XKOMON LI NAʼLEBʼ
Li Nekeʼxtiqwasi li Xtzʼejwal
Li nekeʼxtiqwasi li xtzʼejwal, nekeʼkʼaay xchʼeʼbʼal ribʼebʼ, nekeʼxtzʼajni li xkʼaʼuxl ut li xpaabʼal ut kaʼaj chik xjunesebʼ nekeʼxkʼoxla ribʼ. * Li nekeʼbʼaanunk re aʼin, nekeʼril ebʼ li poyanam joʼ bʼatzʼuul, ut junes li muxuk ibʼ nekeʼrataw. Moko nekeʼrahok ta chik xbʼaan naq junes li muxuk ibʼ chik nekeʼxkʼoxla. Li nekeʼxtiqwasi li xtzʼejwal nekeʼxkʼoxla naq tkotzq xtiqwalebʼ abʼan moko yaal ta xbʼaan naq xkomon nekeʼxkʼam chaq. Ut li tzʼaj aj naʼlebʼ aʼin naxbʼaanu naq teʼtʼaneʼq saʼ li koʼbʼeetak yumbʼeetak ut saʼ li tzʼajbʼeetalil naʼlebʼ (Colosenses 3:5).
Li Apostol Pablo kixye: «Ex was wiitzʼin raarookex inbʼaan, [...] qachʼajobʼresiiq qibʼ, qisihaq chixjunil li tzʼajnil wank chiqix ut li xtzʼajnil li musiqʼej, qoxloqʼiiq li Yos ut qatzʼaqobʼresiiq ru li qasantilal» (2 Corintios 7:1). Wankebʼ li qas qiitzʼin naq nekeʼrabʼi chirix li chʼajobʼresink nekeʼxkʼoxla naq chʼaʼaj xbʼaanunkil; abʼan us naq inkʼaʼ teʼxkanabʼ xkʼeebʼal xqʼe, xbʼaan naq li Jehobʼa «aj kuyul [...] maak» ut naraj qatenqʼankil (Salmo 86:5; Lucas 11:9-13). Usta wankebʼ nekeʼxkʼe xqʼe chi xtzʼeqtaanankil li tzʼaj aj naʼlebʼ aʼin toj nekeʼtʼaneʼk chisaʼ. Abʼan naq nekeʼrahoʼk saʼ xchʼool ut nekeʼxkʼe xqʼe re naq inkʼaʼ teʼtʼaneʼq chisaʼ, nekeʼxkʼutbʼesi naq chaabʼilebʼ xchʼool. Ut misach saʼ qachʼool naq «li Yos nim xwankil chiru li qachʼool ut naxnaw chixjunil» (1 Juan 3:20). Li Yos inkʼaʼ naxkʼe xchʼool chi rilbʼal li qamaak, naril bʼan chanru li qayuʼam ut li qabʼaanuhom. Ut naq naqatzʼaama li ruxtaan naril xtoqʼobʼaal qu xbʼaan naq naxnaw chiʼus chanru li qawanjik. Joʼkan bʼiʼ, junelik chootijoq chi anchal qachʼool, qakubʼsihaq qawankil, ut choonaʼlebʼaq joʼ naxbʼaanu li chʼinaʼal naq naxik rikʼin li xyuwaʼ re naq ttenqʼaaq. Li Jehobʼa naru xbʼaanunkil naq saqaq li qachʼool (Salmo 51:3-14, 19 [51:1-12, 17, Wy]; Isaias 1:18). Abʼan moko tzʼaqal ta naq tootijoq, tento bʼan tqabʼaanu li yooko xtzʼaamankil re li Yos: tqakanabʼ rilbʼal li nekeʼxtʼusubʼ ribʼ ut tqakanabʼ ajwiʼ rochbʼeeninkilebʼ li inkʼaʼ usebʼ xnaʼlebʼ. *
Wi chʼaʼaj chiru xkanabʼankil li tzʼaj aj naʼlebʼ, tento t-aatinaq rikʼin li xyuwaʼ (malaj li xnaʼ), rikʼin junaq laj paabʼanel winq (malaj ixq) kaw xpaabʼal (Proverbios 1:8, 9; 1 Tesalonicenses 5:14; Tito 2:3-5). *
^ párr. 2 Nekeʼxchʼeʼ ribʼ toj reetal nekeʼraj reekʼankil xsahil li xtzʼejwal.
^ párr. 3 Naabʼalebʼ li qas qiitzʼin nekeʼxkʼe li ulul chʼiichʼ chi kutankil re naq inkʼaʼ t-alanq saʼ xchʼoolebʼ rilbʼal li nekeʼxtʼusubʼ ribʼ. Ut wankebʼ nekeʼxkʼe li kʼanjelobʼaal chisaʼ li ulul chʼiichʼ re naq inkʼaʼ tnumeʼq chaq li tzʼaj aj naʼlebʼ. Abʼan us xjultikankil naq moko chixjunil ta li kʼanjelobʼaal nakʼanjelak chiʼus joʼkan naq maare tnumeʼq chaq junaq rehebʼ li tzʼaj aj naʼlebʼ.
^ párr. 1 Taataw xkomon li naʼlebʼ aʼin saʼ li tasal hu, ¡Despertad! re li po Noviembre 2006, bʼarwiʼ naxye: “Los jóvenes preguntan... ¿Cómo puedo superar este hábito?”; ut saʼ li tasal hu, Lo que los jóvenes preguntan. Respuestas prácticas, vol. 1, saʼebʼ li perel 178-182.
