Mateo 23:1-39
23 Tojaʼ naq li Jesús kiraatina li kʼiila tenamit ut ebʼ li xtzolom. Kixye rehebʼ:
2 «Ebʼ laj tzʼiibʼ ut ebʼ laj pariseey xeʼxxaqabʼ ribʼ chi xbʼaanunkil li kʼanjel li kixbʼaanu chaq laj Moisés.
3 Joʼkan naq, bʼaanumaq chixjunil li teʼxye eere, abʼan meebʼaanu li nekeʼxbʼaanu ebʼ aʼan xbʼaan naq ebʼ aʼan inkʼaʼ nekeʼxbʼaanu li nekeʼxye.
4 Qʼaxal aal li iiq li nekeʼxtuubʼ saʼ xbʼeenebʼ li qas qiitzʼin, aʼut aʼanebʼ inkʼaʼ nekeʼraj rekʼasinkil rikʼin ruʼuj ruqʼ.
5 Chixjunil li nekeʼxbʼaanu, nekeʼxbʼaanu yal re naq teʼileʼq. Nekeʼxnimtresi li kokʼ kaax* li nekeʼxkʼe chi xpeekem ut li nekeʼxkʼe chiru xtzʼe uqʼ. Ut nekeʼxtiq roq li xtʼikrebʼ.
6 Naq nawank jun li nimla waʼak nekeʼwulak chiru chunlaak saʼebʼ li naʼaj li wankebʼ xwankil ut saʼebʼ li naʼaj re loqʼonink nekeʼchunlaak toj chiru,
7 ut nekeʼwulak ajwiʼ chiru naq teʼkʼeheʼq xsahilebʼ xchʼool saʼebʼ li kʼayil ut teʼkʼabʼaʼiiq kʼutunel.*
8 Abʼan laaʼex meekʼulubʼa naq texkʼabʼaʼiiq kʼutunel xbʼaan naq jun ajwiʼ laj Kʼutunel, ut laaʼex ras eeriitzʼin eeribʼ.
9 Joʼkan ajwiʼ, maaʼani teekʼabʼaʼi yuwaʼ saʼ ruuchichʼochʼ xbʼaan naq jun ajwiʼ Leeyuwaʼ aʼ li wank saʼ choxa.
10 Chi moko teekanabʼ naq texkʼabʼaʼiiq aj kʼamolbʼe xbʼaan naq jun ajwiʼ laj Kʼamol Eebʼe aʼ li Kriist.
11 Li qʼaxal nim bʼan saʼ eeyanq chikʼanjelaq chiruhebʼ li junchʼol.
12 Li naxnima ribʼ tkubʼsiiq xwankil, abʼan li naxkubʼsi ribʼ tnimaaq ru.
13 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u xbʼaan naq nekeeram chiruhebʼ li qas qiitzʼin ok saʼ li Xʼawabʼejilal li choxa. Chi moko laaʼex nekeexʼok chi moko nekeekanabʼebʼ chi ok li yookebʼ xyalbʼal xqʼe re ok.
14 *
15 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u xbʼaan naq nekeetoq ru li palaw ut nekexxik yalaq bʼar re xsikʼbʼal junaq li qas qiitzʼin li t-oq chi paabʼank saʼ xyanqebʼ laj judiiy. Ut naq ak xʼok chi paabʼank, nekeebʼaanu naq kaʼsut t-osoʼq chi junajwa* cheeru laaʼex.
16 »Ra tchalq saʼ eebʼeen, ex aj kʼamolbʼe li inkʼaʼ nekexʼilok! Xbʼaan naq nekeeye: “Wi junaq li qas qiitzʼin naxpatzʼ xkʼabʼaʼ li Yos naq naʼaatinak chirix rochoch li Yos, aʼin maakʼaʼ xyaalal. Abʼan, wi naxpatzʼ xkʼabʼaʼ li Yos naq naʼaatinak chirix li oor li wank saʼ rochoch li Yos, tento tixbʼaanu li kixye”.
17 Tik maakʼaʼ eenaʼlebʼ ut inkʼaʼ nekexʼilok! Abʼanan, kʼaru tzʼaqal wank xwankil? Ma li oor, malaj li rochoch li Yos li naxbʼaanu naq li oor oxloqʼaq ru?
18 Laaʼex nekeeye ajwiʼ: “Wi junaq li qas qiitzʼin naxpatzʼ xkʼabʼaʼ li Yos naq naʼaatinak chirix li xnaʼaj li mayej,* aʼin maakʼaʼ xyaalal. Abʼan, wi tixpatzʼ xkʼabʼaʼ li Yos naq t-aatinaq chirix li mayej li wank saʼ xbʼeen li naʼaj aʼin, tento tixbʼaanu li kixye”.
19 Mutzʼex tzʼaqal! Abʼanan, kʼaru tzʼaqal wank xwankil? Ma li mayej, malaj li xnaʼaj li mayej* li naxbʼaanu naq li mayej oxloqʼaq ru?
20 Joʼkan naq, li naxpatzʼ xkʼabʼaʼ li Yos naq naʼaatinak chirix li xnaʼaj li mayej* yook xpatzʼbʼal xkʼabʼaʼ li Yos chirix li naʼaj aʼin joʼ ajwiʼ chirix chixjunil li wank saʼ xbʼeen;
21 li naxpatzʼ xkʼabʼaʼ li Yos naq naʼaatinak chirix li rochoch li Yos yook xpatzʼbʼal xkʼabʼaʼ li Yos chirix li rochoch li Yos ut chirix li Yos li wank chisaʼ li ochoch aʼin,
22 ut li naxpatzʼ xkʼabʼaʼ li Yos naq naʼaatinak chirix li choxa yook xpatzʼbʼal xkʼabʼaʼ li Yos chirix li xkʼojaribʼaal li Yos ut chirix li kʼojkʼo saʼ xbʼeen.
23 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u xbʼaan naq nekeekʼe xlajeetqil li iskʼiʼij, li eneldo ut li comino, abʼanan xeekanabʼ xbʼaanunkil li wank tzʼaqal xwankil saʼ li Chaqʼrabʼ: inkʼaʼ nekeebʼaanu li tiikilal, inkʼaʼ nekexʼuxtaanank u* ut inkʼaʼ nekexpaabʼank. Tenebʼanbʼil chaq saʼ eebʼeen xkʼebʼal xlajeetqil li kʼaʼaq re ru abʼan xeekanabʼ xbʼaanunkil li wank tzʼaqal xwankil saʼ li Chaqʼrabʼ.
24 Ex aj kʼamolbʼe li inkʼaʼ nekexʼilok, nekeetzʼil li suq saʼ leerukʼaʼ abʼan nekeenuqʼ li kameey!*
25 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u! Chanchanex li ukʼlebʼ sekʼ ut li plaat li saabʼesinbʼil chirix ut kʼajoʼ xtzʼajnil chisaʼ xbʼaan naq inkʼaʼ nekeekanabʼ xrahinkil ru li inkʼaʼ us ut xbʼaanunkil li nekeerahi ru.
26 At aj pariseey li inkʼaʼ nakat-ilok, xbʼeenwa saabʼesi chisaʼ li ukʼlebʼ sekʼ ut chisaʼ li plaat re naq saabʼesinbʼilaq ajwiʼ chirix.
27 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u! Chanchanex li muqlebʼaal li bʼonbʼil chiʼus, chʼinaʼus nekeʼkʼutunk chirix, abʼan chisaʼ nujenaq chi bʼaq ut yalaq kʼaru chi tzʼaj.
28 Joʼkanex tzʼaqal laaʼex: chiruhebʼ li qas qiitzʼin chanchan tawiʼ tiik eechʼool, abʼan saʼ leechʼool nujenaq chi tikʼtiʼ ut chi maaʼusilal.
29 »Ra tchalq saʼ eebʼeen ex aj tzʼiibʼ ut ex aj pariseey! Laaʼex aj kaʼpakʼal u xbʼaan naq nekeeyiibʼ xmuqlebʼaal ebʼ li propeet ut nekeeruutzʼuʼuji ebʼ li xmuqlebʼaal ebʼ laj kʼanjel chiru li Yos
30 ut nekeeye: “Wi xoowank raj saʼ xkutankil li qaxeʼqatoon, inkʼaʼ raj xooʼokenk chirixebʼ chi xkamsinkilebʼ li propeet”.
31 Rikʼin aʼin nekeejit eeribʼ naq laaʼex ralal xkʼajol li xeʼkamsink re ebʼ li propeet.
32 Joʼkan naq, bʼaanumaq, choyomaq li kʼanjel li xeʼxtikibʼ chaq leexeʼtoonil yuwaʼ.
33 »Ex ral kʼantiʼ li wank eemay, chanru texkoleʼq chiru li raqbʼa aatin chirix li osoʼk chi junajwa?*
34 Joʼkan bʼiʼ, tintaqla eerikʼin ebʼ li propeet, ebʼ li wankebʼ xnaʼlebʼ ut ebʼ laj kʼutunel. Wankebʼ teʼkamsiiq ut teʼtʼuyubʼaaq chiru cheʼ ut wankebʼ chik teʼkʼeheʼq chi tzʼuum* saʼebʼ li naʼaj re loqʼonink ut teʼrahobʼtesiiq saʼ jalan jalanq chi tenamit.
35 Chi joʼkan teetoj rix li xkikʼel chixjunilebʼ li tiikebʼ xchʼool li kihoymank chiru chʼochʼ chalen chaq li xkikʼel laj Abel li tiik xchʼool toj rikʼin li xkikʼel laj Zacarías, ralal laj Baraquías, li xeekamsi chiru li rochoch li Yos chixkʼatq li xnaʼaj li mayej.*
36 Relik chi yaal ninye eere naq li tenamit li wank chiruhebʼ li kutan aʼin tento tixtoj rix li xmaak.
37 »Jerusalén, Jerusalén, li nakaakamsi ebʼ li propeet ut nakaakʼehebʼ chi pek li taqlanbʼilebʼ aawikʼin..., naabʼal sut xwaj xchʼutubʼankil ebʼ laawalal aakʼajol joʼ naq li kaxlan naxchʼutubʼebʼ li ral rubʼel li xxikʼ! Abʼan laaʼex inkʼaʼ xeeraj.
38 Kʼehomaq reetal! Li Yos tixtzʼeqtaana leerochoch ut saʼ eeruqʼ chik tkanaaq.
39 Relik chi yaal ninye eere naq chalen anaqwan inkʼaʼ chik teeril wu toj naq teeye “Osobʼtesinbʼil taxaq li nachalk saʼ xkʼabʼaʼ li Jehobʼa!”».*
Xtzʼaqobʼ ebʼ li naʼlebʼ
^ Chisaʼ li kokʼ kaax wank ebʼ li xtasalil li Raatin li Yos. Ebʼ li winq aj judiiy nekeʼroksi aʼin re xkolbʼalebʼ ribʼ chiru li maaʼusilal.
^ Saʼ griego «rabí».
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Saʼ griego «Gehena». Taawil xchʼolobʼankil li aatin, Gehena.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «nekextoqʼobʼank u».
^ Aʼin jun li nimla xul li wank xbʼuqʼulal rix.
^ Saʼ griego «Gehena». Taawil xchʼolobʼankil li aatin, Gehena.
^ Taawil xchʼolobʼankil li aatin, kʼehok chi tzʼuum.
^ Malaj «li altar». Taawil xchʼolobʼankil li aatin, xnaʼaj li mayej.
^ Taawil xchʼolobʼankil li aatin, Jehobʼa.
