TZOLOM 47
Ma ak kawresinbʼilat re naq tkubʼeeq aahaʼ?
Xbʼaan naq ak xaatzol li Santil Hu ak nakaanaw chik ru li Jehobʼa. Maare xaajal wiibʼ oxibʼ li naʼlebʼ saʼ laayuʼam re xyuʼaminkil li yookat xtzolbʼal. Abʼan maare wank junaq li naʼlebʼ li yook xrambʼal chaawu xqʼaxtesinkil laayuʼam chiru li Jehobʼa ut naq tkubʼeeq aahaʼ. Saʼ li tzolom aʼin tqatzʼil rix junjunq li chʼaʼajkilal li xeʼxqʼax ru wiibʼ oxibʼ li kristiʼaan re naq teʼkubʼeeq xhaʼ ut aʼin tatxtenqʼa ajwiʼ.
1. Ma aajel ru naq taanaw chixjunil li wank saʼ li Santil Hu re naq tkubʼeeq aahaʼ?
Re naq tkubʼeeq aahaʼ tento taataw «ru kʼaru li yaal» (1 Timoteo 2:4). Aʼin moko naraj ta xyeebʼal naq tento taanaw xsumenkil chixjunil li teʼxpatzʼ aawe chirix li Santil Hu. Chi moko ebʼ laj paabʼanel li junxil kubʼenaqebʼ xhaʼ nekeʼruuk xbʼaanunkil aʼin, aʼanebʼ ajwiʼ inkʼaʼ nekeʼxkanabʼ xtzolbʼal li Santil Hu (Colosenses 1:9, 10). Abʼan wank wiibʼ oxibʼ li naʼlebʼ li naxkʼut li Santil Hu li tento taataw ru xbʼeenwa. Ebʼ li cheekel winq tateʼxtenqʼa re xnawbʼal ma ak wank aanawom chirix li Santil Hu.
2. Kʼaru aajel ru xbʼaanunkil re naq tkubʼeeq aahaʼ?
Li Santil Hu naxye: «Yotʼomaq bʼiʼ eechʼool ut jalomaq eekʼaʼuxl» (yaabʼasi Hechos 3:19). Aʼin tento taabʼaanu naq toj maajiʼ nakubʼeek aahaʼ. Chanru tatruuq xbʼaanunkil? Yotʼ aachʼool chiru li Jehobʼa ut patzʼ re naq tixkuy aamaak. Joʼkan ajwiʼ tzʼeqtaana chixjunil li yibʼ aj naʼlebʼ ut kʼe aachʼool chi wank joʼ nawulak chiru li Jehobʼa. Joʼkan ajwiʼ naru nakattzʼaqonk saʼ li xkʼanjel li chʼuut joʼ li puktesink ut ebʼ li chʼutam.
3. Kʼaʼut naq inkʼaʼ taakanabʼ naq laaxiw tixram chaawu kʼanjelak chiru li Jehobʼa?
Wankebʼ nekeʼxuwak naq nekeʼok xkʼoxlankil naq inkʼaʼ teʼruuq xbʼaanunkil li xeʼxye re li Jehobʼa. Maakʼoxla naq inkʼaʼ tatpaltoʼq, li Santil Hu naxye naq wankebʼ laj kʼanjel chiru li Jehobʼa li keʼpaltoʼk ajwiʼ. Abʼan li Jehobʼa naxnaw naq ebʼ laj kʼanjel chiru moko tzʼaqal ta ru xyuʼamebʼ (yaabʼasi Salmo 103:13, 14). Nasahoʼk saʼ xchʼool li Jehobʼa naq nakaayal aaqʼe ut aʼan tatxtenqʼa. Joʼkan naq li Santil Hu naxye qe «maakʼaʼ naru taajachoq qe rikʼin li xrahom li Yos» (yaabʼasi Romanos 8:38, 39).
QASIKʼAQ XCHAMAL LI NAʼLEBʼ
Qilaq kʼaru ttenqʼanq aawe chi xqʼaxbʼal ru li chʼaʼajkilal li naru naramok chaawu xnawbʼal ru li Jehobʼa, xkubʼsinkil aahaʼ ut xkʼulubʼankil li xtenqʼ.
4. Kʼe aachʼool chi xnawbʼal ru chiʼus li Jehobʼa
Ma aajel ru naq taanaw ru chiʼus li Jehobʼa naq toj maajiʼ nakubʼeek aahaʼ? Aajel ru xbʼaan naq tento taara ut taabʼaanu li nawulak chiru. Cheerilaq li BʼIDEO re rilbʼal chanru saʼ chixjunil li Ruuchichʼochʼ xeʼruuk xbʼaanunkil aʼin ebʼ li nekeʼxtzol li Santil Hu. Ut moqon chexʼaatinaq chirix li patzʼom aʼin:
-
Kʼaru kitenqʼank rehebʼ li yookebʼ xtzolbʼal li Santil Hu re naq teʼkubʼeeq xhaʼ?
Cheeyaabʼasi Romanos 12:2 ut chexʼaatinaq chirix ebʼ li patzʼom aʼin:
-
Ma wank junaq li naʼlebʼ li naxye li Santil Hu li nachʼaʼajkoʼk chaawu xpaabʼankil? Ma nakaapaabʼ naq ebʼ laj testiiw re li Jehobʼa nekeʼxkʼut li yaal?
-
Wi joʼkan nakaakʼoxla, kʼaru tatruuq xbʼaanunkil?
5. Qʼax ru yalaq kʼaru li chʼaʼajkilal li naxram chaawu naq tkubʼeeq aahaʼ
Chiqajunilo naqakʼul li chʼaʼajkilal naq naqakʼoxla xqʼaxtesinkil li qayuʼam chiru li Jehobʼa ut xkubʼsinkil qahaʼ. Re rilbʼal jun eetalil chirix aʼin cheerilaq li BʼIDEO. Ut moqon chexʼaatinaq chirix ebʼ li patzʼom aʼin:
-
Kʼaru li chʼaʼajkilal kixnumsi li xNarangerel re kʼanjelak chiru li Jehobʼa?
-
Chanru li rahom li narekʼa chirix li Jehobʼa kitenqʼank re chi xqʼaxbʼal ru ebʼ li chʼaʼajkilal?
Cheeyaabʼasi Proverbios 29:25 ut 2 Timoteo 1:7 ut chexʼaatinaq chirix li patzʼom aʼin:
-
Bʼar nachalk xkawubʼ qachʼool re naq tooruuq xqʼaxbʼal ru ebʼ li chʼaʼajkilal?
6. Kʼojkʼooq aachʼool naq li Jehobʼa tatxtenqʼa
Li Jehobʼa tatxtenqʼa re naq taabʼaanu li naraj. Cheerilaq li BʼIDEO ut chexʼaatinaq chirix ebʼ li patzʼom aʼin:
-
Kʼaʼut naxuwak li winq aʼin chi xkubʼsinkil li xhaʼ?
-
Kʼaru kitenqʼank re chi xkʼojobʼankil xchʼool rikʼin li Jehobʼa?
Cheeyaabʼasi Isaías 41:10, 13 ut chexʼaatinaq chirix li patzʼom aʼin:
-
Kʼaʼut naq chʼolchʼooq chaawu naq tatruuq xbʼaanunkil chixjunil li taayeechiʼi re li Jehobʼa?
7. Bʼanyoxi chi anchal laachʼool li xrahom li Jehobʼa
Naq taakʼoxla li xrahom li Jehobʼa chaawix qʼaxal taabʼanyoxi ut t-alaaq saʼ laachʼool kʼanjelak chiru chi junelik. Cheeyaabʼasi Salmo 40:6 ut chexʼaatinaq chirix li patzʼom aʼin:
-
Bʼar wank rehebʼ li rosobʼtesihom li Jehobʼa li qʼaxal oxloqʼ chaawu?
Li propeet Jeremías naxra chaq li Jehobʼa ut oxloqʼ chiru li Raatin ut kʼanjelak chiru. Aʼan kixye: «Laawaatin, xinkʼulebʼ chi anchal linchʼool […]; aʼan tzʼaqal nakʼehok xsahil li waanm, xbʼaan naq sikʼbʼil wu aabʼaan, at Qaawaʼ, at Nimajwal Yos» (Jeremías 15:16). Anaqwan sume ebʼ li patzʼom aʼin:
-
Kʼaʼut wank joʼ aj testiiw re li Jehobʼa aʼan jun loqʼlaj maatan?
-
Ma taawaj naq tkubʼeeq aahaʼ re naq tatwanq joʼ aj Testiiw?
-
Ma wank kʼaru naramok chaawu?
-
Kʼaru tatruuq xbʼaanunkil re naq tkubʼeeq aahaʼ?
WIIBʼ OXIBʼ NEKEʼXYE: «Nachalk bʼayaq inxiw xbʼaan naq maare inkʼaʼ tinruuq xbʼaanunkil li tinyeechiʼi naq tkubʼeeq inhaʼ».
-
Ma joʼkan nakaakʼoxla laaʼat?
LI AK XQATZOL
Li Jehobʼa tatxtenqʼa re naq tatruuq xqʼaxbʼal ru li naramok chaawu naq tkubʼeeq aahaʼ.
Qajultikaq
-
Ma aajel ru naq wanq naabʼal aanawom chirix li Santil Hu re naq tkubʼeeq aahaʼ?
-
Kʼaru tento taabʼaanu naq toj maajiʼ nakubʼeek aahaʼ?
-
Kʼaʼut naq inkʼaʼ taakanabʼ naq laaxiw tixram chaawu naq tkubʼeeq aahaʼ?
SIKʼ XKOMON LI NAʼLEBʼ
Tzol kʼaru t-ekʼasinq aawe re naq tkubʼeeq aahaʼ.
«Ma ak kawresinbʼilat re xkubʼsinkil aahaʼ» (Laj Kʼaakʼalehom, marzo 2020)
Tzol chanru tatruuq xqʼaxbʼal ru ebʼ li chʼaʼajkilal li naramok chaawu naq tkubʼeeq aahaʼ.
«Kʼaru taaramoq chiwu xkubʼik inhaʼ?» (Laj Kʼaakʼalehom, marzo 2019)
Kʼe reetal chanru jun li winq kixqʼax ru ebʼ li chʼaʼajkilal re naq tkubʼeeq xhaʼ.
Laj Ataa inkʼaʼ naraj naq tkubʼeeq xhaʼ. Abʼan kʼe reetal kʼaru kitenqʼank re chi xbʼaanunkil.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
