Yal kʼoxla li eetalil aʼin: laj Brian naʼok xkʼaʼuxl naq nekeʼok chaq chi nachʼok wiibʼ li rechtzolom. Chiru li xamaan aʼin ak wiibʼ sut kiyeechiʼiik xmay. Ut aʼin li rox sut.

Jun rehebʼ aʼin naxye:

Narisi saʼ xbʼoox ut, naxmutzʼ jun ru, naxyeechiʼi re laj Brian.

Naq laj Brian naril li may saʼ ruqʼ li al, nanimank xkʼaʼuxl.

Wi laaʼat raj laj Brian, kʼaru raj taabʼaanu?

Ma nakaakʼoxla naq ebʼ li rechtzolom laj Brian nekeʼxnaw li nekeʼxbʼaanu? Ma nakaaye naq aʼanebʼ xeʼkʼoxlank re li kʼaru teʼxbʼaanu? Maare inkʼaʼ. Maare nekeʼxbʼaanu li nekeʼxbʼaanu li junchʼol. Nekeʼraj naq kʼulbʼilaqebʼ saʼ li chʼuut, joʼkan naq nekeʼxkanabʼ naq jalan chik ttaqlanq saʼebʼ li xyuʼam.

Wi taakʼul raj ajwiʼ aʼin, ma twulaq raj chaawu xbʼaanunkil jalan chik naʼlebʼ ut xkuybʼal naq teʼxmin aawu?

1. KAWRESI AAWIBʼ

   Li Santil Hu naxye: «Ebʼ li wankebʼ xnaʼlebʼ nekeʼxkʼe retal li maaʼusilal ut nekeʼxkol ribʼebʼ chiru. Abʼanan ebʼ li maakʼaʼebʼ xnaʼlebʼ nekeʼxkʼul li rahilal nachal saʼ xbʼeenebʼ xbʼan naq inkʼaʼ nekeʼxnaw xkʼebʼal retal» (Proverbios 22:3, Wy).

   Wank sut nakʼemank reetal naq nachalk junaq li chʼaʼajkilal. Kʼoxla naq yookat chi bʼeek ut xeʼchalk jun chʼuut chi saaj al ut yookebʼ chi mayibʼk. Wi ak yookat xkʼoxlankil kʼaru li chʼaʼajkilal naru nekeʼxbʼaanu aawe, aʼan tatxtenqʼa chi xnawbʼal chanru taakol aawibʼ.

2. KʼOXLA

   Li Santil Hu naxye: «Ninyal inqʼe chi wank junelik chi tiik linchʼool chiru li Yos» (Hechos 24:16).

   Bʼaanu aawe li patzʼom aʼin: «Chanru twekʼa wibʼ wi tinbʼaanu li nekeʼxbʼaanu li junchʼol?». Maare ebʼ laawechtzolom sa tateʼxkʼul chiru jarubʼaq kutan. Abʼan, chanru taawekʼa aawibʼ moqon? Ma taatzʼeq chirix aachʼool anihat chi tzʼaqal yal re naq sa tateʼril laawechtzolom? (Exodo 23:2).

3. SIKʼ CHIʼUS KʼARU TAABʼAANU

   Li Santil Hu naxye: «Li kʼaru naraw li winq, aʼan ajwiʼ li tixqʼol» (Galatas 6:7).

   Anaqwan malaj wulaj, chiqajunilo naqasikʼ kʼaru tqabʼaanu ut aʼ yaal kʼaru xqasikʼ, joʼkan ajwiʼ tqatoj rix. Li Santil Hu naʼaatinak chirixebʼ li winq li keʼxsikʼ chiʼus kʼaru teʼxbʼaanu, joʼ laj Jose, laj Job ut li Jesus, abʼan keʼwank ajwiʼ li inkʼaʼ keʼxsikʼ chiʼus kʼaru teʼxbʼaanu, joʼ laj Cain, laj Esau ut laj Judas. Kʼaru taabʼaanu laaʼat?

Li Santil Hu naxye naq «li tiik xchʼool rikʼin li qʼaxal kachʼin, tiikaq ajwiʼ xchʼool rikʼin li naabʼal» (Lucas 16:10). Wi ak xaakʼoxla kʼaru naru nakaakʼul ut ak xaasikʼ kʼaru taabʼaanu, xseeraqʼinkil li nakaakʼoxla maare moko chʼaʼaj ta joʼ yookat xkʼoxlankil. Ut taataw rusilal wi nakaabʼaanu.

Miʼok aakʼaʼuxl, moko taakʼe ta jun li nimla seeraqʼ rehebʼ laawechtzolom. Tzʼaqal rikʼin xyeebʼal inkʼaʼ. Ut taakanabʼ chi chʼolchʼo chiruhebʼ naq inkʼaʼ taajal laakʼaʼuxl, ut naru nakaaye:

• «Minaakʼe saʼ ajl».

• «Laaʼin inkʼaʼ ninbʼaanu li naʼlebʼ aʼin».

• «Ak nakaanaw kʼaru ninkʼoxla».

Wi tatsumenq saʼ junpaat ut inkʼaʼ tatxuwaq, aʼan ttenqʼanq aawe. Wi joʼkan taabʼaanu, maare tsachq aachʼool chi rilbʼal naq saʼ junpaat teʼxkanabʼ aaminbʼal.

Maare ebʼ laawechtzolom tateʼxkʼe saʼ xutaan. Naru teʼxye aawe: «Kʼaru nakaakʼul? Ma nakatxuwak?». Aʼin li aatin nekeʼroksi ebʼ li nekeʼminok u. Kʼaru tatruuq xyeebʼal? Wank wiibʼ li naʼlebʼ chaawu:

• Xkʼulubʼankil li raatin. Naru nakaaye: «Yaal li nakaaye, inkʼaʼ tinruuq xbʼaanunkil». Chirix chik aʼan taachʼolobʼ rikʼin wiibʼ oxibʼ li aatin kʼaʼut inkʼaʼ taabʼaanu.

• Xsuqʼusinkil li raatin. Taachʼolobʼ chiru kʼaʼut inkʼaʼ nakaabʼaanu, tojaʼ naq taaye re: «Ebʼ li nekeʼxnaw kʼoxlak joʼ laaʼat inkʼaʼ raj teʼmayibʼq».

Wi inkʼaʼ nekeʼxkanabʼ xminbʼal aawu, ayu. Jultikoʼq aawe: wi nakatkanaak chi rabʼinkilebʼ, chʼaʼajkaq chaawu elk chiruhebʼ. Wi nakatxik, taakʼutbʼesi naq laaʼat nakattaqlank saʼ xbʼeen laayuʼam.

Aʼin nakʼulmank: yalaq ani naxkʼul li mineʼk. Usta yaal aʼin, laaʼat yaal aawe chanru tatnaʼlebʼaq, chʼolchʼo ru taaye li nakaakʼoxla ut maakanabʼ naq teʼtaqlanq saʼ aabʼeen. Kaʼajwiʼ laaʼat yaal aawe kʼaru nakaawaj (Josue 24:15).