Saʼ li naʼaj Siria, kiwank jun li chʼina ixqaʼal aj Israel najt wank chaq chiru li rochoch ut li xjunkabʼal. Ebʼ laj puubʼ re Siria keʼkʼamok re, ut anaqwan wank choʼq xmoos li rixaqil laj Naaman, li najolomink rehebʼ laj puubʼ. Li chʼina ixqaʼal naxloqʼoni li Jehobʼa usta ebʼ li poyanam bʼarwiʼ kikʼameʼk wiʼ inkʼaʼ nekeʼxloqʼoni.

Chirix laj Naaman wank jun li yiibʼru aj yajel ut kʼajoʼ xrahil. Li chʼina ixqaʼal kiraj xtenqʼankil, joʼkan naq, kixye re li rixaqil laj Naaman: «Ninnaw ru jun li winq li naru naxtenqʼa laabʼeelom. Saʼ Israel wank jun xpropeet li Jehobʼa li naxkʼabʼaʼi Eliseo. Aʼan naru naxbʼan laabʼeelom».

Li rixaqil laj Naaman kixye re li kixye chaq li chʼina ixqaʼal. Laj Naaman kiraj xyalbʼal yalaq kʼaru re xkʼirtasinkil ribʼ, joʼkan naq xkoho Israel saʼ rochoch laj Eliseo. Kixkʼoxla naq tkʼuleʼq xbʼaan laj Eliseo joʼ nekeʼkʼuleʼk li wankebʼ xwankil. Abʼan, moko laj Eliseo ta kikʼuluk re, kixtaqla bʼan li xmoos chi xkʼulbʼal ut xyeebʼal re: «Ayu ut subʼ aawibʼ wuqubʼ sut saʼ li nimaʼ Jordan. Tojaʼ naq tatkʼiraaq».

 Laj Naaman inkʼaʼ kiwulak chiru aʼin ut kixye: «Xinkʼoxla naq li propeet aʼin tinxkʼirtasi rikʼin xbʼoqbʼal li Xyos ut rikʼin rekʼasinkil ebʼ li ruqʼ. Abʼan, kaʼajwiʼ kixye naq tinxik len saʼ li nimaʼ Israel. Jwal usebʼ li qanimaʼ li wank Siria chiruhebʼ aʼan. Kʼaʼut maawaʼ saʼebʼ li qanimaʼ tinxik?». Laj Naaman kʼajoʼ kichalk xjosqʼil ut kiʼelk chaq saʼ rochoch laj Eliseo.

Ebʼ li xmoos laj Naaman keʼtenqʼank re chi kʼoxlak chiʼus. Keʼxye re: «Peʼyaal naq yalaq kʼaru raj taabʼaanu re naq tatkʼiraaq? Li xye aawe li propeet aʼin moko chʼaʼaj ta. Kʼaʼut naq inkʼaʼ nakaabʼaanu?». Laj Naaman kirabʼihebʼ, joʼkan naq, xkoho saʼ li nimaʼ Jordan ut kixchʼik ribʼ saʼ haʼ wuqubʼ sut. Saʼ li xwuq sut, naq kiʼelk saʼ haʼ kʼirajenaq chi junajwa. Kʼajoʼ kisahoʼk saʼ xchʼool ut kisutqʼiik chi xbʼanyoxinkil re laj Eliseo. Kixye re: «Anaqwan ninnaw naq li Jehobʼa aʼan li tzʼaqal Yos». Naq laj Naaman kiwulak saʼ rochoch maakʼaʼ chik li xyajel. Chanru nakaaye naq kirekʼa ribʼ li chʼina ixqaʼal naq kiril ru laj Naaman?