TZOLOM 22

Chanru taakʼe chi naweʼk li chaabʼil esil?

XKʼEBʼAL CHI EKʼANK RIKʼIN

Naq yookat xtzolbʼal li naxye li Santil Hu maare nakaaye: «Us raj naq chixjunilebʼ teʼxnaw aʼin!». Ut yaal li nakaaye, chixjunilebʼ li qas qiitzʼin tento teʼxnaw aʼin. Abʼan maare tchalq laaxiw naq taawaj xyeebʼal rehebʼ li junchʼol li yookat xtzolbʼal. Tqil chanru taaqʼax ru laaxiw ut chanru tixkʼe xsahil aachʼool xyeebʼal li chaabʼil esil rehebʼ li junchʼol.

1. Chanru tatruuq xseeraqʼinkil rehebʼ li nakaanawebʼ ru li yookat xtzolbʼal?

Ebʼ li xtzolom li Jesús keʼxye: «Inkʼaʼ naru tqakanabʼ aatinak chirix li qilom ut li qabʼihom» (Hechos 4:20). Oxloqʼ chiruhebʼ li yookebʼ xtzolbʼal joʼkan naq nekeʼraj naq chixjunilebʼ li kristiʼaan teʼabʼinq re. Ma joʼkan ajwiʼ nakaakʼoxla laaʼat? Wi joʼkan, sikʼ chanru tat-aatinaq rikʼinebʼ laajunkabʼal ut ebʼ laawamiiw chirix li yookat xtzolbʼal, abʼan sikʼ chiʼus laawaatin (yaabʼasi Colosenses 4:6).

Chanru xbʼaanunkil

Naq yooqat chi aatinak rikʼin junaq laakomon naru nakaaye re: «Chiru li xamaan aʼin xintzol jun li chaabʼil naʼlebʼ».
Wi yaj malaj yook xkʼaʼuxl junaq laawamiiw wotz rikʼin junaq xraqal li Santil Hu re xwaklesinkil xchʼool.
Wi junaq laawechkʼanjelil tixye aawe: «Chanru wankat?». Saʼ li hoonal aʼan naru nakat-aatinak chirix li xaatzol saʼ li Santil Hu malaj saʼ li chʼutam.
Kʼut chiruhebʼ laawamiiw li qanaʼaj jw.org saʼ Internet.
Bʼoq junaq laawamiiw chi rabʼinkil chanru nakattzolok malaj kʼut chiru chanru truuq xpatzʼbʼal xtzolbʼal saʼ jw.org.

2. Kʼaʼut us raj naq tatpuktesinq rochbʼen li chʼuut?

Ebʼ li xtzolom li Jesús moko kaʼaj tawiʼ xeʼxye li chaabʼil esil re li nekeʼxnaw ruhebʼ. Li Jesús «kixtaqlahebʼ saʼ kaʼkabʼil chi uubʼej, saʼ chixjunilebʼ li tenamit» chi puktesink (Lucas 10:1). Chi joʼkan naabʼalebʼ li qas qiitzʼin xeʼrabʼi li chaabʼil esil. Ebʼ li xtzolom li Jesús sahebʼ saʼ xchʼool naq xeʼxbʼaanu li kʼanjel aʼin chi tustu ru ut saʼ komonil (Lucas 10:17). Us raj naq tatpuktesinq rikʼin li chʼuut.

QASIKʼAQ XCHAMAL LI NAʼLEBʼ

Tzʼil rix chanru tatruuq xqʼaxbʼal ru laaxiw ut chanru tixkʼe xsahil laachʼool xyeebʼal li chaabʼil esil rehebʼ li junchʼol.

3. Li Jehobʼa tatxtenqʼa

Wankebʼ nekeʼraj xkʼebʼal chi naweʼk li chaabʼil esil abʼan nekeʼok xkʼaʼuxl chi xkʼoxlankil kʼaru teʼxye ebʼ li junchʼol.

Naq nakaawaj xyeebʼal li yookat xtzolbʼal, ma naʼok aaxiw malaj inkʼaʼ? Kʼaʼut?

Cheerilaq li BʼIDEO ut chexʼaatinaq chirix li patzʼom aʼin:

BʼIDEO: Xintzʼaama re li Jehobʼa naq tinxtenqʼa (4:05)

Kʼaru kitenqʼank rehebʼ li saaj re naq teʼxqʼax ru li xxiw?

Cheeyaabʼasi Isaías 41:10 ut chexʼaatinaq chirix li patzʼom aʼin:

Naq tatxuwaq chi puktesink, chanru tatxtenqʼa li tijok?

Ma nakaanaw?

Naabʼalebʼ li wankebʼ anaqwan choʼq aj Testiiw xeʼxkʼoxla naq maajunwa teʼruuq xkʼebʼal chi naweʼk li chaabʼil esil. Laj Sergey naxkʼoxla naq maakʼaʼ naʼok wiʼ ut nachʼaʼajkoʼk chiru aatinak rikʼinebʼ li junchʼol. Aʼan naxye: «Naq xinʼok xtzolbʼal li Santil Hu, aʼin xinxtenqʼa re naq tinruuq xyeebʼal rehebʼ li junchʼol li yookin xtzolbʼal. Kisach inchʼool chi rilbʼal naq aatinak chirix li nintzol saʼ li Santil Hu kixkawubʼresi linchʼool ut linpaabʼal».

4. Sikʼ chiʼus laawaatin

Naq taawaj aatinak rikʼin junaq li kristiʼaan moko kaʼaj tawiʼ taakʼoxla kʼaru taaye, kʼoxla ajwiʼ chanru taaye. Cheeyaabʼasi 2 Timoteo 2:24 ut 1 Pedro 3:15 ut chexʼaatinaq chirix ebʼ li patzʼom aʼin:

Chanru tatruuq xyuʼaminkil li nekeʼxye li raqal aʼin naq tat-aatinaq rikʼinebʼ li junchʼol chirix li naxye li Santil Hu?
Wi ebʼ laawamiiw malaj laakomon nekeʼpoʼk aawikʼin, kʼaru taabʼaanu? Ut kʼaru inkʼaʼ taabʼaanu?
Kʼaʼut us naq saʼ xyaalal tat-aatinaq rikʼinebʼ li junchʼol ut inkʼaʼ taatenebʼ saʼ xbʼeen kʼaru teʼxpaabʼ?

5. Naxkʼe xsahil qachʼool xyeebʼal li chaabʼil esil

Li Jehobʼa kixtaqla chaq li Jesús chi xyeebʼal li chaabʼil esil, kʼaru naxkʼoxla li Jesús chirix li kʼanjel aʼin? Cheeyaabʼasi Juan 4:34 ut chexʼaatinaq chirix ebʼ li patzʼom aʼin:

Li chaabʼil tzakahemq naxkʼe qakawilal ut xsahil qachʼool, kʼaʼut naq kixye li Jesús naq xbʼaanunkil li rajom li Yos, joʼ li puktesink, chanchan waʼak?
Kʼaru tawiʼ li sahil chʼoolejil taataw wi taakʼe chi naweʼk li chaabʼil esil?

Wiibʼ oxibʼ li naʼlebʼ

Saʼ li chʼutam saʼ xyanqil li xamaan sikʼ junaq li naʼlebʼ re naq taatikibʼ aatinak.
Patzʼ re li natzolok aawe chanru tatruuq tzʼaqonk saʼ junaq li kʼanjel saʼ li chʼutam saʼ xyanqil xamaan. Li kʼanjel li teʼxkʼe aawe tatxtenqʼa re naq taatzol chanru tatruuq xyeebʼal li yookat xtzolbʼal.
Oksi li naʼlebʼ «Wiibʼ oxibʼ nekeʼxye» malaj «Wiibʼ oxibʼ nekeʼxpatzʼ» li wank saʼebʼ li tzolom aʼin re naq tatruuq xsumenkil li nekeʼxye li kristiʼaan.

WIIBʼ OXIBʼ NEKEʼXPATZʼ: «Junxil chik inkʼaʼ nawil aawu, chanru wankat?».