Chi seebʼ nakamk li Jesus, naq kixye: «Taapuktesimanq li chaabʼil esilal [...] chirix li xnimajwal wankilal li choxa saʼ chixjunil li ruuchichʼochʼ re xchʼolobʼankil li yaal chiruhebʼ chixjunil li tenamit: tojaʼ naq taachalq li rosoʼjik» (Mateo 24:14). Abʼan, chanru tbʼaanumanq raj li kʼanjel aʼin saʼ chixjunil li Ruuchichʼochʼ? Tbʼaanumanq raj joʼ kixbʼaanu li Jesus naq kiwank arin saʼ Ruuchichʼochʼ (Lucas 8:1).

Naqasikʼebʼ li qas qiitzʼin saʼebʼ li rochoch. Li Jesus kixkʼut chiruhebʼ li xtzolom xpuktesinkil li chaabʼil esilal chire kabʼlal (Mateo 10:11-13; Hechos 5:42; 20:20). Ebʼ li xbʼeen xtzolom li Jesus keʼyeheʼk re saʼ kʼaru chi tenamit teʼxik xpuktesinkil li chaabʼil esilal (Mateo 10:5, 6; 2 Corintios 10:13). Saʼebʼ li qakutan, kʼubʼkʼuuko ajwiʼ chiʼus, li junjunq chi chʼuut ak naxnaw bʼar tento txik xyeebʼal Raatin li Yos. Li naʼlebʼ aʼin nokooxtenqʼa chi xbʼaanunkil chiʼus li kʼanjel li taqlanbʼilo wiʼ xbʼaan li Jesus «xpuktesinkil resil» li Raatin li Yos ut xchʼolobʼankil li yaal chiruhebʼ li qas qiitzʼin (Hechos 10:42).

Naqakʼe qaqʼe chi xik yalaq bʼar chi xtawbʼalebʼ li poyanam. Li Jesus kixpuktesi ajwiʼ li chaabʼil esilal bʼarwiʼ wankebʼ naabʼal li poyanam, chire li palaw malaj chire li bʼekbʼil haʼ (Marcos 4:1; Juan 4:5-15). Laaʼo ajwiʼ yalaq bʼar naqoksi li Santil Hu, saʼatqebʼ li bʼe, saʼebʼ li kʼayibʼaal, bʼarwiʼ nekeʼxik chi bʼeek, malaj saʼ li aatinobʼaal chʼiichʼ. Naqapuktesi li chaabʼil esilal rikʼinebʼ li qechkabʼal, rikʼinebʼ li qech tzolom ut naq naxkʼe ribʼ chiqu naqaye rehebʼ li qakomon. Chixjunil li naʼlebʼ aʼin nokooxtenqʼa chi xbʼaanunkil li naxye qe li Santil Hu: «Chepuktesi resil li xkolom» li Jehobʼa rehebʼ li qas qiitzʼin li wankebʼ saʼ xbʼeen li Ruuchichʼochʼ (Salmo 96:2).

Anaqwan kʼoxla re ani taawaj raj xkʼeebʼal resil li Xʼawabʼejilal li Yos ut li osobʼtesink li tixkʼam chaq. Kʼe chi naweʼk li yookat xtzolbʼal, maakanabʼ saʼ laachʼool!

• Kʼaru «li chaabʼil esilal» tento tqakʼe chi naweʼk?

• Chanru yookebʼ xkʼambʼal rehebʼ laj Testiiw re li Jehobʼa rikʼin li Jesus naq nekeʼxpuktesi li chaabʼil esilal?