TZOLOM 36

Junelik chaabʼilaq li qabʼaanuhom

XKʼEBʼAL CHI EKʼANK RIKʼIN

Chiqajunilo naqaj naq ebʼ li qamiiw chaabʼilaqebʼ xnaʼlebʼ ut li Jehobʼa naraj naq joʼkan ajwiʼ teʼnaʼlebʼaq ebʼ li ramiiw. Abʼan chʼaʼaj xbʼaanunkil aʼin xbʼaan naq ebʼ li kristiʼaan kʼaynaqebʼ chi tikʼtiʼik. Kʼaru rusilal naqataw naq inkʼaʼ nokoonaʼlebʼak joʼebʼ li junchʼol?

1. Kʼaʼut wank xwankil naq junelik tqaye li yaal?

Naq junelik naqaye li yaal rehebʼ li junchʼol naqakʼut naq naqoxloqʼi ut naqara li Jehobʼa. Misach saʼ qachʼool naq li Jehobʼa naxnaw chixjunil li naqakʼoxla ut naqabʼaanu (Hebreos 4:13). Nasahoʼk saʼ xchʼool li Jehobʼa naq junelik naqaye li yaal. Li Santil Hu naxye: «Li Qaawaʼ xikʼ narilebʼ li inkʼaʼ usebʼ xnaʼlebʼ, abʼan naxrahebʼ li tiikebʼ xchʼool» (Proverbios 3:32).

2. Bʼar wank li naʼlebʼ li tixkʼut naq chaabʼil li qanaʼlebʼ rajlal kutan?

Li Jehobʼa naraj naq tqaye «li yaal» chiqibʼil qibʼ (Zacarías 8:16, 17). Kʼaru naraj xyeebʼal aʼin? Naq inkʼaʼ naqatikʼtiʼ malaj naqabʼalaqʼi ebʼ li qajunkabʼal, li qechkʼanjel, li qechpaabʼanel ut ebʼ li nekeʼjolomink re li tenamit. Ebʼ li chaabʼilebʼ xnaʼlebʼ inkʼaʼ nekeʼelqʼak chi moko nekeʼbʼalaqʼik (yaabʼasi Proverbios 24:28 ut Efesios 4:28). Ut nekeʼxtoj chixjunil li nekeʼxye li awabʼej (Romanos 13:5-7). Chirix aʼin ut jalan chik li naʼlebʼ naqaj naq chaabʼilaq li qanaʼlebʼ «saʼ chixjunil li naqabʼaanu» (Hebreos 13:18).

3. Kʼaru rusilal tqataw wi junelik tqaye li yaal?

Ebʼ li qas qiitzʼin teʼxpaabʼ li tqaye wi nawbʼil naq junelik naqaye li yaal. Joʼkan ajwiʼ nokootenqʼank re naq saʼ li chʼuut toowanq saʼ junajil joʼ jun li junkabʼal. Ut sa naqekʼa qibʼ xbʼaan naq inkʼaʼ nokooxchʼiʼchʼiʼi li qachʼool ut li qakʼaʼuxl. Wi inkʼaʼ nokootikʼtiʼik naqakʼe «xloqʼal li xkʼutum li Yos laj Kolol qe» ut aʼin naru naxbʼaanu naq ebʼ li junchʼol ajwiʼ teʼraj xloqʼoninkil ru li Jehobʼa (Tito 2:10).

QASIKʼAQ XCHAMAL LI NAʼLEBʼ

Qilaq kʼaru naxkʼoxla li Jehobʼa naq chaabʼil nokoonaʼlebʼak ut chanru tqabʼaanu aʼin saʼ jalan jalanq li naʼlebʼ saʼ li qayuʼam.

4. Li Jehobʼa sa saʼ xchʼool rikʼinebʼ li inkʼaʼ nekeʼbʼalaqʼink

Cheeyaabʼasi Salmo 44:22 ut Malaquías 3:16 ut chexʼaatinaq chirix ebʼ li patzʼom aʼin:

Kʼaʼut nakaakʼoxla naq maakʼaʼ xyaalal naq taamuq li yaal?
Chan tawiʼ ru narekʼa ribʼ li Jehobʼa naq tqaye li yaal usta tchʼaʼajkoʼq chiqu?

Naq ebʼ li alal kʼajolbʼej inkʼaʼ nekeʼtikʼtiʼik nekeʼxsahobʼresi xchʼool li xnaʼ xyuwaʼ. Ut naqasahobʼresi ajwiʼ xchʼool li Jehobʼa naq naqaye li yaal.

5. Junelik tqaye li yaal

Wankebʼ li kristiʼaan nekeʼxye naq moko us ta nekeʼelk naq nekeʼxye li yaal. Abʼan naabʼal li rusilal tqataw wi junelik chaabʼilaq li qanaʼlebʼ. Cheerilaq li BʼIDEO.

BʼIDEO: Kʼaru tooxtenqʼa re naq sahaq saʼ qachʼool? Saqaq ru li qakʼaʼuxl ut li qachʼool (2:32)

Cheeyaabʼasi Hebreos 13:18 ut chexʼaatinaq chirix chanru teekʼutbʼesi xchaabʼilal leenaʼlebʼ rikʼin...

... leejunkabʼal.
... leerechtzolom malaj leerechkʼanjel.
... jalan chik li naʼlebʼ.

6. Tqataw rusilal wi junelik tqaye li yaal

Maare tqataw qachʼaʼajkilal saʼ li hoonal bʼarwiʼ tqaye li yaal abʼan moqon tqataw rusilal. Cheeyaabʼasi Salmo 34:13-17 ut chexʼaatinaq chirix li patzʼom aʼin:

Chanru tchaabʼiloʼq qayuʼam wi inkʼaʼ nokootikʼtiʼik?

Naq li sumsukebʼ inkʼaʼ nekeʼxtikʼtiʼi ribʼ nekeʼxkawubʼresi li xsumlajik.
Naq ebʼ laj kʼanjel inkʼaʼ nekeʼelqʼak li patron naxkʼojobʼ xchʼool rikʼinebʼ.
Naq ebʼ li kristiʼaan inkʼaʼ nekeʼtikʼtiʼik us nekeʼileʼk xbʼaan laj ilol tenamit.

WIIBʼ OXIBʼ NEKEʼXYE: «Moko maak ta xyeebʼal jun li chʼina tikʼtiʼ».