Rajlal chihabʼ li qamolam joʼ aj Testiiw re li Jehobʼa naxyiibʼ ut naxjekʼi chi maakʼaʼ xtzʼaq naabʼal li Santil Hu ut li tasal hu. Joʼkan ajwiʼ, naxyiibʼ ebʼ li Xmolam ut ebʼ li Chʼutlebʼaal Kabʼl. Ut naxchʼoolanihebʼ li nekeʼkʼanjelak saʼ li ochoch Betel, li taqlanbʼilebʼ saʼ jalan chik tenamit chi xpuktesinkil Raatin li Yos. Ut joʼkan ajwiʼ, nekeʼtenqʼank naq nachalk junaq li nimla rahilal saʼ xbʼeenebʼ li qech aj paabʼanel. Joʼkan naq maare nakaakʼoxla, bʼar nachalk xtuminal chixjunil aʼin?

Inkʼaʼ naqapatzʼ xlajeetqil li tojlebʼ chi moko nokoopatzʼok ta tumin. Usta terto naʼelk xpuktesinkil li chaabʼil esilal, inkʼaʼ nokoopatzʼok tumin. Li xkabʼ tasal hu La Atalaya li xʼisimank maare jun siiʼent chihabʼ anaqwan, kixye naq chʼolchʼo chiqu naq li Jehobʼa junelik nokooxtenqʼa. Ut kixye ajwiʼ naq «maajunwa toolemooxinq chi moko tootzʼaamanq tumin re naq tooʼeʼxtenqʼa chi xbʼaanunkil xkʼanjel li Yos». Ut joʼkan tzʼaqal nabʼaanumank saʼebʼ li qakutan (Mateo 10:8).

Li xkʼanjel li Yos nabʼeeresimank rikʼin li joʼchʼinal joʼnimal naʼalaak saʼ li qachʼool. Naabʼalebʼ nekeʼtenqʼank rikʼin tumin xbʼaan naq oxloqʼ chiruhebʼ li xkʼanjel li Yos. Ut ebʼ laj Testiiw re li Jehobʼa nekeʼxkʼe ajwiʼ xhoonal, xtumin ut nekeʼroksi yalaq kʼaru chi naʼlebʼil re xbʼaanunkil li Rajom li Yos saʼ chixjunil li Ruuchichʼochʼ (1 Cronicas 29:9). Saʼ li Chʼutlebʼaal Kabʼl ut saʼebʼ li nimla chʼutam wankebʼ li kaax bʼarwiʼ nachʼutlaak li tumin. Saʼebʼ li kaax aʼin nakʼeemank joʼchʼinal joʼnimal t-alaaq saʼ xchʼoolebʼ li nekeʼwulak saʼ li chʼutam. Naru roksinkil ajwiʼ li qanaʼaj saʼ Internet jw.org re xkʼebʼal li tenqʼ. Moko bʼihomebʼ ta li nekeʼkʼehok tumin saʼebʼ li kaax aʼin, chanchanebʼ li malkaʼan li kixkʼe wiibʼ ajwiʼ li kokʼ tumin saʼ xkaaxil li Rochoch li Yos (Lucas 21:1-4). Joʼkan naq, li junjunq «chixkʼuulahaq [...] joʼchʼinal joʼnimal xruhank xxokbʼal» re naq truuq xkʼeebʼal li «naʼalaak saʼ xchʼool» (1 Corintios 16:2; 2 Corintios 9:7).

Chʼolchʼo chiqu naq li Jehobʼa inkʼaʼ tixkanabʼ reekʼasinkil xchʼool li nekeʼraj xkʼeebʼal xloqʼal rikʼin li kʼaru rehebʼ re naq teʼtzʼaqonq chirix li xkʼanjel li Yos, ut chi joʼkan ttzʼaqloq ru li Rajom li Yos (Proverbios 3:9, Wy).

• Kʼaru xjalanilebʼ laj Testiiw re li Jehobʼa rikʼinebʼ li paabʼal?

• Chanru naʼoksimank li tumin li nachʼutlaak?