TZOLOM 37
Kʼaru li naʼlebʼ naxkʼe li Santil Hu chirix li kʼanjel ut li tumin
Ma wank sut qʼaxal naʼok aakʼaʼuxl chirix li kʼanjel ut li tumin? Wank sut nachʼaʼajkoʼk xsikʼbʼal li naʼajmank chiqu ut kʼanjelak chiru li Jehobʼa joʼ naraj aʼan. Saʼ li Santil Hu wank ebʼ li naʼlebʼ li naru nokooʼeʼxtenqʼa.
1. Kʼaru naxye li Santil Hu chirix li kʼanjel?
Li Jehobʼa naraj naq tqayal xsahil li qakʼanjel. Li Santil Hu naxye: «Li kʼaru us tqabʼaanu, aʼan [...] xyalbʼal xsahil li kʼaru tqakʼanjela» (Eclesiastés 2:24). Li Jehobʼa kaw ajwiʼ nakʼanjelak. Naq nokookʼanjelak chi kaw naqakʼam qe rikʼin, naqabʼaanu li nawulak chiru ut aʼin naxkʼe xsahil qachʼool.
Aajel ru kʼanjelak, abʼan miqakʼe chiʼubʼej li qakʼanjel chiru li xkʼanjel li Jehobʼa (Juan 6:27). Li Jehobʼa naxye naq wi naqakʼe li xkʼanjel chiʼubʼej saʼ li qayuʼam aʼan tooxtenqʼa rikʼin li naʼajmank chiqu.
2. Chanru tento tqil li tumin?
Li Santil Hu naxye naq li tumin «natenqʼank», abʼan naxye ajwiʼ naq moko naru ta naxkʼe xsahil qachʼool (Eclesiastés 7:12). Naxye ajwiʼ qe naq miqara li tumin ut naxkʼe qe li naʼlebʼ aʼin kʼojkʼooq qachʼool rikʼin li kʼaru wank qe (yaabʼasi Hebreos 13:5). Wi kʼojkʼo qachʼool rikʼin li kʼaru wank qe moko naqasikʼ ta chanru xtawbʼal xkomon qatumin. Joʼkan ajwiʼ inkʼaʼ naqachʼik qibʼ saʼ kʼas (Proverbios 22:7). Naqakol qibʼ chi xbʼulinkil rix li tumin ut inkʼaʼ naqasikʼ chanru xtawbʼal li bʼihomal.
3. Chanru naru nokootenqʼank rikʼin li qatumin?
Li Jehobʼa aʼan jun li Yos li nakʼehok ut wi tqakʼam qe rikʼin naru ajwiʼ nokookʼehok rikʼin li kʼaru wank qe (1 Timoteo 6:18). Jun li naʼlebʼ bʼarwiʼ naru naqoksi li qatumin aʼan tenqʼank saʼ li chʼuut ut xtenqʼankilebʼ li qech aj paabʼanel naq naʼajmank chiruhebʼ. Li Jehobʼa moko naxkʼe ta reetal joʼnimal naqakʼe naril bʼan kʼaʼut nokookʼehok. Naq nokookʼehok chi anchal qachʼool sa naqekʼa qibʼ ut naqasahobʼresi xchʼool li Jehobʼa (yaabʼasi Hechos 20:35).
QASIKʼAQ XCHAMAL LI NAʼLEBʼ
Qilaq kʼaru rusilal naqataw naq nokoonaʼlebʼak chiʼus chirix li kʼanjel ut naq sahaq saʼ qachʼool rikʼin li kʼaru wank qe.
4. Sahobʼresi xchʼool li Jehobʼa rikʼin laachaabʼil kʼanjel
Li qamiiwil rikʼin li Jehobʼa nokooxtenqʼa re naʼlebʼak chiʼus chirix li kʼanjel. Cheerilaq li BʼIDEO ut chexʼaatinaq chirix ebʼ li patzʼom aʼin:
-
Kʼaru xwulak chaawu chirix chanru kinaʼlebʼak laj Jason saʼ li xkʼanjel?
-
Kʼaru kixbʼaanu re naq inkʼaʼ tixkʼe chiʼubʼej li xkʼanjel saʼ li xyuʼam?
Cheeyaabʼasi Colosenses 3:23, 24 ut chexʼaatinaq chirix li patzʼom aʼin:
-
Kʼaʼut aajel ru naq chaabʼilaq li qanaʼlebʼ saʼ li qakʼanjel?
Aajel ru kʼanjelak abʼan miqakʼe chiʼubʼej li qakʼanjel chiru li xkʼanjel li Jehobʼa.
5. Wank rusilal wi sa qachʼool rikʼin li kʼaru wank qe
Naabʼalebʼ li kristiʼaan nekeʼxsikʼ chanru xtambʼresinkil li xbʼihomal abʼan li Santil Hu naxkʼe qe jun chaabʼil naʼlebʼ chirix aʼin. Cheeyaabʼasi 1 Timoteo 6:6-8 ut chexʼaatinaq chirix li patzʼom aʼin:
-
Kʼaru li chaabʼil naʼlebʼ naxkʼe qe li Santil Hu?
Naru naq sahaq saʼ qachʼool usta moko bʼihomo ta. Cheerilaq li BʼIDEO ut chexʼaatinaq chirix li patzʼom aʼin:
-
Kʼaʼut naq sahebʼ saʼ xchʼool li junkabʼal aʼin usta moko naabʼal ta xtuminebʼ?
Wi ak bʼihomo, abʼan toj naqaj xkomon li qatumin li Jesús kixkʼe jun chaabʼil eetalil chirix li chʼaʼajkilal li naxkʼam chaq aʼin. Cheeyaabʼasi Lucas 12:15-21 ut chexʼaatinaq chirix li patzʼom aʼin:
-
Kʼaru li naʼlebʼ nakaataw saʼ li jaljokil ru aatin li kixye li Jesús? (Teeril li raqal 15).
Cheeyaabʼasi Proverbios 10:22 ut cheejuntaqʼeeta rikʼin 1 Timoteo 6:10. Moqon chexʼaatinaq chirix ebʼ li patzʼom aʼin:
-
Kʼaru jwal wank xwankil, ma wank choʼq ramiiw li Jehobʼa malaj xsikʼbʼal xkomon aabʼihomal? Kʼaʼut?
-
Kʼaru ebʼ li chʼaʼajkilal naru nakaataw wi nakaakʼe aachʼool chi xsikʼbʼal xkomon aatumin?
6. Li Jehobʼa tixkʼe qe li naʼajmank chiqu
Naq naqataw chʼaʼajkilal saʼ li qakʼanjel ut namaakʼaʼo qatumin aʼin naru nokooxtenqʼa chi xkʼebʼal reetal ma yooko xkʼojobʼankil qachʼool rikʼin li Jehobʼa. Cheerilaq li BʼIDEO re xkʼebʼal reetal chanru tooruuq xqʼaxbʼal ru ebʼ li chʼaʼajkilal ut moqon chexʼaatinaq chirix ebʼ li patzʼom aʼin:
-
Kʼaru ebʼ li chʼaʼajkilal kixkʼul li hermaan?
-
Kʼaru kixbʼaanu re naq tixqʼax ru ebʼ li xchʼaʼajkilal?
Cheeyaabʼasi Mateo 6:25-34 ut chexʼaatinaq chirix li patzʼom aʼin:
-
Kʼaru naxyeechiʼi qe li Jehobʼa wi naqakʼe chiʼubʼej li xkʼanjel saʼ li qayuʼam?
WIIBʼ OXIBʼ NEKEʼXYE: «Tento tinkʼanjelaq re xwenteninkil li junkabʼal. Joʼkan naq inkʼaʼ naru tinxik saʼebʼ li chʼutam rajlal xamaan».
-
Kʼaru li raqal nakatxtenqʼa re xkʼoxlankil naq us xkʼebʼal li Jehobʼa chiʼubʼej saʼ laayuʼam?
LI AK XQATZOL
Aajel ru li kʼanjel ut li tumin, abʼan miqakanabʼ naq aʼin tooxnajtobʼresi rikʼin li Jehobʼa.
Qajultikaq
-
Kʼaru tooxtenqʼa re naq chaabʼil toonaʼlebʼaq chirix li kʼanjel?
-
Kʼaru rusilal taataw wi kʼojkʼo aachʼool rikʼin li kʼaru wank aawe?
-
Li Jehobʼa naxye naq tixtenqʼa ebʼ laj kʼanjel chiru, chanru nakaakʼutbʼesi naq nakaakʼojobʼ aachʼool rikʼin?
SIKʼ XKOMON LI NAʼLEBʼ
Kʼe reetal kʼaru naxye li Santil Hu chirix li tumin.
«Ma saʼ xkʼabʼaʼ li tumin wank ebʼ li chʼaʼajkilal?» (Li naʼlebʼ re jw.org)
Kʼe reetal chanru tqasahobʼresi xchʼool li Jehobʼa naq tookʼehoq.
«Kʼaru naxye li Santil Hu chirix li kʼehok?» (Li naʼlebʼ re jw.org)
Ma us xbʼuulinkil rix li tumin?
«Li naxye li Santil Hu: Li bʼuulink» (Ajsi aawu!, marzo 2015)
Kʼe reetal chanru li Santil Hu kixjal xyuʼam jun li winq li nawulak chiru bʼuulink tumin ut elqʼak.
«Ninbʼuulink tumin naq nekeʼaanilak li kawaay» (Laj Kʼaakʼalehom, 1 re noviembre 2011)
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
