SAʼ LI Santil Hu wank jun li tasal hu, Rut xkʼabʼaʼ. Chisaʼ wank resil jun li junkabʼal. Li junkabʼal aʼin, keʼwank naq ebʼ laj raqol aatin yookebʼ chi jolomink saʼ li tenamit Israel. Li xRut aʼan jun li ixqaʼal kichalk saʼ li tenamit Moab. Li xRut kixra li Jehobʼa xbʼaan naq kixtzol naq aʼan li tzʼaqal Yos. Li xNoemi aʼan jun li cheekel ixq li kitenqʼank re li xRut chi xnawbʼal ru li Jehobʼa.

Li xNoemi kiyoʼlaak saʼ li tenamit Israel. Naq kiʼok chi raqeʼk li tzakahemq saʼ li tenamit Israel, li xNoemi ut li xbʼeelom kohebʼ saʼ li tenamit Moab ut keʼxkʼam chirixebʼ li wiibʼ xkokʼal. Chirix chik aʼan, kikamk li xbʼeelom li xNoemi ut ebʼ li xyum keʼsumlaak rikʼin wiibʼ li ixqaʼal aj Moab. Lajeebʼ chihabʼ tana xsumlajikebʼ xyum li xNoemi rikʼin xRut ut xʼOrpa naq keʼkamk. Ra saʼ xchʼool xNoemi! Kʼaru tixbʼaanu anaqwan?

Saʼ jun kutan li xNoemi kisutqʼiik saʼ li xtenamit. Li xRut ut xʼOrpa keʼraj wank rikʼin li xNoemi, joʼkan naq xkohebʼ chirix. Ak naabʼal kutan xikikebʼ naq li xNoemi kixye rehebʼ li ixqaʼal: ‹Sutqʼinqex saʼ leetenamit ut ayuqex rikʼin leenaʼ›.

Li xNoemi kixchaqʼrabʼihebʼ ut kixtzʼubʼebʼ ru. Ebʼ li ixqaʼal keʼok chi yaabʼak xbʼaan naq nekeʼxra li xNoemi. Joʼkan naq keʼxye: ‹Laaʼo tooxik chaawix saʼ laatenamit›. Li xNoemi kixye rehebʼ: ‹Tento naq texsutqʼiiq rikʼin leekomon, us wanqex aran›. Joʼkan naq li xʼOrpa kisutqʼiik saʼ li xtenamit. Abʼan li xRut kikanaak rikʼin li xNoemi.

Tojaʼ naq li xNoemi kixye re li xRut: ‹Kʼe reetal li xʼOrpa kisutqʼiik, ayu ajwiʼ laaʼat chirix›. Li xRut kixye: ‹Maaye chik we naq tatinkanabʼ! Kanabʼin chi xik chaawix, bʼaanu usilal! Bʼar tatxik aran tinxik; bʼar wanqat aran wanqin. Laatenamit aʼanaq ajwiʼ lintenamit; laaYos aʼanaq ajwiʼ linYos. Bʼar tatkamq aran ajwiʼ tinkamq›. Naq li xRut kixye chixjunil aʼin, li xNoemi kixkanabʼ xyeebʼal re xRut naq tsutqʼiiq.

Joʼkan naq li xRut ut li xNoemi keʼwulak Israel ut aran keʼkanaak. Li xRut kiʼok chi kʼanjelak saʼ junpaat xbʼaan naq ak xqʼehil xsikʼbʼal li sebʼaad. Jun li winq aj Boaz xkʼabʼaʼ kixkanabʼ naq li xRut tsikʼoq sebʼaad saʼ li xchʼochʼ. Ma nakaanaw ani xkʼabʼaʼ xnaʼ laj Boaz? Aʼan li xRahab li kiwank chaq saʼ li tenamit Jerico.

Saʼ jun kutan laj Boaz kixye re li xRut: ‹Ninnaw naq chaabʼilat rikʼin li xNoemi. Ninnaw ajwiʼ naq xaakanabʼ laanaʼ laayuwaʼ ut laatenamit. Xatchalk saʼ li tenamit aʼin li maajunwa aanawom ru. Li Jehobʼa t-osobʼtesinq aawe!›

Li xRut kixye re laj Boaz: ‹Kʼajoʼ aachaabʼilal wikʼin. Rikʼin laawaatin xaakʼojobʼ linchʼool!› Laj Boaz kiril naq li xRut chʼinaʼus ut kisumlaak rikʼin. Kʼajoʼ kisahoʼk saʼ xchʼool li xNoemi naq keʼsumlaak! Abʼan kinumtaak xsahil xchʼool li xNoemi naq kiyoʼlaak laj Obed, li ralal laj Boaz rikʼin xRut. Li xyuwaʼchin laj David aʼan laj Obed. Moqon chik tqatzol ani laj David.