TZOLOM 21
Chanru nakʼemank chi naweʼk li chaabʼil esil?
Chi seebʼ li Jehobʼa troksi li Xʼawabʼejilal re risinkil chixjunil li qachʼaʼajkilal. Tento naq chixjunilebʼ li kristiʼaan teʼrabʼi li chaabʼil esil aʼin. Li Jesús naraj naq ebʼ li xtzolom teʼxye li esil aʼin saʼ chixjunil li ruuchichʼochʼ (Mateo 28:19, 20). Chanru nekeʼxpaabʼ ebʼ laj testiiw re li Jehobʼa li taql li kixkʼe li Jesús?
1. Chanru yook chi tzʼaqlok ru li naxye Mateo 24:14?
Li Jesús kixye naq: «Taapuktesimanq li chaabʼil esilal aʼin chirix li xnimajwal wankilal li choxa saʼ chixjunil li ruuchichʼochʼ» (Mateo 24:14). Kʼajoʼ nasahoʼk saʼ xchʼoolebʼ laj Testiiw chi tzʼaqonk saʼ li nimla kʼanjel aʼin. Naqakʼe chi naweʼk li chaabʼil esil saʼ numenaq 1,000 chi aatinobʼaal saʼ chixjunil li ruuchichʼochʼ. Saʼ xkʼabʼaʼ naq nim li kʼanjel aʼin, naʼajmank naq tkʼubʼamanq chiʼus ut kʼanjelak chi kaw. Inkʼaʼ tooruuq xbʼaanunkil aʼin wi li Jehobʼa inkʼaʼ raj tooxtenqʼa.
2. Kʼaru naqabʼaanu re naq ebʼ li kristiʼaan teʼrabʼi li chaabʼil esil?
Joʼ xeʼxbʼaanu chaq ebʼ li xbʼeen aj paabʼanel naqakʼe chi naweʼk li chaabʼil esil chirekabʼlal (Hechos 5:42). Chi joʼkan chi miyon li kristiʼaan nekeʼrabʼi li chaabʼil esil rajlal chihabʼ. Xbʼaan naq wank sut chʼaʼaj xtawbʼalebʼ saʼ rochoch nokoopuktesink bʼarwiʼ nekeʼnumeʼk naabʼalebʼ li kristiʼaan. Junelik naqasikʼ li hoonal re xkʼebʼal chi naweʼk li tixbʼaanu li Jehobʼa.
3. Ani saʼ aj bʼeen tenebʼanbʼil xpuktesinkil li chaabʼil esil?
Chixjunilebʼ li tzʼaqal aj paabʼanel tento teʼxkʼe chi naweʼk li chaabʼil esil. Choʼq qe moko bʼatzʼuul ta li kʼanjel aʼin. Naqabʼaanu chixjunil li wank saʼ quqʼ re xbʼaanunkil xbʼaan naq naqanaw naq teʼruuq chi koleʼk ebʼ li qas qiitzʼin (yaabʼasi 1 Timoteo 4:16). Maaʼani natojok qe chi xbʼaanunkil li kʼanjel aʼin. Li Santil Hu naxye: «Chi maatan xekʼul, ut chi maatan ajwiʼ teekʼe» (Mateo 10:7, 8). Inkʼaʼ naqakanabʼ xyeebʼal li chaabʼil esil usta ebʼ li qas qiitzʼin inkʼaʼ nekeʼraj qabʼinkil. Xbʼaan naq chi joʼkan nokooʼabʼink chiru li Jehobʼa ut sa saʼ xchʼool qikʼin.
QASIKʼAQ XCHAMAL LI NAʼLEBʼ
Tzol chanru nekeʼpuktesink ebʼ laj Testiiw saʼ chixjunil li ruuchichʼochʼ ut chanru nekeʼtenqʼaak xbʼaan li Jehobʼa.
Naqakʼe chi naweʼk li chaabʼil esil saʼ chixjunil li ruuchichʼochʼ: (A) Costa Rica, (B) Estados Unidos, (C) Benín, (D) Tailandia, (E) Yap (Micronesia), (F) Suecia.
4. Naqayal qaqʼe re xtawbʼalebʼ li kristiʼaan
Ebʼ laj testiiw re li Jehobʼa nekeʼxyal xqʼe re naq ebʼ li kristiʼaan teʼrabʼi li chaabʼil esil maakʼaʼ naxye bʼar wankebʼ. Cheerilaq li BʼIDEO ut chexʼaatinaq chirix li patzʼom aʼin:
-
Kʼaru nawulak chaawu naq ebʼ laj Testiiw nekeʼxyal xqʼe chi puktesink?
Cheeyaabʼasi Mateo 22:39 ut Romanos 10:13-15 ut chexʼaatinaq chirix ebʼ li patzʼom aʼin:
-
Chanru naqakʼutbʼesi naq naqarahebʼ li qechkristiʼaanil naq nokoopuktesink?
-
Kʼaru naxye li Jehobʼa chirixebʼ li nekeʼxkʼe chi naweʼk li chaabʼil esil? (Teeril li raqal 15).
5. Laaʼo aj tenqʼ re li Yos
Wank naabʼal li eetalil li naxkʼut naq li Jehobʼa naxbʼeresi li qakʼanjel. Qilaq li kikʼulmank Nueva Zelanda. Saʼ xbʼeen waʼlebʼ laj Paul jun aj Testiiw kipuktesink rikʼin jun li qanaʼchin. Saʼ li eqʼla ajwiʼ aʼan li qanaʼchin kiroksi li xkʼabʼaʼ li Jehobʼa Yos naq kitijok ut kixtzʼaama re, naq wanq ani ttenqʼanq re chi xnawbʼal ru. Laj Paul kixye: «Oxibʼ hoor chirix aʼin xinwulak saʼ rochoch».
Cheeyaabʼasi 1 Corintios 3:9 ut chexʼaatinaq chirix li patzʼom aʼin:
-
Chanru naxkʼutbʼesi li kikʼulmank Nueva Zelanda naq li Jehobʼa nabʼeresink re li puktesink?
Cheeyaabʼasi Hechos 1:8 ut chexʼaatinaq chirix li patzʼom aʼin:
-
Kʼaʼut naʼajmank naq li Jehobʼa tooxtenqʼa naq yooko chi xkʼebʼal chi naweʼk li chaabʼil esil?
Ma nakaanaw?
Saʼ li chʼutam li nawank saʼ xyanqil xamaan naqatzol chanru tqakʼe chi naweʼk li chaabʼil esil. Wi ak xatwulak junsutaq saʼ li chʼutam aʼin, kʼaru nakaakʼoxla chirix chanru nokootzoleʼk?
6. Naqapaabʼ li xtaql li Jehobʼa naq nokoopuktesink
Saʼ xkutankilebʼ li apóstol, li xikʼ nekeʼilok re xtzolom li Jesús xeʼxyal xrambʼal li puktesink. Ebʼ li xbʼeen aj paabʼanel keʼxkol rix li chaabʼil esil naq xeʼxxaqabʼ xwankil chiru li chaqʼrabʼ (Filipenses 1:7). Joʼkan ajwiʼ nekeʼxbʼaanu ebʼ laj testiiw re li Jehobʼa saʼebʼ li qakutan. a
Cheeyaabʼasi Hechos 5:27-42 ut chexʼaatinaq chirix li patzʼom aʼin:
-
Kʼaʼut inkʼaʼ tqakanabʼ puktesink? (Teeril li raqal 29, 38 ut 39).
WIIBʼ OXIBʼ NEKEʼXPATZʼ: «Kʼaʼut nekeʼxik chirekabʼlal ebʼ laj testiiw re li Jehobʼa?».
-
Kʼaru raj taaye?
LI AK XQATZOL
Li Jesús kixye rehebʼ li xtzolom naq teʼxkʼe chi naweʼk li chaabʼil esil toj saʼ xmaril li ruuchichʼochʼ. Li Jehobʼa naxtenqʼa li xtenamit re naq teʼxbʼaanu li kʼanjel aʼin.
Qajultikaq
-
Chanru yook chi kʼemank resil li chaabʼil esil saʼ chixjunil li ruuchichʼochʼ?
-
Chanru naqakʼutbʼesi naq naqarahebʼ li qechkristiʼaanil naq nokoopuktesink?
-
Ma nakaakʼoxla naq li puktesink tixkʼe xsahil qachʼool? Kʼaʼut?
SIKʼ XKOMON LI NAʼLEBʼ
Kʼe reetal chanru nekeʼpuktesink ebʼ laj Testiiw saʼebʼ li nimla tenamit.
Puktesink rikʼin li kʼanjelobʼaal saʼ li tenamit París (5:11)
Ebʼ laj Testiiw nekeʼxtenqʼahebʼ li xeʼelelik chaq saʼebʼ li xtenamit chi xnawbʼal li yaal?
Xqatenqʼahebʼ li xeʼelelik chaq saʼ li xtenamit chi xnawbʼal li yaal (5:59)
Kʼe reetal chanru naxtaw xsahil xchʼool jun li ixq li naxkʼe chixjunil li xhoonal saʼ li puktesink.
Tzol chanru elk chiʼubʼej chiru li chaqʼrabʼ kitenqʼank, re naq moko chʼaʼajkaq ta chik xkʼebʼal chi naweʼk li chaabʼil esil.
a Li Jehobʼa nataqlank qe chi xyeebʼal li chaabʼil esil. Joʼkan naq moko naqoybʼeni ta qaleseens rikʼinebʼ li awabʼej re li ruuchichʼochʼ.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
