Romanos 4:1-25
4 Joʼkan bʼiʼ, kʼaru tooruuq xyeebʼal chirix li kixtaw laj Abrahán, li qaxeʼtoon?
2 Jun eetalil, wi saʼ xkʼabʼaʼ li xbʼaanuhom laj Abrahán kiyeemank naq tiik xchʼool kiruuk raj xnimankil ribʼ, abʼan maawaʼ chiru li Yos.
3 Kʼaru naxye li Raatin li Yos? «Laj Abrahán kixpaabʼ li Jehobʼa* ut kiʼilmank naq tiik xchʼool».
4 Joʼkan bʼiʼ, laj kʼanjel naxkʼul xtojbʼal ut li xtojbʼal moko maatan ta, tento bʼan tixkʼul xtojbʼal xbʼaan naq ak xkʼanjelak.
5 Joʼkan bʼiʼ, li winq li maakʼaʼ xbʼaanuhom abʼan naxpaabʼ li naxye naq tiik xchʼool li maaʼus xnaʼlebʼ, ilbʼilaq naq tiik xchʼool saʼ xkʼabʼaʼ li xpaabʼal.
6 Aʼin li yook chaq xyeebʼal laj David naq kiʼaatinak chirix li winq li kiʼileʼk xbʼaan li Yos naq tiik xchʼool usta li winq aʼin maakʼaʼ xbʼaanuhom:
7 «Sahebʼ saʼ xchʼool li xeʼkuyeʼk xmaak chirix li maaʼusilal li xeʼxbʼaanu chaq ut li xeʼtzʼapeʼk ru* li xmaak;
8 sa saʼ xchʼool li qas qiitzʼin li inkʼaʼ nakʼeheʼk saʼ ajl li xmaak xbʼaan li Jehobʼa».*
9 Ma kaʼajwiʼ ebʼ laj judiiy* sahebʼ saʼ xchʼool, malaj joʼkan ajwiʼ li inkʼaʼ setbʼilebʼ xtzʼuumal xtzʼejwal? Xbʼaan naq naqaye: «Laj Abrahán kiʼilmank naq tiik xchʼool saʼ xkʼabʼaʼ li xpaabʼal».
10 Joʼkan bʼiʼ, joqʼe kiʼileʼk naq tiik xchʼool? Naq setbʼil chik xtzʼuumal xtzʼejwal, malaj naq toj maajiʼ setbʼil xtzʼuumal xtzʼejwal? Naq toj maajiʼ setbʼil xtzʼuumal xtzʼejwal, peʼyaal?
11 Ut li Yos kixye re laj Abrahán naq tsetmanq xtzʼuumal xtzʼejwal. Li naʼlebʼ aʼin yal jun eetalil ut kikʼanjelak re xkʼutbʼesinkil li xpaabʼal naq toj maajiʼ nasetmank xtzʼuumal xtzʼejwal ut kiʼilmank ajwiʼ naq tiik xchʼool. Chi joʼkan laj Abrahán kikanaak choʼq xyuwaʼ chixjunilebʼ li wankebʼ xpaabʼal usta inkʼaʼ setbʼilebʼ xtzʼuumal xtzʼejwal re naq ilbʼilaqebʼ xbʼaan li Yos naq tiikebʼ xchʼool
12 ut kiwank ajwiʼ choʼq xyuwaʼebʼ li setbʼilebʼ xtzʼuumal xtzʼejwal. Moko kaʼaj tawiʼ choʼq rehebʼ aʼan, choʼq rehebʼ ajwiʼ li nekeʼpaabʼank joʼ kipaabʼank chaq laj Abrahán li qayuwaʼ naq toj maajiʼ setbʼil xtzʼuumal xtzʼejwal.
13 Kiyeemank re laj Abrahán malaj ebʼ li ralal xkʼajol naq aʼan teʼrechani jun li ruuchichʼochʼ saʼ xkʼabʼaʼ li tiikilal li natawmank chirix li paabʼal ut maawaʼ xbʼaan li chaqʼrabʼ.
14 Wi saʼ xkʼabʼaʼ raj li chaqʼrabʼ ebʼ li qas qiitzʼin teʼrechani li yeechiʼom, maakʼaʼ raj ajʼe li paabʼal ut maakʼaʼ raj xyaalal li yeechiʼom li kibʼaanuuk re laj Abrahán.
15 Chʼolchʼo naq li Chaqʼrabʼ naxkʼam chaq li josqʼil, bʼarwiʼ maakʼaʼ li chaqʼrabʼ maakʼaʼ ajwiʼ li qʼetok chaqʼrabʼ.
16 Laj Abrahán kixkʼul li yeechiʼom saʼ xkʼabʼaʼ li xpaabʼal ut aʼin ajwiʼ kixkʼutbʼesi li xnimal rusilal li Yos. Ebʼ li ralal xkʼajol xeʼxkʼul ajwiʼ li yeechiʼom aʼin. Abʼan moko kaʼaj tawiʼ li xeʼpaabʼank re li Chaqʼrabʼ xeʼxkʼul aʼin, xeʼxkʼul ajwiʼ li yeechiʼom li xeʼpaabʼank joʼ kipaabʼank chaq laj Abrahán.
17 (Kikʼulmank tzʼaqal joʼ tzʼiibʼanbʼil: «Xatinxaqabʼ choʼq xyuwaʼ naabʼal li tenamit»). Aʼin kikʼulmank chiru li Yos, li kixpaabʼ chaq laj Abrahán aʼ li nakʼehok re xyuʼamebʼ li kamenaq ut naʼaatinak chirix li toj maajiʼ natzʼaqlok ru, chanchan tawiʼ ak xtzʼaqlok ru.
18 Chʼolchʼo chaq chiru naq twanq choʼq xyuwaʼ naabʼal li tenamit usta chanchan tawiʼ naq inkʼaʼ tkʼulmanq. Abʼan, aʼan kixpaabʼ li kiyeemank chaq re: «Joʼkanaq xkʼihalil laawalal aakʼajol».
19 Usta inkʼaʼ kikubʼeek li xpaabʼal, kixkʼe reetal naq li xtibʼel chanchan naq kamenaq (xbʼaan naq kachʼin chik ma jun siʼeent chihabʼ wank re) ut li xSara inkʼaʼ naru nawank xkʼuulaʼal.
20 Abʼan, saʼ xkʼabʼaʼ li yeechiʼom li kibʼaanuuk re xbʼaan li Yos inkʼaʼ kiwiibʼank xchʼool xbʼaan naq wank xpaabʼal. Saʼ xkʼabʼaʼ li xpaabʼal kikawuuk xchʼool ut kixkʼe xloqʼal li Yos
21 ut chʼolchʼo chaq chiru naq li Yos naru xbʼaanunkil li kixyeechiʼi re.
22 Joʼkan naq «kiʼilmank naq tiik xchʼool».
23 Abʼanan, li aatin «kiʼilmank» moko kaʼaj tawiʼ kitzʼiibʼamank choʼq re,
24 choʼq qe ajwiʼ laaʼo li ilbʼilaqo naq tiik qachʼool xbʼaan naq naqapaabʼ li kiwaklesink re chi yoʼyo li Qaawaʼ Jesús saʼ xyanqebʼ li kamenaq.
25 Kiqʼaxtesiik saʼ xkʼabʼaʼ li qamaak ut kiwaklesiik chi yoʼyo re naq tyeemanq naq tiik qachʼool.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Malaj «li xeʼkuyeʼk».
^ Taawil xchʼolobʼankil li aatin, Jehobʼa.
^ Malaj «li setbʼilebʼ xtzʼuumal xtzʼejwal».
