KʼARU yook chi kʼulmank saʼ li eetalil? Li chʼinaʼal aʼin kixkol jun li karneer saʼ ruqʼ jun li oso. Li xul aʼin kixkʼam jun li chʼina karneer. Joʼkan naq li chʼinaʼal kixtochʼ li oso ut kixkol li karneer. Naq li oso kiwakli, li chʼinaʼal kixkamsi. Kixkol ajwiʼ jun li karneer saʼ ruqʼ jun li kaqkoj. Kaw ribʼ li chʼinaʼal. Abʼan, ma nakaanaw ani li chʼinaʼal aʼin?

Li chʼinaʼal aʼan laj David ut Belen kiyoʼlaak chaq. Li xyuwaʼchin laj David aʼan laj Obed. Li xnaʼ xyuwaʼ laj Obed aʼan li xRut ut laj Boaz. Li xyuwaʼ laj David aʼan laj Jese. Laj David naril xkarneer li xyuwaʼ. Ak 10 chihabʼ rokik chi awabʼejink laj Saul naq kiyoʼlaak laj David.

Kiwulak xkutankil naq li Jehobʼa kixye re laj Samuel: ‹Kʼam li aseeyt saʼ rochoch laj Jese. Xbʼaan naq xinsikʼ ru jun rehebʼ li ralal choʼq awabʼej›. Naq laj Samuel kiril ru laj Eliab, li xbʼeen ralal laj Jese, kixkʼoxla: ‹Aʼin tana sikʼbʼil ru xbʼaan li Jehobʼa›. Abʼan li Jehobʼa kixye re: ‹Maawil xchʼinaʼusal chi moko li xnajtil roq. Moko aʼan ta xinsikʼ ru›.

Tojaʼ naq laj Jese kixbʼoq laj Abinadab ut kixkʼe chiru laj Samuel. Laj Samuel kixye: ‹Moko aʼan ta sikʼbʼil ru xbʼaan li Jehobʼa›. Chirix chik aʼan laj Jese kixkʼam laj Samah, li ralal, chiru laj Samuel. Tojaʼ naq laj Samuel kixye: ‹Moko aʼan ta sikʼbʼil ru xbʼaan li Jehobʼa›. Laj Jese kixkʼamebʼ wuqubʼ li ralal chiru laj Samuel, abʼan maajun rehebʼ keʼsikʼeʼk ru. Joʼkan naq kixye laj Samuel: ‹Ma aʼin chixjunilebʼ laawalal?›

Laj Jese kixye re: ‹Wank jun chik li walal toj saaj, abʼan yook chaq rilbʼalebʼ li karneer›. Naq laj Samuel kiril laj David, kixkʼe reetal naq chʼinaʼus naʼilok. Tojaʼ naq li Jehobʼa kixye re laj Samuel: ‹Aʼin xinsikʼ ru. Kʼe li aseeyt saʼ xjolom›. Laj Samuel kixbʼaanu li kixye li Jehobʼa. Moqon chik, laj David kikanaak choʼq awabʼej saʼ li tenamit Israel.