Laj Tza ut ebʼ li maaʼus aj musiqʼej jwal yibʼru xnaʼlebʼebʼ ut xuwajel ruhebʼ. Saʼ najter qʼe kutan laj Tza kixkamsi li xketomq ut ebʼ li xmoos laj Job. Kixkamsi ajwiʼ li lajeebʼ chi ralal laj Job rikʼin jun «li kaqsut-iqʼ» li kixjukʼ li ochoch bʼarwiʼ wankebʼ. Laj Tza «kixrahobʼtesi laj Job rikʼin yibʼ aj sankil xox saʼ chixjunil li xjunxaqalil» (Job 1:7-19; 2:7).

Saʼ xkutankil li Jesús, ebʼ li maaʼus aj musiqʼej keʼxbʼaanu naq ebʼ li qas qiitzʼin inkʼaʼ teʼruuq aatinak chi moko ilok (Mateo 9:​32, 33; 12:22). Saʼ jun kutan xeʼxrahobʼtesi jun li winq ut keʼxbʼaanu naq tixset ribʼ chiru pek (Marcos 5:5). Joʼkan ajwiʼ keʼxbʼaanu re jun li al, keʼxbʼaanu naq tixjap re, keʼxkut chiru chʼochʼ ut keʼxchiqʼle chi kaw (Lucas 9:42).

Toj saʼebʼ li qakutan laj Tza ut ebʼ li maaʼus aj musiqʼej inkʼaʼ nekeʼxkanabʼ kamsink. Chalen naq xeʼisiik chaq saʼ choxa, qʼaxal xnumtaak wiʼ chik li xmaaʼusilalebʼ. Saʼ chixjunil li ruuchichʼochʼ naqabʼi resil chirix li xmaaʼusilalebʼ. Nekeʼxbʼaanu naq teʼyajerq wiibʼ oxibʼ li kristiʼaan. Junchʼol chik inkʼaʼ nekeʼruuk chi wark xbʼaan naq xuwajel ru li nekeʼxmatkʼe. Wankebʼ chik nekeʼmuxeʼk ru. Junchʼol chik nekeʼkanoʼk ru, nekeʼkamsink malaj nekeʼxkamsi ribʼ.

Li xLintina, li wank Surinam, naxye naq jun li maaʼus aj musiqʼej kixkamsi 16 rehebʼ li xkomon ut aʼan kirahobʼtesiik saʼ li xjunxaqalil ut li xkʼaʼuxl chiru 18 chihabʼ. Rikʼin li kixkʼul naxye naq ebʼ li maaʼus aj musiqʼej «nekeʼwulak chiru xrahobʼtesinkilebʼ li qas qiitzʼin li nekeʼtʼaneʼk saʼ ruqʼ toj reetal nekeʼxkamsi».

Abʼan li Jehobʼa naxkolebʼ li xmoos chiru laj Tza (Proverbios 18:10).