TZOLOM 06
Chanru kitiklaak li yuʼam?
At Yos «aawikʼin wank li xyoʼlebʼaal li yuʼam» (Salmo 36:10). Ma nakaapaabʼ aʼin? Wankebʼ li kristiʼaan nekeʼxkʼoxla naq maaʼani kiyobʼtesink re li yuʼam. Wi yaal raj aʼin maakʼaʼ raj aj e naq wanko arin. Wi li Jehobʼa kiyobʼtesink re chixjunil, wank xyaalal kʼaru aj e naq wanko arin. a Tzʼil rix li naxye li Santil Hu chirix li xtiklajik li yuʼam ut kʼe reetal kʼaʼut naq paabʼajel li naxye.
1. Ani kiyiibʼank re li choxa ut li Ruuchichʼochʼ?
Li Santil Hu naxye: «Saʼ xtiklajik chaq li Yos kixyoobʼtesi li choxachʼochʼ» (Génesis 1:1). Li nekeʼxtzʼil rix li jalan jalanq chi naʼlebʼ nekeʼxkʼoxla naq wank xtiklajik li choxa ut li Ruuchichʼochʼ. Chanru kixyobʼtesi aʼin li Yos? Kiroksi li xsantil musiqʼej re xyiibʼankil ebʼ li chahim ut chixjunil chik li wank saʼ choxa (Génesis 1:2).
2. Kʼaru aj e naq li Yos kixyiibʼ li Ruuchichʼochʼ?
Li Jehobʼa «moko kixyiibʼ ta chi maakʼaʼ xyaalal, re bʼan naq taatenamitoʼq» (Isaías 45:18). Aʼan kixyiibʼ chi chaabʼil li Ruuchichʼochʼ re naq ebʼ li kristiʼaan teʼwanq chi sahebʼ saʼ xchʼool (yaabʼasi Isaías 40:28; 42:5). Ebʼ li nekeʼxtzʼil rix li jalan jalanq chi naʼlebʼ nekeʼxye naq maakʼaʼ chik junaq li naʼajej joʼ li Ruuchichʼochʼ. Kaʼajwiʼ saʼ Ruuchichʼochʼ naru nekeʼwank ebʼ li kristiʼaan.
3. Kʼaru xjalanil ebʼ li kristiʼaan rikʼinebʼ li xul?
Naq li Jehobʼa ak kixyiibʼ li Ruuchichʼochʼ kixyobʼtesi chixjunil li wank xyuʼam. Xbʼeenwa kixyobʼtesi ebʼ li cheʼkʼaam ut ebʼ li xul. Moqon «li Yos kixyoobʼtesi li poyanam joʼ xjalam u» (yaabʼasi Génesis 1:27). Kʼaʼut naq moko juntaqʼeeto ta rikʼinebʼ li xul? Xbʼaan naq li Yos xooxyobʼtesi joʼ xjalam u, naru naqakʼutbʼesi li xninqal ru xnaʼlebʼ joʼ li rahok ut li tiikilal. Kixkʼe xseebʼal qachʼool re xtzolbʼal jalan chik chi aatinobʼaal, re naq tsahoʼq qachʼool rikʼin bʼichank, xajok ut rikʼin rilbʼal li xchʼinaʼusal li xyobʼtesihom. Ebʼ li xul inkʼaʼ nekeʼxnaw loqʼonink abʼan laaʼo naqaloqʼoni ru li Jehobʼa.
QASIKʼAQ XCHAMAL LI NAʼLEBʼ
Qilaq kʼaru nakʼutbʼesink re naq li Yos kiyobʼtesink re chixjunil ut kʼaʼut naq paabʼajel li naxye li Santil Hu chirix li yobʼtesihom. Qilaq ajwiʼ kʼaru naxkʼut chiqu chirix li Jehobʼa li chaabʼil naʼlebʼ li nekeʼxyuʼami li kristiʼaan.
4. Wank ani kikʼubʼank re chixjunil li wank xyuʼam
Nakʼemank xloqʼal ebʼ li kristiʼaan li nekeʼril chanru yiibʼanbʼil li yobʼtesihom re xyiibʼankil ebʼ li kʼaʼaq re ru. Abʼan, ani nakʼehok re xloqʼal laj Yobʼtesinel? Cheerilaq li BʼIDEO ut chexʼaatinaq chirix li patzʼom aʼin:
-
Rikʼin kʼaru li yobʼtesihom nekeʼxkʼam wiʼ re li winq re xyiibʼankil junaq li kʼaʼaq re ru?
Wank ani kikʼubʼank re chixjunil ebʼ li ochoch. Abʼan ani kikʼubʼank re chixjunil li yobʼtesihom? Cheeyaabʼasi Hebreos 3:4 ut chexʼaatinaq chirix ebʼ li patzʼom aʼin:
-
Kʼaru qʼaxal nawulak chaawu naq nakaawil li yobʼtesihom?
-
Ma nakaapaabʼ naq wank ani kikʼubʼank re chixjunil li wank saʼ choxa ut saʼ Ruuchichʼochʼ? Kʼaʼut?
Ma nakaanaw?
Taataw xkomon li naʼlebʼ ut ebʼ li bʼideo saʼ jw.org bʼarwiʼ naxye «Ma wank ani kiyobʼtesink re?» ut «Li nekeʼxye chirix li yuʼam».
«Xbʼaan naq li junjunq chi kabʼl wank aj yiibʼahom re; aʼut laj kabʼlanel re li choxachʼochʼ aʼan li Yos».
5. Wank xyaalal naq paabʼajel li naxye li Santil Hu chirix li yobʼtesihom
Saʼ li xbʼeen tasal re li hu Génesis nayeemank chanru kiyobʼtesiik li Ruuchichʼochʼ ut chixjunil li wank chisaʼ. Ma yaal tawiʼ li naxye malaj yal yoobʼanbʼil aatin? Cheerilaq li BʼIDEO ut chexʼaatinaq chirix ebʼ li patzʼom aʼin:
-
Ma naxye li Santil Hu naq chiru 6 kutan kiyobʼtesiik li Ruuchichʼochʼ ut chixjunil li wank chisaʼ?
-
Ma nakaapaabʼ naq yaal li naxye li Santil Hu chirix li yobʼtesihom? Kʼaʼut?
Cheeyaabʼasi Génesis 1:1 ut chexʼaatinaq chirix li patzʼom aʼin:
-
Li nekeʼxtzʼil rix li choxa ut li Ruuchichʼochʼ nekeʼxye naq kiwank xtiklajik. Ma naxchap ribʼ aʼin rikʼin li xaawil saʼ li Santil Hu?
Wankebʼ li kristiʼaan nekeʼxkʼoxla, ma li Yos kikʼehok re li yuʼam ut kixkanabʼ naq tixjal ribʼ xjunes? Cheeyaabʼasi Génesis 1:21, 25, 27 ut chexʼaatinaq chirix ebʼ li patzʼom aʼin:
-
Ma naxkʼut li Santil Hu naq li Yos kixkanabʼ naq li yuʼam tixjal ribʼ xjunes choʼq kar, xul ut kristiʼaan? Malaj aʼan kiyobʼtesink re li jar paay li wank xyuʼam?
6. Ebʼ li kristiʼaan moko juntaqʼeetebʼ ta rikʼin li junchʼol chik chi yobʼtesihom
Laaʼo moko juntaqʼeeto ta rikʼinebʼ li xul. Cheeyaabʼasi Génesis 1:26 ut chexʼaatinaq chirix li patzʼom aʼin:
-
Xbʼaan naq yobʼtesinbʼilo joʼ xjalam u li Yos naqakʼutbʼesi li toqʼobʼank u ut li rahok. Kʼaru nakaatzol chirix li xchaabʼil naʼlebʼ li Jehobʼa?
WIIBʼ OXIBʼ NEKEʼXYE: «Yal yoobʼanbʼil aatin naxye li Santil Hu chirix li yobʼtesihom».
-
Ut laaʼat, kʼaru nakaakʼoxla? Kʼaʼut?
LI AK XQATZOL
Li Jehobʼa kixyobʼtesi li choxa, li Ruuchichʼochʼ ut chixjunil li wank chisaʼ.
Qajultikaq
-
Kʼaru naxye li Santil Hu chirix li xtiklajik li choxa ut li Ruuchichʼochʼ?
-
Ma kixkanabʼ li Yos naq li yuʼam tixjal ribʼ xjunes malaj aʼan kiyobʼtesink re chixjunil?
-
Kʼaʼut moko juntaqʼeeto ta rikʼin li junchʼol chik chi yobʼtesihom?
SIKʼ XKOMON LI NAʼLEBʼ
Chaakʼe reetal chanru li yobʼtesihom naxkʼutbʼesi naq wank jun laj Yobʼtesinel.
«Kʼaru naxkʼut chiqu li yobʼtesihom» (Ajsi aawu!, septiembre 2006)
Kʼe reetal chanru jun li yuwaʼbʼej naxchʼolobʼ chiru li ralal chirix li yobʼtesihom.
Kʼe reetal ma naxchap ribʼ li naʼlebʼ naq chixjunil kiyoʼlaak xjunes rikʼin li naxkʼut li Santil Hu.
«Ma kixkanabʼ li Yos naq chixjunil tyoʼlaaq xjunes re naq twanq li yuʼam?» (Li naʼlebʼ re jw.org)
Chaakʼe reetal ma naxkʼut li najteril bʼaqel ut li nekeʼxye li nekeʼxtzʼil rix li jalan jalanq li naʼlebʼ naq wank ani kiyobʼtesink re li yuʼam malaj yal kichalk xjunes.
Oobʼ li patzʼom li tento xtzʼilbʼal rix chirix li xtiklajik li yuʼam (maakʼaʼ saʼ qʼeqchiʼ)
a Li tzolom 25 t-aatinaq chirix li naraj li Yos choʼq rehebʼ li kristiʼaan.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
