TZOLOM 31
Kʼaru li Xʼawabʼejilal li Yos?
Li esil li qʼaxal naxkʼe xwankil li Santil Hu aʼan li Xʼawabʼejilal li Yos. Li Jehobʼa troksi li Xʼawabʼejilal re naq ttzʼaqloq ru li kiraj choʼq re li Ruuchichʼochʼ chalen chaq saʼ xtiklajik. Kʼaru li Xʼawabʼejilal li Yos? Chanru naqanaw naq ak yook chi awabʼejink? Kʼaru ak kixbʼaanu? Ut kʼaru tixbʼaanu saʼ li kutan chalk re? Saʼ li tzolom aʼin ut saʼ li tzolom 32 ut 33 tqasume ebʼ li patzʼom aʼin.
1. Kʼaru li Xʼawabʼejilal li Yos ut ani li awabʼej?
Aʼan li kixkʼubʼ li Jehobʼa re naq t-awabʼejinq saʼ choxa ut li Jesukriist aʼan li awabʼej (Mateo 4:17; Juan 18:36). Li Santil Hu naxye naq li Xʼawabʼejilal li Jesús: «Inkʼaʼ taalajq taaʼosoʼq» (Lucas 1:32, 33). Xbʼaan naq aʼan li awabʼej saʼ Xʼawabʼejilal li Yos, aʼan tixjolomi li Ruuchichʼochʼ.
2. Ani nekeʼawabʼejink rochbʼen li Jesús?
Li Jesús moko yook ta chi awabʼejink xjunes. Wankebʼ xeʼchalk «saʼ xyanq chixjunilebʼ li xteepal ut xtenamit li ruuchichʼochʼ, yalaq chanru nekeʼilok ut nekeʼaatinak, [...] ut teʼawabʼejinq saʼ xbʼeen li ruuchichʼochʼ» (Apocalipsis 5:9, 10). Chalen naq li Jesús kiwank saʼ Ruuchichʼochʼ, chi miyon ebʼ li kristiʼaan xeʼpaabʼank re. Ma chixjunilebʼ teʼawabʼejinq rochbʼen? Inkʼaʼ. Kaʼajwiʼ 144,000 teʼawabʼejinq rochbʼen saʼ choxa (yaabʼasi Apocalipsis 14:1-4). Ebʼ li junchʼol chik aj paabʼanel teʼkanaaq arin saʼ Ruuchichʼochʼ rubʼel xwankil li Xʼawabʼejilal li Yos (Salmo 37:29).
3. Kʼaʼut naq li Xʼawabʼejilal li Yos qʼaxal chaabʼil chiruhebʼ li xʼawabʼejilal li winq?
Usta wankebʼ winq li nekeʼawabʼejink li nekeʼraj tenqʼank, maakʼaʼebʼ xwankil re xbʼaanunkil. Ut li naʼok choʼq reqaj maare qʼetqʼet ut inkʼaʼ naraj xtenqʼankilebʼ li kristiʼaan. Abʼan maaʼani t-oq choʼq reqaj li Jesús saʼ li Xʼawabʼejilal li Yos. Li Yos kixxaqabʼ «jun awabʼejihom li maajun wa taajukʼmanq» (Daniel 2:44). Li Jesús tixjolomi chixjunil li Ruuchichʼochʼ ut inkʼaʼ tsikʼoq u. Narahok, tuulan ut tiik xchʼool ut li teʼwanq rubʼel xwankil teʼxtzol rahok, tuulanaqebʼ ut tiikaqebʼ xchʼool (yaabʼasi Isaías 11:9).
QASIKʼAQ XCHAMAL LI NAʼLEBʼ
Qatzolaq kʼaʼut li Xʼawabʼejilal li Yos qʼaxal chaabʼil chiru li xʼawabʼejilal li winq.
4. Jun li awabʼejilal li qʼaxal wank xwankil tixjolomi li Ruuchichʼochʼ
Qʼaxal wank xwankil li Jesukriist chi awabʼejink chiru yalaq ani li awabʼej li ak xwank saʼ ruuchichʼochʼ. Cheeyaabʼasi Mateo 28:18 ut chexʼaatinaq chirix li patzʼom aʼin:
-
Kʼaʼut naq moko juntaqʼeeta li xwankil li Jesús chiru li xʼawabʼejilal li winq?
Li winq kaʼajwiʼ nekeʼawabʼejink saʼebʼ li xtenamit ut rajlal nekeʼjalaak. Ma joʼkan ajwiʼ tkʼulmanq rikʼin li Xʼawabʼejilal li Yos? Cheeyaabʼasi Daniel 7:14 ut chexʼaatinaq chirix ebʼ li patzʼom aʼin:
-
Kʼaru rusilal wank naq li Xʼawabʼejilal li Yos «maajoqʼe taasachmanq»?
-
Kʼaru rusilal wank naq tixʼawabʼeji chixjunil li Ruuchichʼochʼ?
5. Tento t-oq reqaj li xʼawabʼejilal li winq
Kʼaʼut naʼajmank naq li Xʼawabʼejilal li Yos t-oq choʼq reqaj li xʼawabʼejilal li winq? Cheerilaq li BʼIDEO ut chexʼaatinaq chirix li patzʼom aʼin:
-
Kʼaru ebʼ li chʼaʼajkilal nekeʼxkʼam chaq li winq naq nekeʼawabʼejink?
Cheeyaabʼasi Eclesiastés 8:9 ut chexʼaatinaq chirix li patzʼom aʼin:
-
Ma nakaakʼoxla naq li Xʼawabʼejilal li Yos tento t-oq choʼq reqaj li xʼawabʼejilal li winq? Kʼaʼut?
6. Li nekeʼawabʼejink saʼ li Xʼawabʼejilal li Yos nekeʼxtaw qu
Saʼ xkʼabʼaʼ naq li Jesús kiwank joʼ winq arin saʼ Ruuchichʼochʼ «naxnaw ruxtaanankil ut xtoqʼobʼankil qu» (Hebreos 4:15). Li Jehobʼa kixsikʼebʼ 144,000 chi winq ut ixq li teʼawabʼejinq rikʼin li Jesús. Elenaqebʼ chaq saʼ chixjunil «li xteepal ut xtenamit li ruuchichʼochʼ, yalaq chanru nekeʼilok ut nekeʼaatinak» (Apocalipsis 5:9).
-
Ma naxkʼojobʼ aachʼool xnawbʼal naq li Jesús ut li teʼawabʼejinq rochbʼen nekeʼxtaw qu? Kʼaʼut?
Li Jehobʼa kixsikʼ jalan jalanq li winq ut ixq re naq teʼawabʼejinq rochbʼen li Jesús.
7. Qʼaxal chaabʼil li xchaqʼrabʼ li Yos chiru li xchaqʼrabʼ li winq
Ebʼ li winq nekeʼxxaqabʼ li chaqʼrabʼ xbʼaan naq nekeʼraj xkolbʼalebʼ li rechtenamitul. Li Xʼawabʼejilal li Yos wank ajwiʼ li xchaqʼrabʼ ut tento teʼxpaabʼ li teʼwanq rubʼel xwankil. Cheeyaabʼasi 1 Corintios 6:9-11 ut chexʼaatinaq chirix ebʼ li patzʼom aʼin:
-
Kʼaru nakaakʼoxla, chanru wanq li ruuchichʼochʼ naq chixjunilebʼ teʼxpaabʼ li xchaqʼrabʼ li Yos? a
-
Ma xkʼulubʼ li Jehobʼa naq li teʼwanq rubʼel xwankil teʼxpaabʼ li xchaqʼrabʼ? Kʼaʼut nakaaye chi joʼkan?
-
Chanru naqanaw naq ebʼ li poyanam li inkʼaʼ nekeʼxpaabʼ li xchaqʼrabʼ li Yos naru nekeʼxjal li xnaʼlebʼebʼ? (Teeril li raqal 11).
Ebʼ li winq nekeʼxxaqabʼ li chaqʼrabʼ xbʼaan naq nekeʼraj xkolbʼalebʼ li rechtenamitul. Li chaqʼrabʼ li naxxaqabʼ li Xʼawabʼejilal li Yos naxtenqʼahebʼ li wankebʼ rubʼel xwankil.
WIIBʼ OXIBʼ NEKEʼXPATZʼ: «Kʼaru li Xʼawabʼejilal li Yos?».
-
Kʼa raj ru taasume?
LI AK XQATZOL
Li Xʼawabʼejilal li Yos wank saʼ choxa ut t-awabʼejinq saʼ xbʼeen chixjunil li Ruuchichʼochʼ.
Qajultikaq
-
Ani teʼawabʼejinq saʼ li Xʼawabʼejilal li Yos?
-
Kʼaʼut naq li Xʼawabʼejilal li Yos qʼaxal chaabʼil chiru li xʼawabʼejilal li winq?
-
Kʼaru naxpatzʼ li Jehobʼa rehebʼ li teʼwanq rubʼel li Xʼawabʼejilal?
SIKʼ XKOMON LI NAʼLEBʼ
Kʼe reetal bʼar kixye li Jesús naq twanq li Xʼawabʼejilal li Yos.
«Ma saʼ qachʼool wank li Xʼawabʼejilal li Yos?» (Li naʼlebʼ re jw.org)
Kʼaʼut naq ebʼ laj testiiw re li Jehobʼa nekeʼxkʼe chiʼubʼej li Xʼawabʼejilal li Yos chiru li xʼawabʼejilal li winq?
Xeʼokenk chi anchalebʼ xchʼool chirix li Xʼawabʼejilal li Yos (1:43)
Tzʼil li naxye li Santil Hu chirixebʼ li 144,000 li sikʼbʼilebʼ ru xbʼaan li Jehobʼa re naq teʼawabʼejinq rikʼin li Jesús.
Kʼe reetal chanru kichʼolaak chiru jun li ixq naq kaʼajwiʼ li Xʼawabʼejilal li Yos trisi li maaʼusilal.
«Xintzol chanru t-isiiq li maaʼusilal» (Ajsi aawu!, noviembre 2011)
a Saʼ li tasal 3 tooʼaatinaq chirixebʼ li naʼlebʼ aʼin.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
