Santiago 1:1-27
1 Laaʼin laj Santiago, xmoos li Yos ut li Qaawaʼ Jesukriist, laaʼex li kabʼlaju chi teep li wankex saʼ jalan jalanq chi naʼaj:
Nintaqla xsahil leechʼool!
2 Ex wechpaabʼanel, naq yooqex xnumsinkil jalan jalanq li chʼaʼajkilal, qʼaxal sahaq saʼ leechʼool.
3 Naq nekeekʼul ebʼ li chʼaʼajkilal, nayaleʼk rix leepaabʼal ut rikʼin aʼin nekeetzol xkuybʼal ebʼ li chʼaʼajkilal.
4 Abʼan wi junelik yookex xkuybʼal, aʼin tkawresinq eere chi tzʼaqal re ru, chaabʼilaqex saʼ chixjunil ut maakʼaʼ tpaltoʼq eere.
5 Joʼkan naq, wi junaq eere naraj xtzʼaqobʼ xnaʼlebʼ, mixkanabʼ xtzʼaamankil re li Yos ut tixkʼul xbʼaan naq li Yos naxkʼe chi yoʼon re chixjunilebʼ ut inkʼaʼ napoʼk rikʼinebʼ li nekeʼpatzʼok.
6 Abʼan naq yooq chi tzʼaamank, tento tixpaabʼ naq tixkʼul ut inkʼaʼ twiibʼanq xchʼool xbʼaan naq li nawiibʼank xchʼool chanchan xkawil roq li palaw li ekʼasinbʼil xbʼaan li kawil iqʼ.
7 Joʼkan ajwiʼ, li qas qiitzʼin aʼin inkʼaʼ raj tixkʼoxla naq wank kʼaru tixkʼul rikʼin li Jehobʼa.*
8 Li qas qiitzʼin aʼin moko chʼolchʼo ta chiru li naraj ut junelik naxjal ru li naraj xbʼaanunkil.
9 Abʼan laj paabʼanel li naxkubʼsi ribʼ tsahoʼq saʼ xchʼool xbʼaan naq xnimaak ru,
10 ut joʼkan ajwiʼ li bʼihom li naxtzol xkubʼsinkil ribʼ xbʼaan naq li bʼihom t-osoʼq joʼ naʼosoʼk li uutzʼuʼuj.
11 Naq naʼelk li saqʼe ut natiqwoʼk ru nachaqik li cheʼ ut natʼaneʼk li uutzʼuʼuj ut aran naraqeʼk li xchʼinaʼusal. Joʼkan ajwiʼ t-osoʼq li bʼihom naq yooq xsikʼbʼal li bʼihomal.
12 Li winq li inkʼaʼ naxkanabʼ xkuybʼal ebʼ li chʼaʼajkilal sa saʼ xchʼool xbʼaan naq tixkʼul li yuʼam joʼ maatan naq ak xnumsi ebʼ li chʼaʼajkilal. Aʼin li maatan li kixyeechiʼi li Jehobʼa* rehebʼ li inkʼaʼ nekeʼxkanabʼ xraabʼal.
13 Wi junaq li qas qiitzʼin yook xnumsinkil junaq li chʼaʼajkilal inkʼaʼ tixye: «Li Yos yook xyalbʼal wix». Xbʼaan naq maaʼani naru naxyal rix li Yos rikʼin li inkʼaʼ us chi moko aʼan naxyal rix junaq li qas qiitzʼin rikʼin li inkʼaʼ us.
14 Li junjunq bʼan naʼaaleek xbʼaan li naxrahi ru ut aʼin nakʼamok re chi tʼaneʼk saʼ jun li raʼal.
15 Joʼkan bʼiʼ, naq naʼok chi kʼiik saʼ xchʼool li naxrahi ru, namaakobʼk ut naq ak xmaakobʼk, nachalk li kamk saʼ xbʼeen.
16 Meebʼalaqʼi eeribʼ ex wechpaabʼanel li raarokex inbʼaan.
17 Chixjunil li chaabʼil maatan ut chixjunil li maatan li tzʼaqal re ru nachalk taqeʼq. Aʼan laj Yobʼtesinel re li xsaqenk li choxa ut aʼan inkʼaʼ najalaak joʼ najalaak ebʼ li mu.
18 Xbʼaan naq aʼan kiraj naq twanq qayuʼam saʼ xkʼabʼaʼ li yaal. Ut kixbʼaanu aʼin re naq laaʼo sikʼbʼilaq qu xbʼeenwa saʼ xyanq li xyobʼtesihom.
19 Nawaj naq teenaw ex wechpaabʼanel li raarokex inbʼaan, naq teekʼe eechʼool chi abʼink, toj teekʼoxla chiʼus li teeye ut mexjosqʼoʼk saʼ junpaat
20 xbʼaan naq li xjosqʼil li winq inkʼaʼ naruuchi li xtiikilal li Yos.
21 Joʼkan bʼiʼ, isimaq cheerix chixjunil li tzʼaj ru ut chixjunil li maaʼusilal ut teekubʼsi eeribʼ naq teekʼulubʼa li Raatin li Yos ut teekanabʼ naq txeʼinq saʼ leechʼool xbʼaan naq aʼin naru nakolok eere.
22 Abʼanan, naʼlebʼaqex joʼ naxye li Raatin li Yos ut meebʼalaqʼi eeribʼ rikʼin xkʼoxlankil naq tzʼaqal rikʼin rabʼinkil.
23 Xbʼaan naq, wi junaq li qas qiitzʼin narabʼi li Raatin li Yos abʼan inkʼaʼ naxyuʼami, chanchan li winq li naril li ru saʼ lem:
24 naril ribʼ ut naq naxik, saʼ junpaat nasach saʼ xchʼool chanru naʼilok.
25 Abʼan, li qas qiitzʼin li naxtzʼil rix li xchaqʼrabʼ li Yos li tzʼaqal re ru li nakʼamok saʼ li kolok ut naxbʼaanu li naxye aran, moko chanchan ta li qas qiitzʼin li narabʼi ut nasach saʼ xchʼool li kixtzʼil rix. Naxbʼaanu bʼan li xkʼanjel li Yos ut sa saʼ xchʼool chi xbʼaanunkil.
26 Wi junaq li qas qiitzʼin naxkʼoxla naq naxloqʼoni li Yos abʼan inkʼaʼ naxnatʼ li ruʼuj raqʼ, yook xbʼalaqʼinkil li xchʼool ut maakʼaʼ ajʼe naq naloqʼonink.
27 Choʼq re li Qayos, li Qayuwaʼ, li loqʼonink* li saq ru ut maakʼaʼ xtzʼajnil aʼan aʼin: tento tqatenqʼa li maakʼaʼebʼ xnaʼ xyuwaʼ ut ebʼ li malkaʼan li wankebʼ saʼ rahilal ut inkʼaʼ tqatzʼajni qibʼ rikʼin li ruuchichʼochʼ.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «li paabʼal».
