Chalen chaq najter qʼe kutan, li Jehobʼa kiraj naq ebʼ li junkabʼal wanqebʼ saʼ junajil re naq teʼxkawresi li xpaabʼal ut xraabʼal ribʼebʼ (Deuteronomio 6:6, 7). Joʼkan naq, ebʼ laj Testiiw re li Jehobʼa jun sut chiru li xamaan nekeʼxtzol junaq li naʼlebʼ chirix li Yos li ttenqʼanq rehebʼ ut chi joʼkan nekeʼxkʼe xhoonal re Xloqʼoninkil li Yos saʼ Junajil joʼ Junkabʼal. Ut wi aajunes tento taatzol ajwiʼ junaq li naʼlebʼ li nawulak chaawu, re naq wanqat chixkʼatq li Yos.

Nokooxtenqʼa chi wank chixkʼatq li Jehobʼa. «Jilonqex chi xkʼatq li Yos, ut aʼan taajiloq chekʼatq» (Santiago 4:8). Naqanaw ru chiʼus li Jehobʼa naq naqatzol saʼ li Santil Hu chirix li xbʼaanuhom ut li xnaʼlebʼ. Jun rehebʼ li naʼlebʼ li ttenqʼanq qe chi xloqʼoninkil li Yos joʼ junkabʼal: xyaabʼasinkil chi kawil kuxej ebʼ li raqal li Santil Hu li ttzʼilmanq rix saʼ li chʼutam Qayuʼam ut Qakʼanjel saʼ li xamaan wanko wiʼ. Naru nekeʼxjekʼi ebʼ li raqal li Santil Hu chirixebʼ joʼ junkabʼal chirix chik aʼan teʼxseeraqʼi kʼaru xeʼxtzol chirix li Raatin li Yos.

Nokooxtenqʼa chi wank saʼ junajil rikʼin li qajunkabʼal. Wi li junkabʼal nekeʼxtzol xsaʼ li Santil Hu saʼ komonil: bʼeelomej ut ixaqilbʼej, yuwaʼbʼej ut kʼajolbʼej, teʼruuq chi wank saʼ junajil. Us raj naq chixjunilebʼ sahaqebʼ saʼ xchʼool chi roybʼeeninkil xkutankil ut xhoonalil naq teʼxchʼutubʼ ribʼ joʼ junkabʼal re xtzolbʼal xsaʼ li Santil Hu. Ebʼ li yuwaʼbʼej naru nekeʼxsikʼ junaq li naʼlebʼ isinbʼil chaq saʼ li tasal hu La Atalaya ut saʼ ¡Despertad!, malaj saʼ jw.org li wank saʼ Internet, aʼ yaal kʼaru xchihabʼebʼ li xkokʼal. Ut wi wank xchʼaʼajkilal ebʼ li kokʼal saʼ li tzolebʼaal naru nekeʼxsikʼ chanru teʼxtuqubʼ ru. Naru teʼril junaq li bʼideo li wank saʼ JW Broadcasting (tv.pr418.com) ut chirix chik aʼan teʼxye joʼ junkabʼal li xeʼxtzol chirix. Ut naru teʼxtzol ajwiʼ kʼaru nekeʼxye ebʼ li bʼich li naqabʼi saʼebʼ li qachʼutam, ut naq teʼraqeʼq xloqʼoninkil li Yos saʼ junajil naru nekeʼxtzaka junaq li xsahil eechej.

Wi rajlal xamaan nekeʼxkʼe xhoonal re xloqʼoninkil li Jehobʼa joʼ junkabʼal, aʼan ttenqʼanq rehebʼ re naq sahaqebʼ saʼ xchʼool chi xtzolbʼal xsaʼ li Santil Hu ut li Jehobʼa t-osobʼtesinq rehebʼ xbʼaan naq yookebʼ xkʼeebʼal xqʼe chi xloqʼoninkil ru saʼ junajil (Salmo 1:1-3).

• Kʼaʼut aajel ru naq jun sut chiru xamaan naqaloqʼoni ru li Yos saʼ junajil joʼ junkabʼal?

• Kʼaru tento teʼxbʼaanu li naʼbʼej yuwaʼbʼej re naq chixjunilebʼ sahaqebʼ saʼ xchʼool naq teʼtzoloq joʼ junkabʼal chirix li Santil Hu?