Romanos 2:1-29
2 Joʼkan bʼiʼ, naq nakatraqok aatin saʼ xbʼeenebʼ li junchʼol, maakʼaʼ naxye anihat, moko wank ta xyaalal naq taabʼaanu aʼin. Naq nakatraqok aatin saʼ xbʼeenebʼ, aajunes yookat xkʼutbʼesinkil naq wank aamaak xbʼaan naq nakaabʼaanu li nekeʼxbʼaanu aʼanebʼ.
2 Laaʼo naqanaw naq li Yos naraqok aatin saʼ xbʼeenebʼ li nekeʼxbʼaanu aʼin, ut li raqok aatin li naxbʼaanu naxchap ribʼ rikʼin li yaal.
3 Abʼan, laaʼat li yookat chi raqok aatin saʼ xbʼeenebʼ li nekeʼxbʼaanu li yookat ajwiʼ xbʼaanunkil, ma nakaakʼoxla naq taakol aawibʼ chiru li Yos naq traqoq aatin?
4 Ma inkʼaʼ nakaanaw naq li Yos yook xkʼutbʼal chaawu li xnimal xkuyum, li xchaabʼilal ut li xqʼunil xchʼool? Ma inkʼaʼ nakaakʼe reetal naq li Yos yook aatenqʼankil saʼ tuulanil re naq taayotʼ aachʼool ut taajal aanaʼlebʼ?
5 Abʼan, saʼ xkʼabʼaʼ naq kaw laajolom joʼ li pek ut inkʼaʼ nakaawaj xyotʼbʼal laachʼool ut xjalbʼal laanaʼlebʼ, taakʼam chaq xjosqʼil li Yos saʼ aabʼeen. Li Yos tixkʼut li josqʼil saʼ li kutan naq traqoq aatin saʼ tiikilal.
6 Ut aʼan tixkʼe re li junjunq aʼ yaal chanru li xbʼaanuhom:
7 Aʼan tixkʼe li junelik yuʼam rehebʼ li inkʼaʼ nekeʼxkanabʼ xbʼaanunkil li us. Ebʼ li qas qiitzʼin aʼin yookebʼ xsikʼbʼal li loqʼal, li oxloqʼink ut li yuʼam li twanq chi junelik.
8 Joʼkan ajwiʼ, li Yos tixkʼut li xjosqʼil saʼ xbʼeenebʼ li nekeʼxyuʼami li raaxiikʼ ut inkʼaʼ nekeʼxpaabʼ li yaal abʼan nekeʼxpaabʼ li moko tiik ta.
9 Tchalq ebʼ li chʼaʼajkilal ut ebʼ li rahilal saʼ xbʼeen li naxbʼaanu li inkʼaʼ us aʼ yaal ma aj judiiy malaj aj griego.
10 Abʼan li naxbʼaanu li us tixtaw li loqʼal, li oxloqʼink ut li tuqtuukilal, xbʼeenwa choʼq re laj judiiy ut chirix chik aʼan choʼq re laj griego.
11 Xbʼaan naq li Yos inkʼaʼ nasikʼok u.
12 Chixjunilebʼ li inkʼaʼ wankebʼ rubʼel xwankil li chaqʼrabʼ, abʼan xeʼmaakobʼk, teʼkamq usta inkʼaʼ wankebʼ rubʼel xwankil li chaqʼrabʼ. Chixjunilebʼ li xeʼmaakobʼk naq wankebʼ chaq rubʼel xwankil li chaqʼrabʼ traqmanq aatin saʼ xbʼeenebʼ joʼ chanru naxye li chaqʼrabʼ.
13 Xbʼaan naq moko tiikebʼ ta xchʼool chiru li Yos li yal nekeʼrabʼi li chaqʼrabʼ, li nekeʼxyuʼami bʼan li chaqʼrabʼ aʼanebʼ li tiikebʼ xchʼool chiru li Yos.
14 Usta ebʼ li qas qiitzʼin inkʼaʼ nekeʼxnaw li naxye li xchaqʼrabʼ li Yos, nekeʼxbʼaanu li naxye. Ut li chaqʼrabʼ aʼin ak wank saʼebʼ li xchʼool.
15 Ebʼ aʼan nekeʼxkʼutbʼesi naq saʼebʼ li xkʼaʼuxl wank li chaqʼrabʼ. Li xchʼoolebʼ* naxbʼaanu naq teʼxkʼe reetal ma us ebʼ li xbʼaanuhom malaj inkʼaʼ.
16 Aʼin tkʼulmanq saʼ xkutankil naq li Yos traqoq aatin saʼ xbʼeenebʼ li winq li nekeʼkʼoxlak ut nekeʼnaʼlebʼak saʼ muqmu. Tixbʼaanu aʼin saʼ xkʼabʼaʼ li Kristo Jesús joʼ naxye li chaabʼil esil li ninkʼe chi naweʼk.
17 Joʼkan bʼiʼ, wi nakaakʼe aawibʼ joʼ aj judiiy ut nakaapaabʼ li Yos ut nakaanima aawibʼ saʼ xkʼabʼaʼ li Yos,
18 wi nakaanaw li rajom ut nakaakʼulubʼa li qʼaxal chaabʼil xbʼaan naq tzolbʼilat rikʼin li Chaqʼrabʼ,
19 wi chʼolchʼo chaawu naq laaʼat nakaakʼut xbʼehebʼ li mutzʼ, nakaakutanobʼresihebʼ li wankebʼ saʼ qʼoqyink,
20 nakaakʼehebʼ xnaʼlebʼ li maakʼaʼebʼ xnaʼlebʼ ut nakaatzolebʼ li kokʼal, ut wi nakaanaw wiibʼ oxibʼ li naʼlebʼ ut nakaataw ru li yaal li wank saʼ li Chaqʼrabʼ...,
21 laaʼat li nakaatzolebʼ li junchʼol, kʼaʼut inkʼaʼ nakaatzol aawibʼ? Laaʼat li nakaaye rehebʼ li junchʼol «Mat-elqʼak», kʼaʼut nakat-elqʼak chi joʼkanan?
22 Laaʼat li nakaaye «Matmuxuk sumlaak»,* kʼaʼut nakatmuxuk sumlaak* chi joʼkanan? Laaʼat li xikʼ nakaawil ebʼ li pechʼbʼil yos, kʼaʼut nakat-elqʼak saʼ rochochebʼ chi joʼkanan?
23 Laaʼat li nakaanima aawibʼ xbʼaan naq nakaanaw li xchaqʼrabʼ li Yos, kʼaʼut nakaatzʼeqtaana li Yos rikʼin xqʼetbʼal li Chaqʼrabʼ?
24 Joʼ chanru tzʼiibʼanbʼil, «saʼ eemaak yook chi yeemank li inkʼaʼ us chirix li xkʼabʼaʼ li Yos saʼ xyanqebʼ li tenamit».
25 Li winq li nasetmank xtzʼuumal xtzʼejwal naxtaw rusilal aʼin wi naxpaabʼ li chaqʼrabʼ. Abʼan wi naxqʼet li chaqʼrabʼ, chanchan tawiʼ maajunwa xsetmank xtzʼuumal xtzʼejwal.
26 Joʼkan naq, wi jun li winq li maawaʼ aj judiiy* naxpaabʼ li naxye li Yos saʼ li Chaqʼrabʼ, ma inkʼaʼ tabʼiʼ ilbʼilaq xbʼaan li Yos joʼ jun li winq li setbʼil xtzʼuumal xtzʼejwal?
27 Ut wi li winq li inkʼaʼ setbʼil xtzʼuumal xtzʼejwal tixpaabʼ li Chaqʼrabʼ, aʼan traqoq aatin saʼ aabʼeen laaʼat li nakaaqʼet li chaqʼrabʼ usta wank aawikʼin aʼin ut ak setbʼil xtzʼuumal laatzʼejwal.
28 Xbʼaan naq maawaʼ tzʼaqal aj judiiy li nayeehok re “Laaʼin aj judiiy”, chi moko wank ta xwankil li eetalil li kʼebʼil chiru li xtibʼel.*
29 Abʼan li wank saʼ li xchʼool junaq laj judiiy aʼan nabʼaanunk re, naq tzʼaqalaq aj judiiy. Ut Ii tzʼaqal eetalil li nakʼutbʼesink re aʼin aʼan li wank saʼ li xchʼool saʼ xkʼabʼaʼ li santil musiqʼej ut maawaʼ saʼ xkʼabʼaʼ li Chaqʼrabʼ. Li qas qiitzʼin aʼin nanimaak ru xbʼaan li Yos ut maawaʼ xbʼaanebʼ li winq.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, chʼool.
^ Malaj «Matmuxuk kaxaar».
^ Malaj «nakatmuxuk kaxaar».
^ Malaj «li inkʼaʼ setbʼil xtzʼuumal xtzʼejwal».
^ Aʼin yook chi aatinak chirix li winq li nasetmank xtzʼuumal xtzʼejwal.
