Li Jehobʼa naraj naq taanaw ru chiʼus. Kʼaʼut? Aʼan naroybʼeni naq tatwanq choʼq ramiiw naq taatzol li xchaabʼil naʼlebʼ, li xrahom ut li naxyeechiʼi re li kutan chalkebʼ re. Abʼan, ma tooruuq tawiʼ wank choʼq ramiiw li Yos? (yaabʼasi Salmo 25:14). Kʼaru tatruuq xbʼaanunkil re naq tatwanq choʼq ramiiw? Li Santil Hu naxsume ebʼ li patzʼom aʼin ut naxye qe naq li qamiiwil rikʼin li Jehobʼa aʼan li jwal wank xwankil.

1. Kʼaru naraj li Jehobʼa naq taabʼaanu?

«Jilonqex chi xkʼatq li Yos, ut aʼan taajiloq chekʼatq» (Santiago 4:8). Kʼaru naraj xyeebʼal aʼin? Li Jehobʼa naraj naq tatwanq choʼq ramiiw. Wankebʼ li kristiʼaan nekeʼxkʼoxla naq chʼaʼaj wank choʼq ramiiw li Yos xbʼaan naq inkʼaʼ nekeʼril ru. Re naq toojiloq chixkʼatq, li Jehobʼa kixkanabʼ saʼ li Santil Hu chixjunil li naraj naq tqanaw chirix. Naq naqil li naxyeechiʼi qe li Yos saʼ li Santil Hu naqekʼa naq aʼan tzʼaqal qamiiw usta inkʼaʼ naqil ru.

2. Kʼaʼut naq inkʼaʼ chik taataw junaq aawamiiw joʼ li Jehobʼa?

Maaʼani chik nakatxra joʼ li Jehobʼa. Aʼan naraj naq sahaq saʼ laachʼool ut naq taapatzʼ aatenqʼ re, naq t-ajmanq chaawu. Li Santil Hu naxye: «Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere» (1 Pedro 5:7). Yoʼon wank li Jehobʼa re rabʼinkil ut xtenqʼankilebʼ li ramiiw (yaabʼasi Salmo 94:18, 19).

3. Kʼaru naraj li Jehobʼa naq teʼxbʼaanu ebʼ li ramiiw?

Li Jehobʼa naxrahebʼ chixjunil li kristiʼaan, abʼan qʼaxal wiʼ chik «naxrahebʼ li tiikebʼ xchʼool» (Proverbios 3:32). Li Jehobʼa naroybʼeni naq ebʼ li ramiiw teʼxyal xqʼe chi xbʼaanunkil li us ut teʼxtzʼeqtaana li maaʼusilal. Wankebʼ nekeʼxkʼoxla naq inkʼaʼ teʼruuq xbʼaanunkil chixjunil li naraj li Jehobʼa. Aʼan naxtaw ru li naqekʼa ut naxkʼulubʼa ebʼ li kristiʼaan li nekeʼrahok re ut nekeʼxyal xqʼe chi xsahobʼresinkil xchʼool (Salmo 147:11; Hechos 10:34, 35).

 QASIKʼAQ XCHAMAL LI NAʼLEBʼ

4. Laj Abrahán kiwank chaq choʼq ramiiw li Jehobʼa

Li naxye li Santil Hu chirix laj Abrahán (nayeemank ajwiʼ re Abrán) naxkʼut chiqu kʼaru tzʼaqal naraj xyeebʼal wank choʼq ramiiw li Jehobʼa. Cheeyaabʼasi li naxye Génesis 12:1-4 chirix laj Abrahán ut chexʼaatinaq chirix ebʼ li patzʼom aʼin:

• Kʼaru kixpatzʼ li Jehobʼa re laj Abrahán?

• Kʼaru kixyeechiʼi li Jehobʼa re?

• Naq laj Abrahán kirabʼi li kixye li Jehobʼa, kʼaru kixbʼaanu?

5. Kʼaru naxpatzʼ li Jehobʼa rehebʼ li ramiiw?

Chiqajunilo wank kʼaru naqoybʼeni rikʼinebʼ li qamiiw.

• Chan raj ru taawaj naq teʼnaʼlebʼaq aawikʼin ebʼ laawamiiw?

Cheeyaabʼasi 1 Juan 5:3 ut chexʼaatinaq chirix li patzʼom aʼin:

• Kʼaru naraj li Jehobʼa naq teʼxbʼaanu ebʼ li ramiiw?

Re naq tooʼabʼinq chiru li Jehobʼa maare tento tqajal li qanaʼlebʼ ut li qabʼaanuhom. Cheeyaabʼasi Isaías 48:17, 18 ut chexʼaatinaq chirix li patzʼom aʼin:

• Kʼaʼut naxye li Jehobʼa rehebʼ li ramiiw naq teʼxjal xnaʼlebʼ?

 6. Kʼaru naxbʼaanu li Jehobʼa choʼq rehebʼ li ramiiw?

 LI AK XQATZOL

Li Jehobʼa naraj wank choʼq aawamiiw ut naraj aatenqʼankil re naq tatnachʼoq rikʼin.

Qajultikaq

• Chanru naxtenqʼa li Jehobʼa ebʼ li ramiiw?

• Kʼaʼut naxye li Jehobʼa rehebʼ li ramiiw naq teʼxjal xnaʼlebʼ?

• Ma taaye raj naq chʼaʼaj wanq choʼq ramiiw li Jehobʼa? Kʼaʼut?