʼ yoʼlek ut meekanabʼ tijok re naq inkʼaʼ textʼaneʼq saʼ li aaleek. Laaʼin ninnaw naq li winq naraj xbʼaanunkil li us, abʼan li xtibʼel* maare maakʼaʼ xmetzʼew re xbʼaanunkil».
39 Tojaʼ naq xkoho wiʼ chik chi tijok ut kixye ebʼ li aatin li kixye chaq rubʼelaj.
40 Kisutqʼiik wiʼ chik ut kixtawebʼ chi wark xbʼaan naq inkʼaʼ chik nekeʼxkuy xwara. Ut ebʼ aʼan inkʼaʼ chik nekeʼxnaw kʼaru teʼxye re.
41 Ut kiwulak rox sut ut kixye rehebʼ: «Aʼin maawaʼ xhoonalil re naq texwarq ut re naq texhilanq! Kanabʼomaq wark! Ak xnachʼok chaq xhoonalil! Kʼehomaq reetal, li Ralal li Winq tqʼaxtesiiq saʼ ruqʼebʼ laj maak.
42 Waklinqex ut yoʼqebʼ. Kʼehomaq reetal, weʼ chaq li tqʼaxtesinq we».
43 Saʼ li hoonal ajwiʼ aʼan, naq toj yook chi aatinak li Jesús, kiwulak laj Judas, jun rehebʼ li Kabʼlaju. Ut rochbʼeen aʼan kichalk li kʼiila tenamit li wank xchʼiichʼ ut xcheʼ. Ebʼ aʼin taqlanbʼilebʼ xbʼaanebʼ li xbʼeenil aj tij, ebʼ laj tzʼiibʼ ut ebʼ li cheekel winq.
44 Joʼkan bʼiʼ, li tqʼaxtesinq re kixkʼe rehebʼ li eetalil aʼin: «Aʼ li tintzʼubʼ ru, aʼan li teechap, teekʼam ut teeril chiʼus re naq inkʼaʼ t-eleliq».
45 Joʼkan naq tiik xkoho rikʼin, kijilok chixkʼatq ut kixye re: «At Kʼutunel?»,* ut kixtzʼubʼ ru.
46 Tojaʼ naq xeʼxchap li Jesús ut xeʼxkʼam.
47 Abʼan jun rehebʼ li winq li wank aran kixkʼe chi chʼiichʼ li xmoos li xyuwaʼil aj tij ut kixchʼot li xxik.
48 Joʼkan bʼiʼ, li Jesús kixye rehebʼ: «Ma xexchalk chinchapbʼal rikʼin chʼiichʼ ut cheʼ chanchan tawiʼ laaʼin aj elqʼ?
49 Wulaj wulaj xinkʼutuk saʼ rochoch li Yos ut laaʼex inkʼaʼ xineechap. Abʼan aʼin kikʼulmank re naq ttzʼaqloq ru li Raatin li Yos».
50 Ut chixjunilebʼ xeʼxkanabʼ xjunes ut xeʼelelik.
51 Abʼan, jun li saaj al li wank chirix jun ajwiʼ li tʼikr re liin li terto xtzʼaq, kiʼok xtaqenkil. Xeʼxyal xchapbʼal,
52 abʼan kixkanabʼ li xtʼikr re liin saʼ ruqʼebʼ ut kiʼelelik chi tʼustʼu.*
53 Tojaʼ naq xeʼxkʼam li Jesús rikʼin li xyuwaʼil aj tij ut chixjunilebʼ li xbʼeenil aj tij, ebʼ li cheekel winq ut ebʼ laj tzʼiibʼ xeʼxchʼutubʼ ribʼ.
54 Laj Pedro chi najt kiʼok xtaqenkil li Jesús toj reetal kiwulak saʼ xnebʼaal li rochoch li xyuwaʼil laj tij, kixchunubʼ ribʼ aran chi qʼixink saʼ xyanqebʼ li moos.
55 Ebʼ li xbʼeenil aj tij ut chixjunilebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy yookebʼ xsikʼbʼal ani tyoobʼanq tikʼtiʼ chirix li Jesús re naq tkamsiiq, abʼan maaʼani xeʼxtaw.
56 Ut naabʼalebʼ xeʼwulak chi yoobʼank aatin chirix, abʼan li xyeehomebʼ moko kixchap ta ribʼ.
57 Wankebʼ ajwiʼ xeʼxaqliik ut xeʼok xyoobʼankil tikʼtiʼ chirix:
58 «Xqabʼi chi xyeebʼal: “Laaʼin tinjukʼ li rochoch li Yos li yiibʼanbʼil xbʼaan winq ut chiru oxibʼ kutan tinwaklesi jun chik li moko yiibʼanbʼil ta xbʼaan winq”».
59 Abʼan chi moko rikʼin aʼin kixchap ribʼ li xyeehomebʼ.
60 Tojaʼ naq li xyuwaʼil aj tij kixaqli, kixkʼe ribʼ saʼ xyiihebʼ ut kixpatzʼ re li Jesús: «Ma inkʼaʼ tatchaqʼoq? Ma inkʼaʼ nakaawabʼi li nekeʼxye chaawix?».
61 Abʼan li Jesús maakʼaʼ kixye, inkʼaʼ kichaqʼok. Li xyuwaʼil aj tij kiʼok wiʼ chik xpatzʼbʼal re: «Ma laaʼat li Kriist, li Ralal li Oxloqʼinbʼil Yos?».
62 Li Jesús kixye re: «Laaʼin. Ut laaʼex teeril li Ralal li Winq kʼojkʼo saʼ xnim ruqʼ li Nimajwal Yos ut yooq chaq chi chalk saʼ xbʼeen li choql saʼ choxa».
63 Naq kirabʼi aʼin, li xyuwaʼil aj tij kixqʼich li xtʼikr ut kixye: «Maakʼaʼ chik ajʼe naq teʼchalq jalan chik ebʼ li testiiw.
64 Laaʼex ajwiʼ xeerabʼi naq inkʼaʼ kiroxloqʼi li Yos. Kʼaru nekeekʼoxla chirix aʼin?». Chixjunilebʼ xeʼxye naq xkʼulubʼ naq tkamsiiq.
65 Ut wankebʼ xeʼok xchuubʼankil, xeʼxtzʼap li xnaqʼ ru, xeʼxkʼe chi ruqʼ ut xeʼxye re: «Wi laaʼat propeet, ye qe ani xsakʼok aawe». Ut naq ak xeʼxtzʼaj chi ruqʼ, ebʼ laj kʼaakʼalenel re li raqlebʼaal xeʼxkʼam.
66 Laj Pedro chunchu taqʼa saʼ li nebʼaal naq kiwulak jun li ixq xmoos li xyuwaʼil aj tij.
67 Naq kiril laj Pedro chi qʼixink chire li xaml, kikanaak xkaʼyankil ut kixye re: «Laaʼat ajwiʼ yookat chaq chirix li Jesús, aj Nazaret!».
68 Aʼut aʼan inkʼaʼ kixkʼulubʼa, ut kixye: «Inkʼaʼ ninnaw ru chi moko nintaw ru li nakaaye». Tojaʼ naq kiʼelk saʼ li okebʼaal.
69 Abʼan kiʼileʼk xbʼaan li moos ixq ut kixye wiʼ chik rehebʼ li wankebʼ aran: «Li winq aʼin jun rehebʼ aʼan».
70 Ut inkʼaʼ naxkanabʼ xyeebʼal naq inkʼaʼ naxnaw ru. Moqon chik, li wankebʼ aran xeʼxye wiʼ chik re laj Pedro: «Relik chi yaal naq laaʼat ajwiʼ jun rehebʼ aʼan xbʼaan naq laaʼat aj Galilea».
71 Tojaʼ naq, laj Pedro kiʼok xyeebʼal naq ra tixkʼul wi inkʼaʼ naxye li yaal ut kiʼok xpatzʼbʼal xkʼabʼaʼ li Yos, tojaʼ naq kixye: «Laaʼin inkʼaʼ ninnaw ru li winq li yookex wiʼ chi aatinak!».
72 Saʼ junpaat kiyaabʼak xkabʼ sut li tzoʼ kaxlan, ut laj Pedro kijultikoʼk re li kiyeeheʼk re xbʼaan li Jesús: «Toj maajiʼ ajwiʼ nayaabʼak xkabʼ sut li tzoʼ kaxlan ak xaaye oxibʼ sut naq inkʼaʼ nakaanaw wu». Kiʼok chi yaabʼak xbʼaan xrahil xchʼool.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Malaj «tixmululi ribʼ».
^ Malaj «chunchu saʼ meex».
^ Saʼ griego «meet re alabastro». Aʼin jun li chʼina meet li yiibʼanbʼil rikʼin pek li natawmank chixkʼatq Alabastrón, Ejiipt.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Malaj «xeʼxchʼiila».
^ Li tumin aʼin yiibʼanbʼil rikʼin chʼiichʼ, plaat xkʼabʼaʼ.
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Malaj «textichkʼoq».
^ Malaj «teʼtichkʼoq».
^ Aʼin jun li aatin saʼ hebreo malaj arameo li naraj xyeebʼal “at inyuwaʼ”. Ebʼ li kokʼal nekeʼroksi li aatin aʼin naq nekeʼaatinak rikʼin li xyuwaʼ.
^ Arin yook chi aatinak chirix li xwanjik li winq aj maak li moko tzʼaqal ta re ru li xyuʼam.
^ Saʼ griego «Rabí».
^ Li aatin saʼ griego, gymnós naraj ajwiʼ xyeebʼal naq moko naabʼal ta li tʼirk wank chirix malaj kaʼajwiʼ li xchʼina tʼikr.
^ Malaj «saʼ li Sanedrín».
