Ak yook chi awabʼejink li Xʼawabʼejilal li Yos. Chi seebʼ tixchaabʼilobʼresi chixjunil li Ruuchichʼochʼ. Qilaq junjunq li osobʼtesihom li tixkʼam chaq ut li tatruuq roybʼeninkil chi anchal aachʼool.

1. Kʼaru tixbʼaanu li Xʼawabʼejilal li Yos re naq wanq li tuqtuukilal ut li tiikilal saʼ Ruuchichʼochʼ?

Naq li Jesús tyaloq saʼ li Armagedón tixsachebʼ li maaʼusebʼ xnaʼlebʼ ut ebʼ li awabʼej (Apocalipsis 16:14, 16). Ut aran ttzʼaqloq ru li naxye li Santil Hu: «Saʼ jun chʼina kʼamok maakʼaʼaqebʼ chik li inkʼaʼ usebʼ xnaʼlebʼ» (Salmo 37:10). Li Jesús troksi li awabʼejilal aʼin re xkʼambʼal chaq li tuqtuukilal ut li tiikilal saʼ Ruuchichʼochʼ (yaabʼasi Isaías 11:4).

2. Chanruhaq li qayuʼam naq ttzʼaqloq ru li naraj li Yos?

Rubʼel li Xʼawabʼejilal li Yos «li tiikebʼ xchʼool teʼreechani li chaabʼil naʼajej [“li Ruuchichʼochʼ”, TNM], ut aran teʼwanq junqʼe junqʼe kutan» (Salmo 37:29). Kʼoxla chanruhaq li qayuʼam naq chiqajunilo tqara li Jehobʼa, tqara qibʼ ut tiikaq chik ru li qachʼool. Maaʼani chik tyajerq ut toowanq chi junelik. Peʼyaal naq chʼinaʼus chixjunil aʼin?

3. Kʼaru tixbʼaanu li Xʼawabʼejilal li Yos naq ak kixsach li maaʼusebʼ xnaʼlebʼ?

Naq ak kixsachebʼ li maaʼusebʼ xnaʼlebʼ li Jesús t-awabʼejinq chiru 1,000 chihabʼ. Saʼ li hoonal aʼan li Jesús ut ebʼ li 144,000 teʼxtenqʼa ebʼ li kristiʼaan re naq tzʼaqalaq chik re ru xyuʼamebʼ. Saʼ xraqik li 1,000 chihabʼ ak chaabʼilaq chik li Ruuchichʼochʼ ut chixjunilebʼ li kristiʼaan sahaqebʼ saʼ xchʼool xbʼaan naq teʼabʼinq chiru li Jehobʼa. Tojaʼ naq li Jesús tixqʼaxtesi wiʼ chik li awabʼejilal re li Xyuwaʼ. Li xkʼabʼaʼ li Jehobʼa tsantobʼresiiq chi junajwa (Mateo 6:9, 10). Chi joʼkan tkʼutunq naq li Jehobʼa aʼan jun chaabʼil awabʼej ut naq naxra li xtenamit. Moqon li Jehobʼa tixsach laj Tza, ebʼ li maaʼus aj musiqʼej ut chixjunilebʼ li teʼxqʼet ribʼ chiru (Apocalipsis 20:7-10). Rubʼel li Xʼawabʼejilal li Yos junelik teʼwanq li osobʼtesihom aʼin.

 QASIKʼAQ XCHAMAL LI NAʼLEBʼ

4. Li Xʼawabʼejilal li Yos tixsach li xʼawabʼejilal li winq

«Wankebʼ winq kʼeebʼilebʼ xwankil chi xrahobʼtesinkil ebʼ li ras riitzʼin» (Eclesiastés 8:9). Li Jehobʼa troksi li Xʼawabʼejilal re risinkil chixjunil li rahilal li naxbʼaanu li winq.

Cheeyaabʼasi Daniel 2:44 ut 2 Tesalonicenses 1:6-8 ut chexʼaatinaq chirix ebʼ li patzʼom aʼin:

• Kʼaru tixbʼaanu li Jehobʼa ut li Jesús rikʼinebʼ li xʼawabʼejilal li winq ut li nekeʼokenk chirixebʼ?

• Kʼaʼut naq li ak xaatzol chirix li Jehobʼa ut li Jesús, nakatxtenqʼa re naq taakʼojobʼ aachʼool naq moko tsikʼoq ta u naq tixbʼaanu li naxyeechiʼi?

5. Maakʼaʼ chik junaq li awabʼej joʼ li Jesús

Naq li Jesús ak wanq chik joʼ awabʼej tixbʼaanu naabʼal li usilal choʼq rehebʼ li teʼwanq rubʼel xwankil. Cheerilaq li BʼIDEO re rilbʼal chanru naq li Jesús ak kixkʼutbʼesi naq naraj xtenqʼankilebʼ li kristiʼaan ut naq li Yos kixkʼe xwankil re naq truuq xbʼaanunkil.

Li kixbʼaanu naq kiwank saʼ Ruuchichʼochʼ yal jun eetalil chirix li tixbʼaanu saʼ li kutan chalk re. Bʼar wank rehebʼ li yeechiʼom aʼin twulaq raj chaawu rilbʼal? Cheeyaabʼasi chixjunil ebʼ li raqal li nekeʼaatinak chirix ebʼ li yeechiʼom aʼin.

6. Saʼ xkʼabʼaʼ li Xʼawabʼejilal li Yos chaabʼilaq chik li qayuʼam

LI AK XQATZOL

Li Xʼawabʼejilal li Yos tixbʼaanu li naraj. Li Ruuchichʼochʼ nujenaqaq chi kristiʼaan li chaabʼilebʼ xchʼool li teʼxloqʼoni ru li Jehobʼa chi junelik saʼ jun li chʼinaʼusil naʼajej.

Qajultikaq

• Kʼaru tixbʼaanu li Xʼawabʼejilal li Yos re xsantobʼresinkil li xkʼabʼaʼ li Jehobʼa?

• Kʼaʼut nakaapaabʼ naq li Xʼawabʼejilal li Yos tixbʼaanu chixjunil li naxyeechiʼi li Santil Hu?

• Bʼar wank li osobʼtesihom li tixkʼam chaq li Xʼawabʼejilal li Yos li qʼaxal taawaj rilbʼal?