Marcos 15:1-47
15 Tojaʼ ajwiʼ kisaqewk, naq chixjunilebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy (ebʼ li xbʼeenil aj tij, ebʼ li cheekel winq ut ebʼ laj tzʼiibʼ), xeʼxchʼutubʼ ribʼ re rilbʼal kʼaru teʼxbʼaanu; ut naq ak xeʼxbʼakʼ li Jesús, xeʼxkʼam ut xeʼxqʼaxtesi saʼ ruqʼ laj Pilaat.
2 Ut laj Pilaat kixpatzʼ re: «Ma laaʼat li awabʼej rehebʼ laj judiiy?». Kichaqʼok li Jesús ut kixye: «Heeheʼ, laaʼat yookat xyeebʼal».
3 Abʼan ebʼ li xbʼeenil aj tij xeʼok xqʼabʼankil chi xbʼaanunkil naabʼal li naʼlebʼ.
4 Tojaʼ naq laj Pilaat kiʼok wiʼ chik xpatzʼinkil re: «Ma maakʼaʼ taaye? Ma inkʼaʼ nakaawabʼi chixjunil li yookebʼ wiʼ aaqʼabʼankil?».
5 Abʼan li Jesús inkʼaʼ chik kixsume ut laj Pilaat kisach xchʼool xbʼaan aʼin.
6 Joʼkan bʼiʼ, rajlal naq nawank li ninqʼe, laj Pilaat narisi saʼ tzʼalam junaq laj preex li nekeʼraj ebʼ li qas qiitzʼin.
7 Chiruhebʼ li kutan aʼan wank chaq jun li winq li nakʼabʼaʼiik Barrabás. Aʼan ut wiibʼ oxibʼ chik xeʼkʼeheʼk saʼ tzʼalam xbʼaan naq xeʼkamsink ut xeʼxqʼet ribʼ chiru li awabʼejilal.
8 Joʼkan naq ebʼ li qas qiitzʼin xeʼnachʼok ut xeʼok xtzʼaamankil re laj Pilaat naq tixbʼaanu li naxbʼaanu chaq chi rajlal choʼq rehebʼ.
9 Aʼan kixye rehebʼ: «Ma nekeeraj naq tinkanabʼ chi xik li awabʼej rehebʼ laj judiiy?».
10 Abʼan laj Pilaat naxkʼe reetal naq ebʼ li xbʼeenil aj tij xeʼxqʼaxtesi xbʼaan xkaqalebʼ xchʼool.
11 Aʼut ebʼ li xbʼeenil aj tij xeʼxtakchiʼi li tenamit chi xyeebʼal naq teʼrisi saʼ tzʼalam laj Barrabás.
12 Laj Pilaat kiraatina wiʼ chik ebʼ li qas qiitzʼin ut kixye rehebʼ: «Kʼaru tinbʼaanu rikʼin li winq aʼin li nekeekʼabʼaʼi awabʼej rehebʼ laj judiiy?».
13 Ebʼ aʼan xeʼxjap wiʼ chik re ut xeʼxye: «Tʼuyubʼamaq chiru cheʼ».
14 Laj Pilaat kixye rehebʼ: «Abʼan kʼaʼut? Kʼaru xmaakoni?». Aʼut qʼaxal kaw wiʼ chik xeʼok xjapbʼal rehebʼ: «Tʼuyubʼamaq chiru cheʼ!».
15 Joʼkan bʼiʼ, saʼ xkʼabʼaʼ naq laj Pilaat kiraj xsahobʼresinkil xchʼool ebʼ li qas qiitzʼin, kixkanabʼ chi xik laj Barrabás. Chirix chik aʼan kixbʼaanu naq tkʼeheʼq chi tzʼuum* li Jesús, tojaʼ naq kixqʼaxtesi re naq ttʼuyubʼaaq chiru cheʼ.
16 Tojaʼ naq ebʼ laj puubʼ xeʼxkʼam li Jesús chiru li nebʼaal, li wank chisaʼ li rochoch li ruuchil awabʼej, ut xeʼchʼutubʼaak ebʼ laj puubʼ.
17 Xeʼxkʼe chirix jun li tʼikr kaq moyink ut xeʼxtzʼul jun li koroon re kʼix ut xeʼxkʼe saʼ xjolom.
18 Ut xeʼok xyeebʼal chi kaw: «At awabʼej rehebʼ laj judiiy naqakʼe xsahil aachʼool!».
19 Joʼkan ajwiʼ, yookebʼ xsakʼbʼal xjolom rikʼin cheʼ, yookebʼ xchuubʼankil ut nekeʼxwiqʼibʼ ribʼ chiru.
20 Chirix chik aʼan, naq xeʼraqeʼk xseʼenkil, xeʼrisi chirix li tʼikr kaq moyink ut xeʼxkʼe wiʼ chik li xtʼikr. Tojaʼ naq xeʼxkʼam chirix kabʼl re xtʼuyubʼankil chiru cheʼ.
21 Yook chi numeʼk aran jun li winq, li yook chi chalk saʼ kʼalebʼaal, xeʼxmin ru chi xpaqonkil li cheʼ.* Li winq aʼin aʼan laj Simón re Cirene ut aʼan xyuwaʼ laj Alejandro ut laj Rufo.
22 Ut xeʼxkʼam li Jesús saʼ jun li naʼaj li naxkʼabʼaʼi Gólgota, chi jalbʼil ru naraj xyeebʼal «xnaʼaj xjolom li kamenaq».
23 Aran xeʼxyal xkʼebʼal re li Jesús li bʼiin li yukʼinbʼil rikʼin jun li bʼan* li naxkotz li rahilal, abʼan aʼan inkʼaʼ kirukʼ.
24 Ut xeʼxklawxi chiru cheʼ ut xeʼok xbʼuulinkil rix* li xtʼikr re xnawbʼal bʼar wank ttzʼaq li junjunq.
25 Naq kachʼin chik ma bʼeleebʼ hoonal re eqʼla, xeʼxklawxi chiru cheʼ.
26 Chiru li cheʼ tzʼiibʼanbʼil xyaalal kʼaʼut kitenebʼaak kamk saʼ xbʼeen. Li tzʼiibʼ naxye: «Li awabʼej rehebʼ laj judiiy».
27 Joʼkan ajwiʼ, chixkʼatq li Jesús xeʼxtʼuyubʼ chiru cheʼ wiibʼ laj elqʼ, jun saʼ xnim ut jun saʼ xtzʼe.
28 *
29 Ut li nekeʼnumeʼk aran yookebʼ xhobʼal li Jesús ut yookebʼ rekʼasinkil xjolom ut nekeʼxye re: «Ah! Laaʼat, li xaajukʼ raj li rochoch li Yos ut xaayiibʼ raj wiʼ chik chiru oxibʼ kutan,
30 kubʼen chaq chiru li cheʼ* ut kol aawibʼ».
31 Ebʼ li xbʼeenil aj tij rochbʼeenebʼ laj tzʼiibʼ xeʼok ajwiʼ xseʼenkil. Tojaʼ naq xeʼxye chiribʼilebʼ ribʼ: «Kixkolebʼ li junchʼol, abʼan aʼan inkʼaʼ naru xkolbʼal ribʼ!
32 Li Kriist, li awabʼej re Israel, chikubʼeeq anaqwan ajwiʼ chiru li cheʼ.* Naq tqil aʼin, toopaabʼanq chiru». Joʼkan ajwiʼ li wankebʼ chixkʼatq chiru cheʼ, xeʼok ajwiʼ xhobʼal.
33 Naq kachʼin chik ma tuqtu waʼlebʼ, kiqʼoqyinoʼk saʼ chixjunil li teep ut kikutanoʼk naq kachʼin chik ma oxibʼ hoor re ewu.
34 Ut naq kachʼin chik ma oxibʼ hoor re ewu, li Jesús kixjap re chi kaw ut kixye: «Éli, Éli, láma sabakhtháni?», aʼin naraj xyeebʼal: «At Inyos, at Inyos, kʼaʼut xinaakanabʼ injunes?».
35 Naq xeʼrabʼi aʼin, wiibʼ oxibʼ li wankebʼ chi nachʼ xeʼok xyeebʼal: «Abʼihomaq, yook xbʼoqbʼal laj Elías».
36 Tojaʼ naq jun rehebʼ xkoho saʼ aanil chi xtzʼabʼal jun li espoonj* saʼ li bʼiin li ra re, kixkʼe chiru li cheʼ ut kixjilosi chixkʼatq re naq trukʼ. Ut kixye: «Kanabʼomaq! Qilaq ma tchalq laj Elías chi xkubʼsinkil».
37 Aʼut li Jesús kixjap re chi kaw ut kikamk.
38 Ut li kortiin* li wank saʼ li santil naʼaj re li rochoch li Yos kiqʼicheʼk chalen taqeʼq toj taqʼa ut kiʼelk saʼ wiibʼ.
39 Joʼkan utan, li winq li nataqlank rehebʼ laj puubʼ,* li xaqxo chiru naq kikamk, kixye: «Chʼolchʼo tzʼaqal naq li winq aʼin Ralal li Yos». Li winq aʼin kiril chixjunil li kikʼulmank saʼ li hoonal aʼan.
40 Wank ajwiʼ aran wiibʼ oxibʼ li ixq li yookebʼ chaq chi ilok chi najt, saʼ xyanqebʼ wank li xMaría Magdalena, li xSalomé ut li xMaría, xnaʼ laj Josés ut laj Santiago, li iitzʼinbʼej.*
41 Ebʼ li ixq aʼin xeʼxtaqe ut xeʼxchʼolani naq wank chaq Galilea. Wankebʼ ajwiʼ aran naabʼalebʼ li ixq li xeʼtaqeʼk rochbʼeen aran Jerusalén.
42 Saʼ xkʼabʼaʼ naq ak kiʼewuuk ut xkutankil li kawresink xbʼaan naq wulajaq li sábado,*
43 laj José re Arimatea kixkawubʼresi xchʼool, xkoho chi aatinak rikʼin laj Pilaat ut kixpatzʼ li xtibʼel li Jesús. Laj José aʼan jun rehebʼ li winq li oxloqʼinbʼil saʼ li Nimla Raqlebʼaal Aatin* ut yook ajwiʼ roybʼeninkil li Xʼawabʼejilal li Yos.
44 Abʼan laj Pilaat kiʼok xkʼoxlankil ma ak xkamk tawiʼ li Jesús, joʼkan naq kixtaqla xbʼoqbʼal li winq li nataqlank rehebʼ laj puubʼ* ut kixpatzʼ re.
45 Naq li winq li nataqlank rehebʼ laj puubʼ* kixye naq ak xkamk chik, laj Pilaat kixkʼe xleseens laj José re naq tixkʼam li kamenaq.
46 Laj José kixloqʼ jun li chaabʼil tʼikr re liin ut kixkubʼsi li Jesús. Chirix chik aʼan, kixbʼat ut kixkʼe saʼ li muqlebʼaal li hopbʼil saʼ pek; tojaʼ naq kixtolkʼosi jun li pek chire li muqlebʼaal.
47 Abʼan li xMaría Magdalena ut li xMaría, xnaʼ laj Josés, xeʼkanaak rilbʼal li naʼaj bʼarwiʼ xeʼxkʼe.
Xtzʼaqobʼ ebʼ li naʼlebʼ
^ Malaj «saʼ li Sanedrín».
^ Taawil xchʼolobʼankil li aatin, kʼehok chi tzʼuum.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Malaj «li miir». Taawil xchʼolobʼankil li aatin, miir.
^ Taawil xchʼolobʼankil li aatin, bʼuulink.
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Li espoonj aʼin chanchan li mach palaw malaj li estropajo li naxtzʼubʼ li haʼ.
^ Aʼin jun li pimil tʼikr li naxjach li Santil Naʼaj rikʼin li Qʼaxal Saant li wank saʼ rochoch li Yos.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Malaj «li kachʼin roq».
^ Taawil xchʼolobʼankil li aatin, sábado.
^ Malaj «saʼ li Sanedrín».
^ Li winq aʼin xaqabʼanbʼil re xtaqlankil jun siʼeent aj puubʼ.
^ Li winq aʼin xaqabʼanbʼil re xtaqlankil jun siʼeent aj puubʼ.
