Yal kʼoxla li eetalil aʼin: maakʼaʼ lajeebʼ kʼasal xwulajik li xKaren saʼ li ninqʼe naq xrabʼi naq xyeheʼk re:

Naq naʼilok chirix, naril li xJessica, li ramiiw, ut wank wiibʼ li serbʼees saʼ ruqʼ. Naxyeechiʼi jun re ut naxye re: «Moko kʼuulaʼalat ta chik. Naru taawajsi bʼayaq aawu».

Li xKaren inkʼaʼ naraj ukʼaʼk xbʼaan naq maajiʼ tzʼaqlojenaq xchihabʼ, abʼan inkʼaʼ naraj naq li ramiiw tixkʼoxla naq chʼiʼichʼiʼi re. Li xJessica chaabʼil ixqaʼal, ut wi yook chi ukʼak, naraj xyeebʼal naq moko maak ta naxbʼaanu. Tojaʼ naq li xKaren naʼok xkʼoxlankil: «Yal jun ajwiʼ li serbʼees, moko chanchan ta li bʼan li nakanobʼresink u».

Wi laaʼat raj xKaren, kʼaru raj taabʼaanu?

Re naq taanaw kʼaru taabʼaanu naq taakʼul junaq li naʼlebʼ joʼ aʼin, tento naq taanaw anihat ut bʼar wank li chaabʼil naʼlebʼ li nakaayuʼami. Wi chʼolchʼo chaawu aʼin, aʼan tkoloq aawe ut tatxtenqʼa chi xkʼoxlankil kʼaru taabʼaanu rikʼin laayuʼam ut moko jalan ta tyehoq re kʼaru taabʼaanu (1 Corintios 9:26, 27).

Kʼaru ttenqʼanq aawe chi xbʼaanunkil aʼin? Xbʼeenwa, taatzʼil rix ebʼ li patzʼom aʼin.

Wi nakaanaw kʼaru naʼelk chiʼus chaawu ut bʼar wank xchaabʼilal ru laanaʼlebʼ, chʼolchʼooq chaawu anihat.

LI EETALIL SAʼ LI SANTIL HU. Li Apostol Pablo kixye: «Us ta inkʼaʼ ninnaw aatinak chi chaabʼil, abʼan moko joʼkanin ta rikʼin linnaʼlebʼ» (2 Corintios 11:6). Saʼ xkʼabʼaʼ naq naxnaw chiʼus kʼaru naxye li Santil Hu, inkʼaʼ kixuwak naq keʼok xwechʼbʼal rix. Inkʼaʼ kixkanabʼ naq li aatin li nekeʼkubʼsink chʼool tixbʼaanu naq tixkʼoxla naq maakʼaʼ naʼok wiʼ (2 Corintios 10:10; 11:5).

TZʼIL AAWIBʼ Tzʼiibʼa kʼaru nakaanaw xbʼaanunkil.

Anaqwan tzʼiibʼa jun rehebʼ laachaabʼil naʼlebʼ (maare chirix laachaabʼilal, li kʼehok, ma paabʼajelat malaj inkʼaʼ nakatbʼayk chi wulak).

Qakʼoxlaq jun li eetalil, wank li kadeen natʼupeʼk saʼ junpaat xbʼaan naq jwal jay bʼarwiʼ chapcho wiʼ, joʼkan ajwiʼ laaʼat naru nasachk saʼ junpaat saʼ laachʼool anihat wi nakaakanabʼ naq ebʼ li naʼlebʼ li nekeʼtʼanok aawe teʼtaqlanq saʼ aabʼeen.

LI EETALIL SAʼ LI SANTIL HU. Chʼolchʼo chiru laj Pablo bʼar wank ebʼ li naʼlebʼ li nekeʼtʼanok re. Joʼkan naq kixtzʼiibʼa: «Sa’ linchʼool saʼ li waanm ninsahoʼk rikʼin xChaqʼrabʼ li Yos, abʼanan naweekʼa jun chik li chaqʼrabʼ saʼ li woq saʼ li wuqʼ yo chi xxikʼbʼal rilbʼal li xchaqʼrabʼ linkʼaʼuxl ut nikinxkʼe rubʼel xwankil li xchaqʼrabʼ li maak wank wikʼin» (Romanos 7:22, 23).

TZʼIL AAWIBʼ Bʼar wank rehebʼ li naʼlebʼ li natʼanok aawe nakaawaj xtzolbʼal chanru tattaqlanq saʼ xbʼeen?

Ma tattaqeʼq raj saʼ junaq li taxi ut taaye raj re li winq naq tixsuti laawochoch toj reetal naq t-osoʼq li gasoliin? Peʼyaal naq maamin raj taabʼaanu aʼin? Ut wi taabʼaanu raj, terto tat-elq.

Kʼaru nakaatzol? Wi nakaakʼoxla rubʼelaj kʼaru taabʼaanu saʼ laayuʼam, moko yooqat ta xsutinkil aawibʼ chi maakʼaʼ rajbʼal. Taanaw bʼar xik aawe ut chanru tatwulaq.

LI EETALIL SAʼ LI SANTIL HU. Laj Pablo kixtzʼiibʼa: «Ninʼaanilak inkʼaʼ kamaʼ li moko naxnaw ta bʼar ta yo chi xik» (1 Corintios 9:26). Laj Pablo maajunwa kixbʼeni ribʼ chi maakʼaʼ rajbʼal, ak chʼolchʼo bʼan chiru kʼaru tixbʼaanu ut kixkʼe xchʼool chi xtawbʼal (Filipenses 3:12-14).

TZʼIL AAWIBʼ Tzʼiibʼa oxibʼ li naʼlebʼ li nakaawaj xbʼaanunkil chiru li chihabʼ aʼin.

Wi inkʼaʼ chʼolchʼo chaawu kʼaru nakaapaabʼ, wiibʼaq ru laachʼool. Kokʼaj xsaʼ yooqat xjalinkil ru laanaʼlebʼ re naq chanchanaqat ebʼ laawamiiw, joʼ naxbʼaanu li Kamaleon, li xul aʼin naxjal xbʼonol re naq truuq chi wank saʼ xnaʼaj. Wi nakaabʼaanu aʼin, inkʼaʼ taanaw anihat chi tzʼaqal.

Ut wi inkʼaʼ nakaatzʼeqtaana li nakaapaabʼ, usta ebʼ laawamiiw jalanaqebʼ, inkʼaʼ tsachq saʼ laachʼool anihat.

LI EETALIL SAʼ LI SANTIL HU. Maare saaj chaq laj Daniel naq keʼrisi chiru li xjunkabʼal. Usta joʼkan, junelik kixpaabʼ li xchaqʼrabʼ li Yos (Daniel 1:8). Inkʼaʼ kixkanabʼ chirix xchʼool ani aʼan chi moko kixkanabʼ ta li xpaabʼal.

TZʼIL AAWIBʼ Kʼaru tzʼaqal nakaapaabʼ? Jun li eetalil: Ma nakaapaabʼ naq wank jun Yos? Kʼaʼut? Kʼaʼut chʼolchʼo chaawu naq wank jun Yos?

Ma nakaakʼoxla naq li naʼlebʼ li naxkʼe li Yos nakatxtenqʼa? Kʼaʼut?

Joʼkan bʼiʼ, ma nakaawaj naq tateʼxjuntaqʼeeta rikʼin li qʼeen li nakʼameʼk xbʼaan iqʼ, malaj rikʼin li cheʼ li naxkuy xnumsinkil li nimla kaqsut-iqʼ? Wi nakaawaj naq tateʼxjuntaqʼeeta rikʼin li cheʼ, kʼe aaqʼe re naq inkʼaʼ tsachq saʼ laachʼool anihat. Aʼin tatxtenqʼa chi xsumenkil li patzʼom: Anihin chi tzʼaqal?