Naq laj David kixkamsi laj Goliat, li awabʼej Saul kixxaqabʼ saʼ xbʼeenebʼ laj puubʼ. Laj David kixqʼax ru naabʼal li yalok u ut yalaq bʼar kiwulak resil. Rajlal sut naq nasutqʼiik chaq saʼ junaq li yalok, ebʼ li ixq rikʼin xajok ut bʼichank nekeʼxkʼul: «Laj Saul chi mil naxqʼaxebʼ ru, abʼan laj David chi lajeetq mil naxqʼaxebʼ». Joʼkan naq, laj Saul kiʼok xkaqalinkil ut kiraj xkamsinkil.

Laj David naxnaw xchʼeʼbʼal chiʼus li aarp. Saʼ jun kutan, naq yook chi wajbʼak choʼq re laj Saul, li awabʼej kixkut li xjutzʼchʼiichʼ saʼ xbʼeen. Abʼan, tzʼaqal kixkʼutzʼubʼ ribʼ ut li jutzʼchʼiichʼ kixtʼoj ribʼ chiru tzʼak. Chirix chik aʼan, laj Saul naabʼal sut kixyal xkamsinkil. Joʼkan naq, laj David kiʼelelik ut kixmuq ribʼ saʼ chaqichʼochʼ.

Tojaʼ naq, laj Saul kiʼok xsikʼbʼal laj David rochbʼen 3.000 aj puubʼ. Laj Saul kiʼok saʼ jun li ochoch pek abʼan inkʼaʼ naxnaw naq aran muqmu laj David rochbʼenebʼ li nekeʼtaqenk re. Ebʼ li winq keʼxye re laj David saʼ jas:  «Anaqwan tatruuq xkamsinkil laj Saul». Laj David kijilok chixkʼatq laj Saul ut kixset jun peraas li raqʼ chi inkʼaʼ kixkʼe reetal laj Saul. Abʼan moko sa ta chik narekʼa ribʼ xbʼaan naq inkʼaʼ kiroxloqʼi li sikʼbʼil ru xbʼaan li Jehobʼa. Joʼkan naq, inkʼaʼ kixkanabʼ naq ebʼ li rochbʼen teʼxchʼeʼ laj Saul. Naq laj Saul kiʼelk chaq saʼ li ochoch pek, laj David kixjap re chi kaw: «Xinruuk raj aakamsinkil, abʼan inkʼaʼ xinbʼaanu». Ma nakaakʼoxla naq laj Saul sa chik kiril laj David?

Inkʼaʼ. Laj Saul inkʼaʼ kixkanabʼ xtaqenkil. Tojaʼ naq, saʼ jun qʼoqyink, laj David ut laj Abisai, li rikaqʼ, keʼxchʼik ribʼ saʼ muqmu bʼarwiʼ yook chi hilank laj Saul. Joʼkan ajwiʼ laj Abner, laj kʼaakʼalehom re, yook chi wark. Laj Abisai kixye re laj David: «Aʼin li qahoonal. Kanabʼin chi xkamsinkil laj Saul». Abʼan laj David kixye re: «Li Jehobʼa yaal re kʼaru tixbʼaanu rikʼin. Kaʼajwiʼ kʼam li xjutzʼchʼiichʼ ut xnaʼaj xhaʼ, ut yoʼo».

Chirix chik aʼan, laj David kitaqeʼk saʼ jun li tzuul nachʼ aran. Saʼ xbʼeen li tzuul aʼin naril li xnaʼaj laj Saul. Laj David kixjap re: «Abner! Kʼaʼut inkʼaʼ nakaakol li awabʼej? Bʼar wank li xnaʼaj xhaʼ ut li xjutzʼchʼiichʼ?». Laj Saul kixnaw ru xyaabʼ xkux laj David ut kixye re: «Xinaakamsi raj, abʼan inkʼaʼ xaabʼaanu. Anaqwan nawil naq tatkanaaq choʼq awabʼej re Israel». Tojaʼ naq, laj Saul kisutqʼiik saʼ rochoch. Abʼan moko chixjunilebʼ ta li rech-alal laj Saul xikʼ nekeʼril laj David.