TZOLOM 03
Ma paabʼajel li naxye li Santil Hu?
Saʼ li Santil Hu naqataw naabʼal li yeechiʼom ut li naʼlebʼ. Maare laaʼat nakaawaj xnawbʼal li naxye abʼan, nakat-ok xkʼoxlankil, ma yaal tawiʼ li naxye? Ma paabʼajel tawiʼ li naʼlebʼ ut li yeechiʼom li naxkʼe jun li najteril tasal hu? Ma yaal tawiʼ naxye li Santil Hu naq tooruuq xtawbʼal li sahil chʼoolejil anaqwan ut saʼ li kutan chalkebʼ re? Chi miyon ebʼ li kristiʼaan nekeʼxpaabʼ aʼin. Naqaj naq taatzʼil rix kʼaʼut nekeʼkʼoxlak chi joʼkan re naq taawil ma tatruuq xpaabʼankil ajwiʼ laaʼat.
1. Ma tzʼaqal yaal naq kikʼulmank li naxye li Santil Hu?
Li Santil Hu naxye naq li natawmank chisaʼ tzʼiibʼanbʼil «chi tzʼaqal re ru» (Eclesiastés 12:10). Li naxye chirixebʼ li kristiʼaan ut li kikʼulmank, moko tikʼtiʼ ta (yaabʼasi Lucas 1:3; 3:1, 2). Naabʼalebʼ li nekeʼxtzʼil li kikʼulmank chaq junxil ut li nekeʼbʼekok malaj li nekeʼpikok najteril kʼaʼaq re ru nekeʼxye naq, naq li Santil Hu naʼaatinak chirix ebʼ li kutan, li kristiʼaan ut li naʼajej tzʼaqal yaal naxye.
2. Usta najteril hu li Santil Hu, kʼaʼut naq naqapaabʼ?
Li Santil Hu naʼaatinak chirixebʼ li naʼlebʼ li moko nanawmank ta naq kitzʼiibʼaak chaq. Jun eetalil, wank sut naʼaatinak chirix li ruuchichʼochʼ ut li choxa. Li naʼlebʼ aʼin moko chʼolchʼo ta ru naq kitzʼiibʼaak chaq li Santil Hu. Abʼanan, li nanawmank anaqwan naxkʼutbʼesi naq tzʼaqal yaal li naxye li Santil Hu. Ut li naxye paabʼajel anaqwan ut «chi junelik» (Salmo 111:8).
3. Kʼaʼut naqapaabʼ li naxye li Santil Hu chirix li kutan chalkebʼ re?
Li propesiiy a li wank saʼ li Santil Hu naxkʼe «resil xbʼenwa li toj majiʼ nakʼulmank» (Isaías 46:10). Naabʼal chihabʼ rubʼelaj kixye li tkʼulmanq ut kitzʼaqlok ru. Joʼkan ajwiʼ, kixye chi chʼolchʼo ru chanruhaq li ruuchichʼochʼ anaqwan. Saʼ li tzolom aʼin tqatzʼil rix wiibʼ oxibʼ li propesiiy li wank saʼ li Santil Hu ut tqakʼe reetal chanru kitzʼaqlok ru.
QASIKʼAQ XCHAMAL LI NAʼLEBʼ
Qilaq chanru naxchap ribʼ li naxye li Santil Hu rikʼin li nekeʼxye li nekeʼxtzʼil rix li choxachʼochʼ. Tqil ajwiʼ wiibʼ oxibʼ li xninqal ru propesiiy.
4. Li nekeʼxtzʼil rix li choxachʼochʼ nekeʼxkʼulubʼa li naxye li Santil Hu
Junxil qʼe kutan, ebʼ li kristiʼaan nekeʼxpaabʼ naq wank kʼaru napaqonk re li Ruuchichʼochʼ. Cheerilaq li BʼIDEO.
Kʼe reetal li naxye li hu Job, li numenaq 3,500 chihabʼ anaqwan kitzʼiibʼamank chaq. Cheeyaabʼasi Job 26:7 ut chexʼaatinaq chirix li patzʼom aʼin:
-
Kʼaʼut nasach qachʼool naq li Santil Hu naxye naq maakʼaʼ napaqonk re malaj «nakuutunk re» li Ruuchichʼochʼ?
Saʼ li chihabʼ 1800 ebʼ li kristiʼaan moko chʼolchʼo ta chiruhebʼ bʼar nachalk li habʼ. Abʼan, kʼe reetal li kixye chaq li Santil Hu najter qʼe kutan. Cheeyaabʼasi Job 36:27, 28 ut chexʼaatinaq chirix ebʼ li patzʼom aʼin:
-
Kʼaru nawulak chaawu chirix li nakʼulmank rikʼin li haʼ?
-
Ma nakatxtenqʼa ebʼ li raqal li xqayaabʼasi re naq taakʼojobʼ aachʼool rikʼin li Santil Hu?
5. Li Santil Hu kixkʼe chaq resil li tkʼulmanq
Cheeyaabʼasi Isaías 44:27-45:2 ut chexʼaatinaq chirix li patzʼom aʼin:
-
200 chihabʼ rubʼelaj, kʼaru kixye li Santil Hu naq tkʼulmanq rikʼin li tenamit Babilonia?
Li kikʼulmank chaq naxkʼutbʼesi naq 540 chihabʼ naq toj maajiʼ nakʼulunk li Jesús saʼ Ruuchichʼochʼ, li awabʼej Ciro re li tenamit Persia ut ebʼ li xsoldaad keʼrechani li tenamit Babilonia. Xbʼeenwa, keʼxjal xbʼe li nimaʼ li naxkol raj li tenamit. Moqon, saʼ xkʼabʼaʼ naq li rokebʼaal li tenamit kikanaak chi teeto, inkʼaʼ keʼpleetik naq xeʼok. Ak numenaq 2,500 chihabʼ naq kikʼulmank aʼin ut li tenamit Babilonia maajunwa kitenamitoʼk wiʼ chik. Kʼe reetal li kixye li Santil Hu.
Cheeyaabʼasi Isaías 13:19, 20 ut chexʼaatinaq chirix li patzʼom aʼin:
-
Chanru kitzʼaqlok li propesiiy aʼin?
Li jukʼinbʼil tenamit Babilonia, saʼ Irak
6. Li Santil Hu kixye chaq li yook chi kʼulmank anaqwan
Li Santil Hu naxye naq wanko «saʼ rosoʼjikebʼ li kutan» (2 Timoteo 3:1). Kʼe reetal li kixye chirix li qakutan.
Cheeyaabʼasi Mateo 24:6, 7 ut chexʼaatinaq chirix li patzʼom aʼin:
-
Kʼaru kixye li Santil Hu naq tkʼulmanq saʼebʼ li qakutan?
Cheeyaabʼasi 2 Timoteo 3:1-5 ut chexʼaatinaq chirix ebʼ li patzʼom aʼin:
-
Joʼ kixye li Santil Hu, chanru teʼnaʼlebʼaq li kristiʼaan saʼ li rosoʼjikebʼ li kutan?
-
Kʼaru aawilom laaʼat chirix aʼin?
WIIBʼ OXIBʼ NEKEʼXYE: «Yal yoobʼanbʼil aatin wank saʼ li Santil Hu».
-
Kʼaru li naʼlebʼ nakatxtenqʼa re naq taapaabʼ li wank saʼ li Santil Hu?
LI AK XQATZOL
Li nekeʼxtzʼil rix ebʼ li jalan jalanq chi naʼlebʼ, li ak xkʼulmank chaq ut ebʼ li propesiiy, naxkʼut naq tatruuq xpaabʼankil li naxye li Santil Hu.
Qajultikaq
-
Ma tzʼaqal yaal naq kikʼulmank li naxye li Santil Hu malaj yal yoobʼanbʼil?
-
Kʼaru ebʼ li naʼlebʼ li naxye li Santil Hu nekeʼxkʼulubʼa li nekeʼxtzʼil rix li choxachʼochʼ?
-
Ma nakaaye naq li Santil Hu truuq xyeebʼal li tkʼulmanq saʼ li kutan chalkebʼ re? Kʼaʼut naq nakaapaabʼ aʼin?
SIKʼ XKOMON LI NAʼLEBʼ
Ma wank xpaltil li Santil Hu naq naʼaatinak chirix li nekeʼxye li nekeʼxtzʼil rix li jalan jalanq chi naʼlebʼ?
Kʼaru naxkʼutbʼesi naq wanko «saʼ rosoʼjikebʼ li kutan»?
«Waqibʼ li xpropesiiy li Santil Hu li yook chi tzʼaqlok ru» (Laj Kʼaakʼalehom, 1 re mayo 2011)
Tzʼil rix chanru keʼtzʼaqlok ru ebʼ li propesiiy chirix li nimla tenamit re Grecia.
Chaakʼe reetal chanru jun li winq kixjal li naxkʼoxla chirix li Santil Hu naq kiril li propesiiy li wank chisaʼ.
«Moko ninpaabʼ ta chaq naq wank li Yos» (Laj Kʼaakʼalehom, ajl 5 2017)
a Jun li propesiiy aʼan li esil chalenaq rikʼin li Yos chirix li kutan chalkebʼ re.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
