TZOLOM 04
Ani li Yos?
Chalen chaq saʼ xtiklajik ebʼ li kristiʼaan nekeʼxloqʼoni jalan jalanq chi yos. Abʼan li Santil Hu naʼaatinak chirix jun li Yos li «jwal nim chiru chixjunilebʼ li jalanil yos» (2 Crónicas 2:5). Ani li Yos aʼan? Ut, kʼaʼut naq wank xwankil chiruhebʼ li junchʼol chi yos li nekeʼxloqʼoni li kristiʼaan? Saʼ li tzolom aʼin taatzol kʼaru naraj li Yos naq taanaw chirix.
1. Ani xkʼabʼaʼ li Yos, ut chanru naxkʼutbʼesi naq naraj naq tqanaw li xkʼabʼaʼ?
Li Yos naxkʼe chi naweʼk li xkʼabʼaʼ saʼ li Santil Hu naq naxye: «Laaʼin li Jehobʼa. Aʼin linkʼabʼaʼ» (Isaías 42:5, 8, TNM). Li kʼabʼaʼej Jehobʼa chalenaq saʼ li aatinobʼaal hebreo, ut naraj xyeebʼal «aʼan tixbʼaanu li naraj». Li Jehobʼa naraj naq tqanaw li xkʼabʼaʼ (Éxodo 3:15, TNM). Chanru naqanaw aʼin? Xbʼaan naq numenaq 7,000 sut a natawmank li xkʼabʼaʼ saʼ li Santil Hu. Li xkʼabʼaʼ li Yos, aʼan Jehobʼa «joʼ saʼ choxa joʼ saʼ ruuchichʼochʼ» (Deuteronomio 4:39).
2. Kʼaru naxye qe li Santil Hu chirix li Jehobʼa?
Li Santil Hu naxye naq kaʼajwiʼ li Jehobʼa aʼan li tzʼaqal Yos saʼ xyanqebʼ li jalanil yos li nekeʼxloqʼoni li kristiʼaan. Kʼaʼut? Wank naabʼal li xyaalal. Li Jehobʼa aʼan li nim xwankil «saʼ xbʼeen chixjunil li Ruuchichʼochʼ» (Salmo 83:18, TNM). Aʼan li «Nimajwal Yos», li naraj xyeebʼal naq wank xwankil re xbʼaanunkil chixjunil li naraj. Aʼan laj Yobʼtesinel li kiyiibʼank re li choxa, li Ruuchichʼochʼ ut chixjunil li wank xyuʼam (Apocalipsis 4:8, 11). Joʼkan ajwiʼ kaʼajwiʼ li Jehobʼa ak wank chaq ut wanq chi junelik (Salmo 90:2).
QASIKʼAQ XCHAMAL LI NAʼLEBʼ
Tzol kʼaru xjalanil ebʼ li ruuchil kʼabʼaʼej li nayeemank re li Yos rikʼin li xkʼabʼaʼ. Tzol ajwiʼ chanru naxkʼe chi naweʼk li xkʼabʼaʼ ut kʼaʼut naraj naq tqanaw li xkʼabʼaʼ.
3. Wank naabʼal li ruuchil xkʼabʼaʼ li Yos abʼan jun ajwiʼ li xkʼabʼaʼ
Re xtawbʼal xjalanil li uuchil kʼabʼaʼej li nayeemank re junaq li kristiʼaan rikʼin li xkʼabʼaʼ, cheerilaq li BʼIDEO ut chexʼaatinaq chirix li patzʼom aʼin:
-
Chʼolobʼ xjalanil ebʼ li ruuchil xkʼabʼaʼ li Yos rikʼin li xkʼabʼaʼ.
Li Santil Hu naxye naq ebʼ li kristiʼaan nekeʼxloqʼoni jalan jalanq li yos. Cheeyaabʼasi Salmo 136:1-3, TNM, ut chexʼaatinaq chirix li patzʼom aʼin:
-
Ani «li tzʼaqal Yos li nim xwankil saʼ xbʼeenebʼ li jalanil yos» ut «li Qaawaʼ li nim xwankil saʼ xbʼeenebʼ li qaawaʼ?».
4. Li Jehobʼa naraj naq laaʼat taanaw li xkʼabʼaʼ ut taawoksi
Chanru naqanaw naq li Jehobʼa naraj naq taanaw li xkʼabʼaʼ? Cheerilaq li BʼIDEO ut chexʼaatinaq chirix li patzʼom aʼin:
-
Kʼaʼut nakaaye naq li Jehobʼa naraj naq taanaw li xkʼabʼaʼ?
Li Jehobʼa naraj naq ebʼ li kristiʼaan teʼroksi li xkʼabʼaʼ. Cheeyaabʼasi Romanos 10:13, TNM, ut chexʼaatinaq chirix ebʼ li patzʼom aʼin:
-
Kʼaʼut aajel ru roksinkil li xkʼabʼaʼ li Jehobʼa?
-
Kʼaru nakaawekʼa naq nekeʼxye laakʼabʼaʼ?
-
Kʼoxla aʼin, kʼaru tawiʼ narekʼa li Jehobʼa naq naqoksi li xkʼabʼaʼ?
5. Li Jehobʼa naraj naq laaʼataq li ramiiw
Li xSoten li wank Camboya, naxye naq li qʼaxal chaabʼil li kixkʼul saʼ li xyuʼam aʼan xnawbʼal naq wank xkʼabʼaʼ li Yos. Cheerilaq li BʼIDEO ut chexʼaatinaq chirix li patzʼom aʼin:
-
Kʼaru kirekʼa li xSoten naq kixnaw li xkʼabʼaʼ li Yos?
Naq naqaj naq junaq li kristiʼaan twanq choʼq qamiiw, xbʼeenwa naqapatzʼ li xkʼabʼaʼ. Cheeyaabʼasi Santiago 4:8a ut chexʼaatinaq chirix ebʼ li patzʼom aʼin:
-
Kʼaru naraj li Jehobʼa naq taabʼaanu?
-
Ma nakaapaabʼ naq xnawbʼal ut roksinkil li xkʼabʼaʼ li Yos tatxtenqʼa re naq tatjiloq chixkʼatq? Kʼaʼut?
WIIBʼ OXIBʼ NEKEʼXYE: «Jun ajwiʼ li Yos, maakʼaʼ naxye chanru tqaye re».
-
Ma nakaapaabʼ naq li xkʼabʼaʼ li Yos, aʼan Jehobʼa?
-
Chan raj ru taachʼolobʼ naq li Yos naraj naq tqoksi li xkʼabʼaʼ?
LI AK XQATZOL
Li xkʼabʼaʼ li tzʼaqal Yos, aʼan Jehobʼa. Aʼan naraj naq tqanaw ut tqoksi li xkʼabʼaʼ re naq toowanq choʼq ramiiw.
Qajultikaq
-
Kʼaru xjalanil li Jehobʼa rikʼin li junchʼol chi yos li nekeʼxloqʼoni ebʼ li kristiʼaan?
-
Kʼaʼut tento tqoksi li xkʼabʼaʼ li Yos?
-
Kʼaru naxkʼutbʼesi naq li Yos naraj naq tatwanq choʼq ramiiw?
SIKʼ XKOMON LI NAʼLEBʼ
Tzʼil rix 5 li naʼlebʼ li tixkʼutbʼesi chaawu naq wank jun li Yos.
Tzol kʼaʼut naq wank xyaalal xpaabʼankil naq junelik wank chaq li Yos.
«Ma wank ani kiyobʼtesink re li Yos?» (Laj Kʼaakʼalehom, 1 re agosto 2014)
Tzol kʼaʼut tento tqoksi li xkʼabʼaʼ li Yos usta inkʼaʼ nanawmank chanru nayeemank chaq junxil.
Ma wank xwankil kʼaru li kʼabʼaʼ naqaye re li Yos? Kʼe reetal kʼaʼut naqaye naq jun ajwiʼ xkʼabʼaʼ li Yos.
a Re xtawbʼal xkomon li naʼlebʼ chirix li xkʼabʼaʼ li Yos ut kʼaʼut naq saʼ wiibʼ oxibʼ li Santil Hu xeʼrisi, chaawil li tasal 1 re li hu Li tooxtenqʼa chi xtzolbʼal Raatin li Yos.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
