TZOLOM 11

Kʼaru taabʼaanu re naq taatzol chiʼus li Santil Hu

XKʼEBʼAL CHI EKʼANK RIKʼIN

Ma xaawaj xtikibʼankil junaq li kʼanjel abʼan xaakʼoxla naq qʼaxal chʼaʼaj? Maare chi bʼaybʼayqil xaabʼaanu re naq inkʼaʼ tchʼaʼajkoʼq chaawu. Joʼkan ajwiʼ nakʼulmank rikʼin rilbʼal xsaʼ li Santil Hu. Maare xaakʼoxla: «Bʼar tintikibʼ?». Saʼ li tzolom aʼin tqil wiibʼ oxibʼ li naʼlebʼ li tatxtenqʼa re naq sahaq aachʼool chi rilbʼal xsaʼ li Santil Hu.

1. Kʼaʼut us naq wulaj wulaj tqil xsaʼ li Santil Hu?

Li kristiʼaan li naril xsaʼ li Santil Hu malaj li «xchaqʼrabʼ li Qaawaʼ» sahaq saʼ xchʼool ut chaabʼilaq li xyuʼam (yaabʼasi Salmo 1:1-3). Re xtikibʼankil, yal rilbʼal xsaʼ li Santil Hu chiru wiibʼ malaj oxibʼ kʼasal. Wi taataw ru chiʼus li yookat xtzolbʼal kʼajoʼ twulaq chaawu xyaabʼasinkil li Santil Hu.

2. Kʼaru tatxtenqʼa re xtawbʼal rusilal li Santil Hu?

Re naq tqataw rusilal moko tqayaabʼasi ta saʼ junpaat, tento bʼan tqakʼe qahoonal re xkʼoxlankil rix li yooko xyaabʼasinkil (Josué 1:8). Naq yooqat rilbʼal xsaʼ kʼoxla rix ebʼ li patzʼom aʼin: «Kʼaru naxkʼut chiwu chirix li Jehobʼa? Chanru tinruuq xyuʼaminkil? Chanru twoksi li raqal aʼin re xtenqʼankilebʼ li junchʼol?».

3. Chanru taasikʼ aahoonal re rilbʼal xsaʼ li Santil Hu?

Ma nachʼaʼajkoʼk chaawu xkʼebʼal aahoonal re rilbʼal xsaʼ li Santil Hu? Chiqajunilo naqakʼul aʼin. Yal roksinkil chiʼus laahoonal (Efesios 5:16). Naru nakaasikʼ junaq li hoonal re rilbʼal xsaʼ li Santil Hu. Wankebʼ nekeʼxyaabʼasi eqʼla, wankebʼ chik nekeʼxbʼaanu naq nekeʼhilank waʼlebʼ ut junchʼol chik naq okebʼ re chi wark. Kʼaru raj li hoonal taawoksi laaʼat?

QASIKʼAQ XCHAMAL LI NAʼLEBʼ

Qatzolaq kʼaru tqabʼaanu re naq twulaq chiqu rilbʼal xsaʼ li Santil Hu. Tqataw wiibʼ oxibʼ li naʼlebʼ re naq tqakawresi qibʼ chiʼus ut re xtawbʼal rusilal li yooko xtzolbʼal chirix li Santil Hu.

Joʼ naq naqakʼaytesi qibʼ chi xwaʼbʼal jun li tzakahemq, joʼkan ajwiʼ naru naqakʼaytesi qibʼ chi rilbʼal xsaʼ li Santil Hu.

4. Taataw xsahil rilbʼal xsaʼ li Santil Hu

Maare tchʼaʼajkoʼq chiqu xtikibʼankil rilbʼal xsaʼ li Santil Hu. Joʼ naq naqakʼaytesi qibʼ chi xwaʼbʼal jun li tzakahemq, joʼkan ajwiʼ naru naqakʼaytesi qibʼ chi rilbʼal xsaʼ li Santil Hu. Cheeyaabʼasi 1 Pedro 2:2 ut chexʼaatinaq chirix li patzʼom aʼin:

Ma nakaakʼoxla naq wi wulaj wulaj nakaayaabʼasi li Santil Hu twulaq chaawu xbʼaanunkil?

Cheerilaq li BʼIDEO ut cheenaw ru wiibʼ oxibʼ li saaj li xeʼxkʼaytesi ribʼ chi rilbʼal xsaʼ li Santil Hu. Ut chexʼaatinaq chirix ebʼ li patzʼom aʼin:

BʼIDEO: Wiibʼ oxibʼ li saaj xeʼxtzol xraabʼal li Raatin li Yos (5:33)

Kʼaru ebʼ li chʼaʼajkilal keʼruuk xqʼaxbʼal ru ebʼ li saaj?
Kʼaru keʼxbʼaanu re naq inkʼaʼ teʼxkanabʼ rilbʼal xsaʼ li Santil Hu?
Kʼaru keʼxbʼaanu re naq inkʼaʼ teʼtitzʼq chi rilbʼal xsaʼ li Santil Hu?

Chanru taatikibʼ:

Sikʼ junaq li Santil Hu li nawbʼil ut natawmank ru. Yal roksinkil li Traducción del Nuevo Mundo wi natawmank saʼ laawaatinobʼaal malaj saʼ jalan chik li aatinobʼaal li nakaataw ru.
Yaabʼasi xbʼeenwa li nawulak chaawu. Taataw laatenqʼ saʼ «Li naʼlebʼ re xtikibʼankil rilbʼal xsaʼ li Santil Hu».
Juchʼ ebʼ li tasal li ak xaayaabʼasi. Oksi li kaaxukuut «Li ak xinyaabʼasi» li natawmank saʼ li tasal hu aʼin.
Oksi JW Library^®. Wi taakubʼsi saʼ laabʼoqlebʼaal, naru taawil xsaʼ malaj taawabʼi li naxye li Santil Hu yalaq joqʼe malaj yalaq bʼar.
Oksi li hu Li tooxtenqʼa chi xtzolbʼal Raatin li Yos. Chisaʼ taataw ebʼ li eetalil ut kaaxukuut li tatxtenqʼa chi xtzolbʼal li Santil Hu.

5. Kawresi aawibʼ rajlal xamaan naq tattzoloq

Cheeyaabʼasi Salmo 119:34 ut chexʼaatinaq chirix li patzʼom aʼin:

Kʼaʼut us naq tattijoq naq ok aawe rilbʼal xsaʼ li Santil Hu malaj naq taakawresi aawibʼ re tzolok?

Kʼaru taabʼaanu re naq taataw rusilal li junjunq chi tzolom? Naq yooqat xkawresinkil aawibʼ re tzolok yal xbʼaanunkil aʼin:

Yaabʼasi chixjunil li xraqal li tzolom li wank saʼ xtiklajik.
Sikʼ chixjunil xraqal li Santil Hu, yaabʼasi ut yal xkʼebʼal reetal chanru naxchap ribʼ rikʼin li naʼlebʼ li yookat xtzolbʼal.
Bʼon xsumenkil ebʼ li patzʼom. Aʼin tatxtenqʼa naq laj kʼutunel ttzoloq aawikʼin.

Ma nakaanaw?

Ebʼ laj testiiw re li Jehobʼa naqoksi jalan jalanq li Santil Hu, abʼan nawulak chiqu roksinkil li Santil Hu Traducción del Nuevo Mundo xbʼaan naq tzʼaqal re ru li naxye, moko chʼaʼaj ta xtawbʼal ru ut naroksi li xkʼabʼaʼ li Yos (taawil li naʼlebʼ saʼ jw.org: «Ma ak rehebʼ li Santil Hu li nekeʼroksi ebʼ laj testiiw re li Jehobʼa?»).

WIIBʼ OXIBʼ NEKEʼXYE: «Moko wank ta inhoonal re xtzolbʼal li Santil Hu ut saʼ junpaat nintitzʼ».

Ut laaʼat, kʼaru nakaaye?

LI AK XQATZOL

Re naq taataw rusilal li Santil Hu, xaaqabʼ li hoonal re naq taawil xsaʼ, tijon chiru li Yos re naq tatxtenqʼa chi xtawbʼal ru ut kawresi aawibʼ re li junjunq chi tzolom.