Naq li Jehobʼa kixxaqabʼ li junkabʼal, kixtenebʼ saʼ xbʼeen li naʼbʼej yuwaʼbʼej rilbʼalebʼ li xkokʼal (Colosenses 3:20). Laaʼat joʼ yuwaʼbʼej tenebʼanbʼil saʼ aabʼeen xkʼutbʼal chiruhebʼ laakokʼal xraabʼal li Jehobʼa re naq us teʼnaʼlebʼaq naq teʼnimanq (2 Timoteo 1:5; 3:15). Ut tento taanaw ajwiʼ kʼaru wank saʼebʼ li xchʼool. Abʼan aajel ru naq yooqat xyuʼaminkil. Re naq tatruuq xkʼutbʼal li Raatin li Yos chiruhebʼ laakokʼal, xbʼeenwa taakʼe saʼ laachʼool (Salmo 40:9 [40:8, Wy]).

LI NAXYE LI SANTIL HU: «Li junjunq seebʼaq xchʼool chi abʼink, chixkuyaq ribʼ chi aatinak» (Santiago 1:19). Maare nakaawaj naq ebʼ laakokʼal inkʼaʼ teʼxuwaq chi aatinak aawikʼin. Abʼan, re naq teʼruuq xbʼaanunkil aʼin tento taakʼutbʼesi chiruhebʼ naq nakaawaj rabʼinkilebʼ. Tzol aatinak saʼ tuulanil re naq teʼxye aawe li nekeʼxkʼoxla (Santiago 3:18). Wi nekeʼxkʼe reetal naq taachʼilahebʼ malaj taaweechʼihebʼ, maare inkʼaʼ teʼxye aawe chixjunil li nekeʼxkʼoxla. Chiwanq aakuyum ut rajlal taaye rehebʼ naq nakaarahebʼ (Mateo 3:17; 1 Corintios 8:1).

NARU NAKAABʼAANU AʼIN:

• Naq ebʼ laakokʼal teʼraj aatinak aawikʼin, kanabʼ li yooqat xbʼaanunkil

• Rajlal tat-aatinaq rikʼinebʼ ut inkʼaʼ kaʼajwiʼ naq wanq junaq li chʼaʼajkilal

LI NAXYE LI SANTIL HU: «Li wank xnaʼlebʼ, toj naxkʼoxla rix li naxbʼaanu» (Proverbios 13:16). Wank sut toj taakʼoxla chiʼus li yook xyeebʼal aawe re xnawbʼal kʼaru tzʼaqal nareekʼa. Ebʼ li saaj wank sut nekeʼxnimtresi ru li aatin malaj inkʼaʼ nekeʼxkʼoxla kʼaru nekeʼxye. «Xutaanal ut xmajelal naʼlebʼ choʼq re li nachaqʼok chi toj majiʼ naraqeʼk li aatinak.» (Proverbios 18:13.) Joʼkan naq, matpoʼk saʼ junpaat (Proverbios 19:11).

NARU NAKAABʼAANU AʼIN:

• Maachʼik aawibʼ naq yooq chi aatinak aawikʼin, ut matxuwak rikʼin li tixseeraqʼi aawe

• Jultikoʼq aawe chanru xaaweekʼa chaq aawibʼ naq saajat chaq ut kʼaru wank chaq xwankil choʼq aawe

LI NAXYE LI SANTIL HU: «At walal inkʼajol, abʼi laaqʼusbʼal xbʼaan laayuwaʼ ut maatzʼeq chirix laachʼool laatijbʼal xbʼaan laanaʼ» (Proverbios 1:8). Li Jehobʼa kixkʼe xwankil li naʼbʼej ut li yuwaʼbʼej saʼ xbʼeenebʼ li xkokʼal. Saʼ xkabʼichalebʼ teʼxkʼut chiruhebʼ oxloqʼink ut abʼink (Efesios 6:1-3). Ebʼ leekokʼal teʼxkʼe reetal naq inkʼaʼ wankex «saʼ junajil rikʼin leekʼaʼuxl ut leenaʼlebʼ» (1 Corintios 1:10). Joʼkan utan, wi inkʼaʼ nekeekʼe eeribʼ saʼ aatin chirix junaq li naʼlebʼ, meechoqi eeribʼ chiruhebʼ leekokʼal re naq inkʼaʼ teʼxkanabʼ eeroxloqʼinkil.

NARU NAKAABʼAANU AʼIN:

• Kʼehomaq eeribʼ saʼ aatin chirix chanru teetij leekokʼal

• Wi moko juntaqʼeet ta laakʼaʼuxl rikʼin laasumʼaatin chirix xtijbʼalebʼ li kokʼal, kʼe aachʼool chi xtawbʼal ru kʼaru naraj choʼq rehebʼ

LI NAXYE LI SANTIL HU: «Chekʼiiresihebʼ [...] rikʼin xtzolbʼalebʼ ut xtijbʼalebʼ joʼ naraj li Qaawaʼ» (Efesios 6:4). Wi nakaawaj xtzolbʼalebʼ chiʼus laakokʼal, maakʼoxla naq teʼxtzol ribʼ xjunes. Tento taakʼubʼ chirix kʼaru taatzolebʼ wiʼ ut taaqʼusebʼ (Salmo 127:4; Proverbios 29:17). Li qʼusuk moko kaʼaj tawiʼ naraj xyeebʼal sakʼok. Naraj xyeebʼal xchʼolobʼankil chiruhebʼ li kokʼal kʼaʼut us xxaqabʼankil wiibʼ oxibʼ li naʼlebʼ re naq us wanqebʼ (Proverbios 28:7). Taakʼut ajwiʼ chiruhebʼ xraabʼal li Raatin li Yos ut chi xtawbʼal ru li chaabʼil naʼlebʼ li wank chisaʼ (Salmo 1:2). Ut chi joʼkan saqaqebʼ ru xchʼool ut xkʼaʼuxl chiru li Yos (Hebreos 5:14).

NARU NAKAABʼAANU AʼIN:

• Kʼe aachʼool re naq ebʼ laakokʼal teʼxpaabʼ naq yoʼyo li Yos ut teʼxkʼojobʼ xchʼool rikʼin

• Tenqʼahebʼ laakokʼal re naq teʼruuq xnawbʼal ut xtzʼeqtaanankil yalaq kʼaru chi naʼlebʼ li tixkʼehebʼ chi tʼaneʼk saʼ li muxuk ibʼ, joʼ li naʼilmank saʼ li Internet malaj saʼ li redes sociales. Kʼut chiruhebʼ chanru nanawmank anihebʼ nekeʼmuxuk kokʼal