TZOLOM 19
Ma ebʼ laj testiiw re li Jehobʼa ebʼ li tzʼaqal aj paabʼanel?
Kʼaʼut ebʼ laj testiiw re li Jehobʼa naqapaabʼ naq laaʼo li tzʼaqal aj paabʼanel? Qatzʼilaq bʼar chalenaq li qapaabʼal, li kʼabʼaʼej li nawnooko wiʼ ut li rahok li naqakʼutbʼesi.
1. Bʼar chalenaq li nekeʼxpaabʼ ebʼ laj Testiiw?
Li Jesús kixye re li Yos: «Laawaatin aʼan li yaal» (Juan 17:17). Joʼ li Jesús, ebʼ laj Testiiw nekeʼxpaabʼ li naxye li Santil Hu. Aatinaqo chirix chanru keʼtiklaak ebʼ laj testiiw re li Jehobʼa. Chiru tana li chihabʼ 1870, jun chʼuut chi kristiʼaan keʼok xtzʼilbʼal rix li naxye li Santil Hu. Keʼxpaabʼ li naxkʼut li Santil Hu usta jalan chiru li nekeʼxkʼut li iklees. Ut keʼok xyeebʼal li xeʼxtzol rehebʼ li junchʼol. a
2. Kʼaʼut nokookʼabʼaʼiik testiiw re li Jehobʼa?
Li Jehobʼa naxye naq li nekeʼloqʼonink re aʼanebʼ li xtestiiw xbʼaan naq nekeʼaatinak chirix (Hebreos 11:4-12:1). Saʼ najter qʼe kutan li Yos kixye re li xtenamit: «Laaʼex lintestiiw» (yaabʼasi Isaías 43:10). Li Jesús kikʼabʼaʼiik «laj chʼolobʼanel xyaalal» (Apocalipsis 1:5). Joʼkan naq saʼ li chihabʼ 1931 xookʼabʼaʼiik testiiw re li Jehobʼa. Nasahoʼk saʼ qachʼool naq xookʼabʼaʼiik chi joʼkan.
3. Chanru nekeʼxyuʼami ebʼ laj Testiiw li rahok li kixkʼut li Jesús?
Li Jesús qʼaxal naxrahebʼ li xtzolom joʼkan naq narilebʼ joʼ li xjunkabʼal (yaabʼasi Marcos 3:35). Saʼ chixjunil li Ruuchichʼochʼ ebʼ laj Testiiw nekeʼxra ribʼebʼ, joʼ jun li junkabʼal. Joʼkan naq chiqibʼil qibʼ naqaye hermaan (Filemón 1, 2). Naqayuʼami ajwiʼ li taql aʼin: «Cheera eeribʼ cheeribʼil eeribʼ» (1 Pedro 2:17, Wy). Wank jalan jalanq li naʼlebʼ bʼarwiʼ naqakʼutbʼesi naq naqarahebʼ li qech aj paabʼanel, jun eetalil aʼan naq naqatenqʼahebʼ naq nekeʼxkʼul junaq li rahilal.
QASIKʼAQ XCHAMAL LI NAʼLEBʼ
Qatzolaq bʼayaq chik chirixebʼ laj testiiw re li Jehobʼa ut qilaq kʼaʼut naqaye naq laaʼo li tzʼaqal aj paabʼanel.
Li nekeʼxpaabʼ ebʼ li tzʼaqal aj paabʼanel chalenaq saʼ li Santil Hu ut nekeʼxkʼe chi naweʼk.
4. Li naqapaabʼ chalenaq saʼ li Santil Hu
Li Jehobʼa kixye naq tchʼolaaq chiqu li naxye li Santil Hu. Cheeyaabʼasi Daniel 12:4 ut chexʼaatinaq chirix li patzʼom aʼin:
-
Kʼaru teʼxtaw li tzʼaqal aj paabʼanel naq teʼril xsaʼ li Santil Hu?
Kʼe reetal chanru jun chʼuut li qas qiitzʼin xeʼxtzʼil xsaʼ li Santil Hu, jun rehebʼ aʼan laj Charles Russell. Cheerilaq li BʼIDEO ut chexʼaatinaq chirix li patzʼom aʼin:
-
Chanru xeʼxtzʼil rix li Santil Hu laj Charles Russell ut ebʼ li ramiiw?
Ma nakaanaw?
Wank sut najalmank xyaalal junjunq li naʼlebʼ li naqapaabʼ. Kʼaʼut? Xbʼaan naq li Yos nokooxtenqʼa chi xtawbʼal ru chi kachʼinqil li naxye li Santil Hu joʼ naq naʼok chi hikʼeʼk li Saqʼe timil timil naʼok chi kʼutunk li wank saʼ li qasutam (yaabʼasi Proverbios 4:18). Li Santil Hu inkʼaʼ najalaak abʼan naq nakaataw ru chiʼus junaq li naʼlebʼ naqachaabʼilobʼresi.
5. Naqabʼaanu li naxye li qakʼabʼaʼ
Kʼaʼut xookʼabʼaʼiik testiiw re li Jehobʼa? Cheerilaq li BʼIDEO ut chexʼaatinaq chirix li patzʼom aʼin:
-
Kʼaʼut wank xyaalal naq xookʼabʼaʼiik testiiw re li Jehobʼa?
Kʼaʼut li Jehobʼa kixsikʼebʼ li poyanam re naq teʼwanq choʼq xtestiiw? Xbʼaan naq nayeemank naabʼal li tikʼtiʼ chirix joʼkan naq ebʼ li kristiʼaan aʼin teʼxye li yaal chirix li Jehobʼa. Qilaq wiibʼ li tikʼtiʼ aʼin.
Wankebʼ li paabʼal nekeʼxye naq li Yos naxkʼulubʼa naq tqoksi li pechʼbʼil yos re xloqʼoninkil ru. Cheeyaabʼasi Levítico 26:1 ut chexʼaatinaq chirix ebʼ li patzʼom aʼin:
-
Kʼaru naxye li Santil Hu chirix aʼin? Kʼaru naxkʼoxla li Yos chirixebʼ li pechʼbʼil yos?
Wiibʼ oxibʼ ebʼ laj kʼamolbʼe saʼebʼ li paabʼal nekeʼxkʼut naq li Jesús aʼan li Yos. Cheeyaabʼasi Juan 20:17 ut chexʼaatinaq chirix ebʼ li patzʼom aʼin:
-
Kʼaru naxye li Santil Hu chirix aʼin? Ma juntaqʼeet li Jesús rikʼin li Jehobʼa?
-
Kʼaru nakaakʼoxla naq nakaawabʼi naq li Jehobʼa kixtaqlahebʼ li xtestiiw chi xyeebʼal li yaal chirix ut chirix li Ralal?
6. Naqara qibʼ chiqibʼil qibʼ
Li Santil Hu naxjuntaqʼeeta ebʼ laj paabʼanel rikʼin junjunq li xchaʼal li junxaqalil. Cheeyaabʼasi 1 Corintios 12:25, 26 ut chexʼaatinaq chirix ebʼ li patzʼom aʼin:
-
Kʼaru raj teʼxbʼaanu ebʼ li tzʼaqal aj paabʼanel naq ra wanqebʼ li rechpaabʼanel?
-
Ma aawilom chanru nekeʼxra ribʼ ebʼ laj testiiw re li Jehobʼa?
Naq saʼ junaq li tenamit ebʼ laj Testiiw nekeʼxkʼul junaq li rahilal ebʼ li rechpaabʼanel saʼ junpaat nekeʼtenqʼank. Re rilbʼal aʼin cheerilaq li BʼIDEO. Ut chexʼaatinaq chirix li patzʼom aʼin:
-
Naq keʼtenqʼank ebʼ laj Testiiw ma naxkʼut aʼin naq nekeʼrahok? Kʼaʼut?
Ebʼ li tzʼaqal aj paabʼanel nekeʼxkʼutbʼesi li rahok naq nekeʼtenqʼank.
WIIBʼ OXIBʼ NEKEʼXYE: «Li xpaabʼal ebʼ laj testiiw re li Jehobʼa moko nawbʼil ta ru».
-
Joqʼe kixtikibʼ li Jehobʼa xkʼabʼaʼinkilebʼ «testiiw» li nekeʼloqʼonink re?
LI AK XQATZOL
Ebʼ laj testiiw re li Jehobʼa aʼanebʼ li tzʼaqal aj paabʼanel. Ebʼ laj Testiiw nekeʼxloqʼoni ru li Jehobʼa saʼ junajil saʼ chixjunil li Ruuchichʼochʼ, nekeʼxpaabʼ li naxye li Santil Hu ut nekeʼxkʼe chi naweʼk li yaal chirix li Jehobʼa.
Qajultikaq
-
Kʼaʼut xookʼabʼaʼiik testiiw re li Jehobʼa?
-
Chanru naqakʼutbʼesi naq naqara qibʼ chiqibʼil qibʼ?
-
Ma nakaapaabʼ naq ebʼ laj testiiw re li Jehobʼa aʼanebʼ li tzʼaqal aj paabʼanel?
SIKʼ XKOMON LI NAʼLEBʼ
Tzol xkomon aanaʼlebʼ chirixebʼ laj Testiiw.
Ebʼ laj Testiiw: nekeʼxkʼutbʼesi li xpaabʼal. Tasal 1: Nekeʼelk saʼ li akʼabʼ (1:00:53)
Kʼe reetal chanru ebʼ laj Testiiw xeʼrisi chi kutankil jun li bʼalaqʼil naʼlebʼ.
Taw xsumenkil laapatzʼom chirixebʼ laj testiiw re li Jehobʼa.
«Li napatzʼmank rajlal chirixebʼ laj testiiw re li Jehobʼa» (Chaawil li tasal re jw.org)
Saʼ xkʼabʼaʼ li xikʼ ilok laj Stephen kixbʼaanu naabʼal li maaʼusilal. Tzol kʼaru kiril rikʼinebʼ laj Testiiw li kixbʼaanu naq tixjal li xnaʼlebʼ.
«Maakʼaʼ chik rusil linyuʼam» (Laj Kʼaakʼalehom, 1 re julio 2015)
a Chalen li chihabʼ 1879 ebʼ laj Testiiw keʼok xkʼubʼankil li hu Laj Kʼaakʼalehom re xchʼolobʼankil li naxkʼut li Santil Hu.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
