Yal kʼoxla li eetalil aʼin: laj David yook chi xik saʼ li xbʼelebʼaal chʼiichʼ saʼ jun li naʼaj li maajunwa rilom. Naq naril li xkʼabʼaʼ ebʼ li bʼe ut ebʼ li ochoch, naxkʼe reetal naq moko aʼan ta li naʼajej li yook xsikʼbʼal, xsach. Inkʼaʼ kixkʼe reetal chanru kixjal ru xbʼe.

Wi laaʼat raj laj David, kʼaru raj taabʼaanu?

Wank chaawu wiibʼ oxibʼ li naʼlebʼ:

1. Taapatzʼ re junaq li poyanam chanru tatwulaq saʼ li naʼaj aʼan.

2. Taawil li reetalil li tenamit malaj taawoksi jun li GPS.

3. Inkʼaʼ tatxaqliiq toj reetal taataw laabʼe.

Chʼolchʼo tzʼaqal naq li naʼlebʼ C moko us ta.

Li naʼlebʼ B wank rusilal chiru li xbʼeen naʼlebʼ: roksinkil li reetalil li tenamit malaj li GPS, tatxtenqʼa chi xtawbʼal laabʼe.

Joʼkan ajwiʼ li Santil Hu naru nakatxtenqʼa.

Li tasal hu, li nakʼayimank chi naabʼal, naru:

• Tixkʼe aanaʼlebʼ naq taanumsi junaq li chʼaʼajkilal.

• Tatxtenqʼa chi xnawbʼal anihat chi tzʼaqal ut re naq chaabʼilaqat.

• Tixkʼut chaawu chanru wanqat chiʼus.

Chalen naq naqatzol aatinak, nokooʼok chi patzʼok:

• Kʼaʼut raxmuyink ru li choxa?

• Chanru yiibʼanbʼil ebʼ li chahim?

Chirix chik aʼan nokooʼok xbʼaanunkil ebʼ li patzʼom chirix li naqakʼul:

• Kʼaʼut naqakʼul li rahilal?

• Kʼaʼut nokookamk?

Ma nakaanaw naq li Santil Hu naxsume ebʼ li patzʼom aʼin?

Naabʼalebʼ nekeʼxye naq yoobʼanbʼil ut seeraqʼinbʼil aatin wank saʼ li Santil Hu, naq maakʼaʼ chik rusilal malaj chʼaʼaj xtawbʼal ru. Abʼan ma yaal aʼin? Ma yaal nekeʼxye chirix li Santil Hu? Maare yal inkʼaʼ chʼolchʼo chiruhebʼ.

Ebʼ li qas qiitzʼin nekeʼxkʼoxla naq li Santil Hu naxye naq li Yos najolomink re li ruuchichʼochʼ. Abʼan ma yaal tawiʼ? Maakʼaʼ chik rusilal li ruuchichʼochʼ. Yalaq bʼar naqil rahil chʼoolejil ut rahilal, yajel ut kamk, nebʼaʼil ut sachok. Wi li Yos nokooxra, ma aʼan tawiʼ nabʼaanunk re aʼin?

Ma twulaq raj chaawu xnawbʼal ani najolomink re li ruuchichʼochʼ? Tsachq aachʼool xnawbʼal chanru naxsume aʼin li Santil Hu.

Xaakʼe tana reetal naq ebʼ li naʼlebʼ li wank saʼ li hu aʼin isinbʼil chaq saʼ li Santil Hu. Ebʼ laj Testiiw re li Jehobʼa chʼolchʼo chiruhebʼ naq li Santil Hu naru nokooxbʼeresi xbʼaan naq «musiqʼanbʼil xbʼaan li Yos ut nakʼanjelak re kʼutuk, re qʼusuk, re kʼehok naʼlebʼ» (2 Timoteo 3:16, 17). Maatzʼeq laamaatan re xnawbʼal ru li tasal hu aʼin, usta najteril hu, nakʼanjelak saʼebʼ li qakutan.