Romanos 11:1-36
11 Joʼkan naq ninpatzʼ: ma kixtzʼeqtaana li Yos li xtenamit? Maajoqʼe bʼiʼan! Laaʼin ajwiʼ aj Israel, ralal xkʼajol laj Abrahán ut xteepal laj Benjamín.
2 Li Yos inkʼaʼ kixtzʼeqtaana li xtenamit, li kixsikʼ ru xbʼeenwa. Ma inkʼaʼ nekeenaw li naxye jun xraqal li Raatin li Yos chirix laj Elías naq naxjit li tenamit Israel chiru li Yos?
3 «At Jehobʼa* ak xeʼxkamsi ebʼ laapropeet, ak xeʼxjukʼi ebʼ li naʼaj bʼarwiʼ nokoomayejak chaawu.* Kaʼaj chik laaʼin xinkanaak ut anaqwan nekeʼraj inkamsinkil».
4 Abʼan, chanru kisumeek xbʼaan li Yos? «Toj wank wuqubʼ mil li winq chiwu li toj maajiʼ nekeʼxwiqʼibʼ ribʼ chiru laj Baal».
5 Chiruhebʼ li kutan ajwiʼ aʼin, wank jun chʼina chʼuut chi qas qiitzʼin li sikʼbʼilebʼ ru saʼ xkʼabʼaʼ li xnimal rusilal li Yos.
6 Abʼanan, wi sikʼbʼilebʼ ru xbʼaan xnimal rusilal li Yos, moko sikʼbʼilebʼ ta chik ru saʼ xkʼabʼaʼ li xbʼaanuhomebʼ. Wi joʼkan raj, li xnimal rusilal li Yos maawaʼ raj chik li xnimal rusilal li Yos.
7 Kʼaru tqaye chi joʼkanan? Li tenamit Israel inkʼaʼ kixtaw li yook xsikʼbʼal chi anchal xchʼool, abʼanan li sikʼbʼilebʼ ru xeʼxtaw. Ut ebʼ li junchʼol inkʼaʼ xeʼabʼink
8 joʼ chanru tzʼiibʼanbʼil: «Chalen junxil, li Yos kixbʼaanu naq inkʼaʼ ajʼooq li xkʼaʼuxebʼ chanchan tawiʼ kamenaqebʼ chi wark, kixbʼaanu naq ebʼ li xnaqʼ ru inkʼaʼ teʼiloq ut ebʼ li xxik inkʼaʼ teʼabʼinq».
9 Laj David kixye ajwiʼ: «Chikanaaq li xmeexebʼ joʼ jun li raʼal ut li raʼal aʼin chikʼehoq rehebʼ chi tʼaneʼk ut chi xtojbʼalebʼ xmaak.
10 Chimoyq taxaq saʼebʼ li ru re naq inkʼaʼ teʼiloq, ut bʼaanu naq junelik teʼxkʼutzubʼ ribʼ».
11 Joʼkan bʼiʼ, laaʼin ninpatzʼ: ma inkʼaʼ chik teʼruuq chi wakliik saʼ xkʼabʼaʼ naq xeʼtichkʼok ut xeʼtʼaneʼk? Maajoqʼe bʼiʼanan! Saʼ xkʼabʼaʼ naq xeʼxqʼet li chaqʼrabʼ, li maawaʼebʼ aj judiiy teʼruuq chi koleʼk ut aʼin kibʼaanumank re xchiqʼbʼal li xkaqalebʼ xchʼool.
12 Li qʼetok chaqʼrabʼ kixkʼam chaq xbʼihomal li ruuchichʼochʼ ut naq xeʼkubʼeek xkʼihalebʼ, aʼin kixbʼaanu naq teʼbʼihomoʼq li maawaʼebʼ aj judiiy. Qʼaxal naabʼal wiʼ chik li osobʼtesink teʼxkʼul naq teʼchʼutubʼaaq chixjunilebʼ!
13 Anaqwan yookin chi aatinak eerikʼin laaʼex li jalan eetenamit. Saʼ xkʼabʼaʼ naq laaʼin li xʼapóstol ebʼ li tenamit ut ninkʼe xloqʼal li kʼanjel li ninbʼaanu chiru li Yos
14 re rilbʼal ma tinruuq xchiqʼbʼal xkaqal xchʼool lintenamit ut xkolbʼal wiibʼ oxibʼ rehebʼ aʼan.
15 Saʼ xkʼabʼaʼ naq xeʼtzʼeqtaanaak, wankebʼ li qas qiitzʼin xeʼtenqʼaak re naq teʼwanq wiʼ chik saʼ amiiwil rikʼin li Yos. Wi naxkʼulubʼaʼebʼ, chanchan tawiʼ yook xwaklesinkilebʼ chi yoʼyo saʼ xyanqebʼ li kamenaq.
16 Joʼkan ajwiʼ, wi saant xtʼorolal li qʼem li naxokmank choʼq xbʼeen ru li awimq, joʼkan ajwiʼ chixjunil li qʼem. Ut wi saant li xxeʼ li cheʼ, saant ajwiʼ ebʼ li ruqʼ.
17 Abʼanan, kiyokʼmank wiibʼ oxibʼ li ruqʼ cheʼ oliibʼ ut toj wank li ruqʼ kikanaak, abʼan laaʼat li kʼicheʼ oliibʼ xatletzeʼk saʼ xyanq ebʼ li ruqʼ li cheʼ li inkʼaʼ xeʼyokʼmank. Ut anaqwan yookat xtawbʼal xsahil li xxeʼ li oliibʼ aʼin.
18 Maakʼoxla naq qʼaxal nim aawankil chiruhebʼ li junchʼol chi ruqʼ cheʼ. Wi nakaakʼoxla naq qʼaxal nim aawankil, chijultikoʼq aawe naq moko laaʼat ta nakatkuutunk re xxeʼ li cheʼ, li xxeʼ bʼan nakuutunk aawe.
19 Tojaʼ naq taaye: «Kiyokʼmank wiibʼ oxibʼ li ruqʼ cheʼ re naq tinletzeʼq saʼ xyanqebʼ».
20 Yaal tzʼaqal, ebʼ aʼan xeʼyokʼeʼk xbʼaan naq maakʼaʼebʼ xpaabʼal, abʼan laaʼat xaqxokat xbʼaan laapaabʼal. Maakʼe aawankil, chaawoxloqʼi bʼan li Yos.
21 Wi li Yos inkʼaʼ kixkuy xmaak ebʼ li ruqʼ cheʼ oliibʼ, inkʼaʼ ajwiʼ tixkuy aamaak laaʼat.
22 Joʼkan naq kʼoxla li xchaabʼilal ut li xjosqʼil li Yos. Aʼan josqʼ rikʼinebʼ li xeʼtʼaneʼk, abʼan chaabʼilaq aawikʼin wi junelik nakaabʼaanu li us re xtawbʼal li rusilal. Abʼan wi inkʼaʼ nakaabʼaanu aʼin, yokʼbʼilaqat ajwiʼ laaʼat.
23 Ut wi aʼanebʼ teʼoq wiʼ chik chi paabʼank, teʼletzeʼq wiʼ chik chiru li cheʼ xbʼaan naq li Yos naru xbʼaanunkil.
24 Xbʼaan naq xatyokʼeʼk rikʼin li kʼicheʼ oliibʼ ut xatletzeʼk rikʼin li xcheʼil oliibʼ li wank saʼ xnaʼaj li awimq, usta moko joʼkan ta nabʼaanumank, joʼkan xatletzeʼk laaʼat. Wi li Yos naru xbʼaanunkil aʼin, chʼolchʼo naq truuq ajwiʼ xletzbʼal wiʼ chik ebʼ li ruqʼ li oliibʼ rikʼin li xtoonal.
25 Ex wechpaabʼanel nawaj naq chʼolchʼooq cheeru li muqmukil naʼlebʼ li nachalk rikʼin li Yos re naq inkʼaʼ teekʼoxla naq qʼaxal wank eenaʼlebʼ. Wankebʼ laj Israel inkʼaʼ chik xeʼraj abʼink. Ut joʼkan tkʼulmanq toj reetal naq teʼchalq li maawaʼebʼ aj judiiy li sikʼbʼilebʼ ru xbʼaan li Yos
26 ut chi joʼkan teʼkoleʼq chixjunilebʼ laj Israel. Joʼ chanru tzʼiibʼanbʼil: «Laj Kolonel t-elq chaq aran Sion ut trisi chixjunil li maaʼusilal saʼ xyanqebʼ li ralal xkʼajol laj Jacob.
27 Ut aʼin li sumwank li tinbʼaanu rikʼinebʼ naq tinkuy tinsach xmaakebʼ».
28 Yaal, aʼanebʼ xikʼ nekeʼril li chaabʼil esil ut aʼin naxkʼam chaq usilal choʼq eere. Abʼan ebʼ aʼan xeʼsikʼeʼk ru xbʼaan li Yos, ut naxrahebʼ saʼ xkʼabʼaʼ li xxeʼtoonebʼ.
29 Xbʼaan naq li Yos inkʼaʼ twiibʼanq xchʼool rikʼin xkʼebʼal li maatan li ak xkʼe chi moko twiibʼanq xchʼool rikʼin xbʼoqbʼal li ak xbʼoqebʼ.
30 Junxil xeeqʼet eeribʼ chiru li Yos, abʼan anaqwan kiruxtaana eeru* saʼ xkʼabʼaʼ naq aʼanebʼ xeʼxqʼet ribʼ chiru.
31 Joʼkan ajwiʼ, anaqwan aʼanebʼ xeʼxqʼet ribʼ chiru li Yos ut aʼan kiruxtaana eeru* re naq li Yos ajwiʼ truxtaana ruhebʼ.*
32 Saʼ xkʼabʼaʼ naq chixjunilebʼ xeʼxqʼet ribʼ, li Yos kixkanabʼebʼ saʼ ruqʼ li qʼetok ibʼ re naq chi joʼkan truxtaana ru* chixjunilebʼ.
33 Numtajenaq li xbʼihomal, li xnaʼlebʼ ut li xnawom li Yos! Maaʼani naxnaw xchʼolobʼankil li raqok aatin li naxbʼaanu ut maaʼani naxtaw ru li xbʼe.
34 Xbʼaan naq «ani naxtaw ru li xkʼaʼuxl li Jehobʼa?* Ani naru nakʼehok re xnaʼlebʼ?».
35 «Ani ak kixkʼe xbʼeenwa re li Yos re naq aʼan tixkʼe reqaj re?».
36 Xbʼaan naq chixjunil chalenaq rikʼin li Yos, saʼ xkʼabʼaʼ aʼan ut choʼq re aʼan. Xkʼulubʼ naq tkʼeheʼq xloqʼal chi junelik. Joʼkan taxaq.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Malaj «ebʼ laaʼaltar». Taawil xchʼolobʼankil li aatin, xnaʼaj li mayej.
^ Malaj «kixtoqʼobʼa eeru».
^ Malaj «kixtoqʼobʼa eeru».
^ Malaj «tixtoqʼobʼa ruhebʼ».
^ Malaj «tixtoqʼobʼa ru».
^ Taawil xchʼolobʼankil li aatin, Jehobʼa.
