Saʼ Filipos, kiwank jun ixqaʼal moos li naxqʼehi chaq li kutan chaalel xbʼaan naq echaninbʼil xbʼaan jun li maaʼus aj musiqʼej. Ebʼ laj echal re li ixqaʼal nekeʼxtaw naabʼal tumin chirix. Naq laj Pablo ut laj Silas keʼwulak Filipos, li ixqaʼal aʼin inkʼaʼ kixkanabʼ xtaqenkilebʼ chiru naabʼal kutan. Li maaʼus aj musiqʼej naxbʼaanu naq li ixqaʼal tixjap re: «Ebʼ li winq aʼin ebʼ aj kʼanjel chiru li Nimajwal Yos». Tojaʼ naq, laj Pablo kixye re li maaʼus aj musiqʼej: «Ninye aawe saʼ xkʼabʼaʼ li Jesus naq elen chaq rikʼin li ixqaʼal!». Ut li maaʼus aj musiqʼej kiʼelk rikʼin li ixqaʼal.

Naq ebʼ laj echal re li ixqaʼal keʼxkʼe reetal naq inkʼaʼ chik teʼxtaw xtumin rikʼin, kʼajoʼ naq keʼchalk xjosqʼil. Keʼxjukuki laj Pablo ut laj Silas chiruhebʼ li wankebʼ xwankil, ut chiruhebʼ laj raqol aatin, ut keʼxye rehebʼ: «Ebʼ li winq aʼin inkʼaʼ nekeʼxpaabʼ li chaqʼrabʼ ut yookebʼ xpoqoqinkil ebʼ li poyanam!». Ebʼ laj raqol aatin keʼxye naq teʼxsakʼ laj Pablo ut laj Silas ut teʼkʼeheʼq saʼ tzʼalam. Laj kʼaakʼalenel tzʼalam kixkʼehebʼ toj chisaʼ bʼarwiʼ qʼoqyink chiʼus. Joʼkan ajwiʼ, kixnatʼ rikʼin cheʼ ebʼ li roq.

Chirix chik aʼan, laj Pablo ut laj Silas keʼok chi bʼichank re xkʼebʼal xloqʼal li Jehobʼa ut ebʼ laj preex yookebʼ chi abʼink. Maakʼaʼ saʼ xchʼoolebʼ, saʼ xyitoqil qʼoqyink, jun li nimla hiik kixchiqʼchiqʼi li tzʼalam. Keʼteehonk ebʼ li okebʼaal ut keʼtʼupeʼk ebʼ li kadeen ut keʼjoreʼk ebʼ li cheʼ li natʼnokebʼ wiʼ. Laj kʼaakʼalenel tzʼalam kiʼok saʼ aanil toj chisaʼ li tzʼalam ut kiril naq ebʼ li okebʼaal teetokebʼ chik. Kixkʼoxla naq ebʼ laj preex keʼelelik, joʼkan naq kixchap jun li jutzʼchʼiichʼ re xkamsinkil ribʼ.

Saʼ li hoonal aʼan, laj Pablo kixjap re: «Maarahobʼtesi aawibʼ! Arin wanko chiqajunilo!». Laj kʼaakʼalenel tzʼalam xkoho saʼ aanil bʼarwiʼ wank chaq laj Pablo ut laj Silas ut kixwiqʼibʼ ribʼ chiruhebʼ. Kixpatzʼ rehebʼ: «Kʼaru tento tinbʼaanu re naq tinkoleʼq?». Aʼanebʼ keʼxye: «Laaʼat ut ebʼ li wankebʼ saʼ laawochoch tento teepaabʼ li Jesus». Tojaʼ naq, laj Pablo ut laj Silas keʼok xkʼutbʼal chiruhebʼ li raatin li Jehobʼa, ut laj kʼaakʼalenel tzʼalam ut chixjunilebʼ saʼ li rochoch xeʼkubʼsiik xhaʼ.