Saʼ xkʼabʼaʼ naq li Jesús moko aj maak ta, moko kixnumsi ta naabʼal li chʼaʼajkilal joʼ naqanumsi laaʼo. Usta joʼkan, naxkʼe xchʼool chirixebʼ li qas qiitzʼin ut chi anchal xchʼool naxtenqʼahebʼ. Junelik kixkʼe xtzʼaqobʼ li kixbʼaanu. Relik chi yaal, li toqʼobʼank u kiʼekʼasink re chi xtenqʼankilebʼ li junchʼol.

Ebʼ li kristiʼaan, maakʼaʼ naxye li xchihabʼebʼ nekeʼwulak chiru wank rikʼin li Jesús xbʼaan naq inkʼaʼ naxnimobʼresi ribʼ. Naq nekeʼril naq li Jesús naxkʼe xchʼool chirixebʼ sa nekeʼrekʼa ribʼ rikʼin.

Li Jesús junelik natijok naq wank xjunes malaj rochbʼenebʼ li nekeʼxloqʼoni ru li Yos. Kʼaynaq chi tijok, moko kaʼaj tawiʼ naq nawaʼak. Naq natijok, nabʼanyoxink ut naxkʼe xloqʼal li Xyuwaʼ. Ut naq ok re xbʼaanunkil junaq li naʼlebʼ li wank xwankil, naxpatzʼ re naq ttenqʼaaq.

Wank sut li Jesús kixtenqʼahebʼ li junchʼol usta lubʼlu ut naraj hilank. Moko kixkʼoxla ta ribʼ, chi joʼkan kixkʼe qe jun li eetalil li tento tqabʼaanu.

Li Jesús moko kaʼaj tawiʼ kixye naq tookuyuq maak. Kixkʼe bʼan li eetalil naq kixkuyebʼ xmaak ebʼ li xtzolom ut ebʼ li junchʼol chik chi kristiʼaan.

Ebʼ li propesiiy naxye naq li xkʼihalil ebʼ laj Judiiy teʼxtzʼeqtaana li Mesiiy ut naq ebʼ li xikʼ nekeʼilok re teʼxkamsi. Usta joʼkan, kixsikʼ chanru xtenqʼankilebʼ ut kixbʼaanu chixjunil li wank saʼ ruqʼ re xkʼutbʼal li yaal. Chi joʼkan kixkanabʼ jun eetalil chirix chanru toonaʼlebʼaq naq ebʼ li kristiʼaan xikʼ tooʼeʼril malaj naq tooʼeʼxrahobʼtesi.

Saʼ naabʼal li naʼlebʼ li Jesús nim xwankil chiruhebʼ li kristiʼaan. Jun eetalil, rikʼin li xnawom ut li xchoxahil naʼlebʼ, kaw li xjunxaqalil ut maaʼani natawok re li xseebʼal xchʼool. Usta joʼkan, junelik kixkubʼsi ribʼ ut kikʼanjelak chiruhebʼ li junchʼol.

Li Jesús kixkʼutbʼesi li xkuyum rikʼinebʼ li apóstol ut ebʼ li junchʼol chi kristiʼaan naq inkʼaʼ nekeʼxyuʼami li naʼlebʼ li naxkʼe. Inkʼaʼ kilubʼk chi xyeebʼal rehebʼ li naʼlebʼ li tento teʼxtzol re naq teʼwanq choʼq ramiiw li Jehobʼa.