Marcos 5:1-43
5 Tojaʼ naq xeʼwulak junpakʼal li palaw saʼ xteepalebʼ laj Gerasa.
2 Toj yook ajwiʼ chi kubʼeek li Jesús saʼ li jukubʼ* naq jun li winq li echaninbʼil xbʼaan li maaʼus aj musiqʼej kiʼelk chaq chi xkʼulbʼal. Li winq aʼin kiʼelk chaq saʼ xyanq li muqlebʼaal kamenaq.
3 Aran nakanaak, ut toj saʼ li kutan aʼan maaʼani naruhank chaq xchapbʼal chi moko xbʼakʼbʼal chi kareen.
4 Naabʼal sut xeʼxbʼakʼ chi kareen li roq ut li ruqʼ, abʼan junelik kixtʼupi li kareen. Maaʼani kiwank xmetzʼew re xchapbʼal chi kaw.
5 Chi qʼeq ut chi kutan naxbʼeni ribʼ saʼebʼ li muqlebʼaal kamenaq, naxjap re saʼebʼ li tzuul ut naxyokʼi ribʼ rikʼin pek.
6 Naq li winq kiril li Jesús chi najt, xkoho saʼ aanil ut kixwiqʼibʼ ribʼ chiru.
7 Tojaʼ naq kixjap re chi kaw ut kixye: «Kʼaru wilom aawikʼin, Jesús, Ralal li Nimajwal Yos? Patzʼ xkʼabʼaʼ li Yos naq inkʼaʼ tinaarahobʼtesi?».
8 Ut kixjap re chi joʼkaʼin xbʼaan naq li Jesús ak yook chaq xyeebʼal re: «At maaʼus aj musiqʼej, elen rikʼin li winq».
9 Tojaʼ naq li Jesús kixpatzʼ re: «Ani laakʼabʼaʼ?». Li maaʼus aj musiqʼej kichaqʼok ut kixye: «Legión* linkʼabʼaʼ xbʼaan naq naabʼalo».
10 Ut yook xtzʼaamankil re li Jesús naq inkʼaʼ teʼisiiq saʼ li teep.
11 Joʼkan bʼiʼ, aran wank jun chʼuut li aaq* li yookebʼ chi waʼak chiru tzuul.
12 Joʼkan naq, ebʼ li maaʼus aj musiqʼej xeʼxtzʼaama re: «Taqlaho chi ok rikʼinebʼ li aaq».*
13 Ut li Jesús kixkanabʼebʼ chi xik rikʼinebʼ. Joʼkan naq, ebʼ li maaʼus aj musiqʼej, xeʼelk rikʼin li winq ut xeʼok rikʼinebʼ li aaq.* Ut li chʼuut chi aaq* li wank saʼ li tzuul kixkut ribʼ saʼ xteram li uul ut jun tʼanikebʼ saʼ li palaw. Wiibʼ mil tana chixjunilebʼ li aaq,* ut chixjunilebʼ xeʼkamk saʼ li palaw.
14 Abʼan ebʼ laj ilol aaq,* xeʼelelik ut xeʼxkʼe chaq resil saʼ li tenamit ut saʼebʼ li kʼalebʼaal. Joʼkan naq, ebʼ li qas qiitzʼin xkohebʼ rilbʼal li kikʼulmank.
15 Naq xeʼwulak bʼarwiʼ wank li Jesús, xeʼril ru li winq li echaninbʼil chaq xbʼaan naabʼal mil* chi maaʼus aj musiqʼej. Aran xeʼxtaw chi chunchu, tiqto ut tuqtu chik xkʼaʼuxl, ut kʼajoʼ xeʼxuwak xbʼaan.
16 Li xeʼilok re li kixkʼul li winq li echaninbʼil xbʼaanebʼ li maaʼus aj musiqʼej ut li xeʼxkʼul ebʼ li aaq* xeʼxchʼolobʼ chiruhebʼ li qas qiitzʼin chanru kikʼulmank chixjunil.
17 Joʼkan naq ebʼ li qas qiitzʼin xeʼok xtzʼaamankil re li Jesús naq t-elq saʼ li teep.
18 Joʼkan bʼiʼ, naq li Jesús yook chi taqeʼk saʼ li jukubʼ,* li winq li echaninbʼil xbʼaanebʼ li maaʼus aj musiqʼej kixtzʼaama re li Jesús naq naraj xik chirix.
19 Abʼan li Jesús inkʼaʼ kixkʼulubʼa chiru, kixye bʼan re: «Ayu saʼ laawochoch. Sutqʼin rikʼinebʼ laakomon ut seeraqʼi rehebʼ li kixbʼaanu li Jehobʼa* saʼ aakʼabʼaʼ ut chanru kixtoqʼobʼa aawu».*
20 Xkoho li winq ut kiʼok xyeebʼal resil saʼ xweent Decápolis* chixjunil li kixbʼaanu li Jesús chirix ut sachsokebʼ xchʼool nekeʼkanaak chixjunilebʼ.
21 Li Jesús kisutqʼiik saʼ li jukubʼ* junpakʼal li palaw. Ut toj wank ajwiʼ chire li palaw, naq kisuteʼk xbʼaan li kʼiila tenamit.
22 Tojaʼ naq kichalk jun rehebʼ li najolomink re li naʼaj bʼarwiʼ nekeʼloqʼonink ebʼ laj judiiy, aj Jairo xkʼabʼaʼ. Naq kiril ru li Jesús kixkut ribʼ chi roq
23 ut kiʼok chi elajink chiru: «Linrabʼin yook chi kamk. Kim, bʼaanu usilal, ut kʼe laawuqʼ saʼ xbʼeen re naq tkʼiraaq ut inkʼaʼ tkamq».
24 Saʼ junpaat xkoho li Jesús chirix laj Jairo. Naabʼal li qas qiitzʼin yook chirix ut yookebʼ xpitzʼinkil.
25 Joʼkan ajwiʼ, aran wank jun li ixq li nakubʼeek xkikʼel, kabʼlaju chihabʼ rokik chi xkʼulbʼal aʼin.
26 Kiwulak rikʼin naabʼal aj bʼanonel li yal xeʼxrahobʼtesi.* Kixsach chixjunil li xtumin abʼan inkʼaʼ kikʼiraak, kinimank bʼan xyajel.
27 Saʼ xkʼabʼaʼ naq kirabʼi li yook chi yeemank chirix li Jesús, kixchʼik ribʼ saʼ xyanq ebʼ li qas qiitzʼin, kijilok chirix ut kixchʼeʼ li xtʼikr,
28 xbʼaan naq yook xyeebʼal: «Yal rikʼin xchʼeʼbʼal li xtʼikr tinkʼiraaq».
29 Saʼ junpaat kitzʼap li xkikʼel ut kirekʼa naq kikʼiraak. Li yajel li narahobʼtesink chaq re kiʼelk.
30 Saʼ junpaat, li Jesús kirekʼa naq kiʼelk li wankil rikʼin. Tojaʼ naq kixbʼalqʼusi ribʼ ut kixpatzʼ rehebʼ li qas qiitzʼin: «Ani xchʼeʼok re lintʼikr?».
31 Aʼut ebʼ li xtzolom xeʼxye re: «Nakaawil naq li kʼiila tenamit yook aapitzʼinkil... ut nakaapatzʼ ani xchʼeʼok we?».
32 Usta yaal aʼin, inkʼaʼ naxkanabʼ ilok saʼ xsutam re rilbʼal ani xchʼeʼok re.
33 Li ixq, li naxnaw li yook chi kʼulmank, nasiksotk xbʼaan xxiw. Tojaʼ naq kijilok chixkʼatq, kixkut ribʼ chi roq ut kixye re li kixbʼaanu.
34 Li Jesús kixye re: «At inrabʼin, xatkʼiraak xbʼaan naq nakaapaabʼ naq li Yos tatxtenqʼa. Ayu ut matkʼoxlak chik. Xatkʼiraak ut inkʼaʼ chik taawekʼa li rahilal aʼin».
35 Toj yook ajwiʼ chi aatinak li Jesús, naq xeʼchalk wiibʼ oxibʼ li wankebʼ saʼ rochoch laj Jairo ut xeʼxye re: «Ak xkamk laarabʼin. Kʼaʼ chik ajʼe naq taachʼiʼchʼiʼi laj Kʼutunel».
36 Abʼan, saʼ xkʼabʼaʼ naq li Jesús kirabʼi li yookebʼ xyeebʼal, kixye re laj Jairo: «Matxuwak, paabʼ naq li Yos tatxtenqʼa».
37 Maaʼani chik kixkʼam chirix, kaʼajwiʼ laj Pedro, laj Santiago ut laj Juan, li riitzʼinebʼ ribʼ.
38 Naq xeʼwulak saʼ rochoch laj Jairo, li Jesús kiril naq ebʼ li qas qiitzʼin yookebʼ xpoqoqinkil ribʼ,* yookebʼ chi yaabʼak ut xjapbʼal rehebʼ.
39 Joʼkan bʼiʼ, naq xʼok saʼ ochoch, kixye rehebʼ: «Kʼaʼut nekexyaabʼak ut nekeepoqoqi eeribʼ?* Li chʼina ixqaʼal moko kamenaq ta yal yook chi wark».
40 Naq xeʼrabʼi aʼin, xeʼxjap re chi xseʼenkil. Abʼan, naq ak kirisi chixjunilebʼ chirix kabʼl, li Jesús kiʼok bʼarwiʼ wank li chʼina ixqaʼal rochbʼeen ebʼ li xtzolom li yookebʼ chaq chirix joʼ ajwiʼ li xnaʼ xyuwaʼ li chʼina ixqaʼal.
41 Tojaʼ naq, kixchap chi ruqʼ li chʼina ixqaʼal ut kixye: «Tálitha cúmi», chi jalbʼil ru naraj xyeebʼal «at chʼina ixqaʼal, aawe ninye: waklin!».
42 Saʼ junpaat kiwakliik li chʼina ixqaʼal li wank kabʼlaju chihabʼ re ut kiʼok chi bʼeek. Sachsokebʼ xchʼool xeʼkanaak naq xeʼril aʼin ut numtajenaq wiʼ chik xsahilebʼ xchʼool.
43 Abʼan li Jesús kixye rehebʼ chi chʼolchʼo ru naq maaʼani ajʼe teʼxseeraqʼi. Kixye ajwiʼ rehebʼ naq teʼxkʼe chi waʼak li chʼina ixqaʼal.
Xtzʼaqobʼ ebʼ li naʼlebʼ
^ Malaj «li kayuuk».
^ Taawil xchʼolobʼankil li aatin, legión.
^ Malaj «li kuy».
^ Malaj «rikʼinebʼ li kuy».
^ Malaj «rikʼinebʼ li kuy».
^ Malaj «chi kuy».
^ Malaj «li kuy».
^ Malaj «kuy».
^ Saʼ griego «Legión». Taawil xchʼolobʼankil li aatin, legión.
^ Malaj «ebʼ li kuy».
^ Malaj «li kayuuk».
^ Taawil xchʼolobʼankil li aatin, Jehobʼa.
^ Malaj «kiruxtaana aawu».
^ Malaj «saʼ li teep bʼarwiʼ wank lajeebʼ chi tenamit».
^ Malaj «li kayuuk».
^ Malaj «xeʼxkʼe chi xnumsinkil naabʼal li rahilal».
^ Malaj «xmululinkil ribʼ».
^ Malaj «nekeemululi eeribʼ».
