Li tasal hu Li Raatin li Yos naxbʼeresi qayuʼam kʼubʼanbʼil re naq saʼ junpaat taataw ebʼ li xraqal li Santil Hu li tatxtenqʼa chi xnumsinkil ebʼ li chʼaʼajkilal li taakʼul saʼ laayuʼam. Tatxtenqʼa ajwiʼ chi xtawbʼal ebʼ li xraqal li Santil Hu li tixwaklesi xchʼoolebʼ li junchʼol ut re naq teʼxnaw chanru teʼnaʼlebʼaq re xnimankil ru li Jehobʼa. Kaʼajwiʼ taasikʼ li xjolomil li naʼlebʼ li nakaawaj ut chisaʼ taataw ebʼ li patzʼom ut li xchʼolobʼankil wiibʼ oxibʼ xraqal li Santil Hu (taawil « Chanru naʼoksimank li tasal hu aʼin»). Taataw saʼ junpaat ebʼ li xraqal li Santil Hu li nawaklesink chʼool joʼ ajwiʼ li chaabʼil naʼlebʼ li isinbʼil chaq saʼ li Raatin li Yos. Taataw ajwiʼ ebʼ li xraqal li Santil Hu li tatxtenqʼa saʼ laayuʼam ut re xtenqʼankilebʼ li junchʼol.

Li hu aʼin inkʼaʼ naxkʼam chaq chixjunil ebʼ li xraqal li Santil Hu li naʼaatinak chirix junaq li naʼlebʼ. Nakʼanjelak bʼan re naq taasikʼ xkomon junaq li naʼlebʼ (Pr 2:​1-6). Re naq taataw xchamal junaq li naʼlebʼ, oksi ebʼ li xraqal li Santil Hu li wank saʼ xyi li junjunq chi perel re li Santil Hu joʼ ajwiʼ li xtzʼaqobʼ li naʼlebʼ li wank saʼ Li Santil Hu choʼq rehebʼ li Teʼwanq saʼ li Akʼ Ruuchichʼochʼ abʼan saʼ kaxlan aatin. Ut re naq taatzol tzʼaqal xyaalal junaq li xraqal li Santil Hu malaj chanru xyuʼaminkil, oksi Li hu li natenqʼank rehebʼ laj testiiw re li Jehobʼa. Taawil ajwiʼ ebʼ li tasal hu li tojeʼ xeʼelk re naq taanaw naq toj akʼ li naʼlebʼ li yookat rilbʼal.

Naqoybʼeni naq li hu aʼin tatxtenqʼa chi xtawbʼal li tzʼaqal nawom, li tzʼaqal naʼlebʼ ut re naq taataw ru li naxye li Raatin li Yos. Wi junelik nakaawoksi li tasal hu aʼin, taakʼe reetal naq «yoʼyo li raatin li Yos ut qʼaxal wank xwankil» (Heb 4:12).