TZOLOM 48

Sikʼ chiʼus ebʼ laawamiiw

XKʼEBʼAL CHI EKʼANK RIKʼIN

Ebʼ li tzʼaqal amiiw nekeʼxwotz qikʼin li xsahil qachʼool ut nokooʼeʼxtenqʼa chi xnumsinkil ebʼ li chʼaʼajkilal. Abʼan, weent taabʼaanu xbʼaan naq li Santil Hu naxye naq moko chixjunilebʼ ta naru nekeʼwank choʼq aawamiiw. Joʼkan bʼiʼ, chanru taanaw anihebʼ naru nekeʼwank choʼq aawamiiw? Tzʼil rix ebʼ li patzʼom aʼin.

1. Chanru nakateʼxchʼaʼajki malaj nakateʼxtenqʼa ebʼ laawamiiw?

Naq junelik naqochbʼeni junaq li kristiʼaan nokooʼok chi naʼlebʼak joʼ aʼan. Maakʼaʼ naxye ma wankebʼ chiqu malaj saʼ Internet. Joʼkan naq li Santil Hu naxye: «Li narochbʼeenihebʼ li chaabʼilebʼ xnaʼlebʼ, tixtaw xnaʼlebʼ; abʼan li nawank rikʼinebʼ li jip, [li inkʼaʼ naxra li Jehobʼa] taasachq chi junwaakaj» (Proverbios 13:20). Wi ebʼ li qamiiw nekeʼxra ut nekeʼxloqʼoni ru li Jehobʼa tooʼeʼxtenqʼa re naq toojiloq chixkʼatq ut re naq chaabʼil toonaʼlebʼaq saʼ li qayuʼam. Abʼan, wi ebʼ laawamiiw inkʼaʼ nekeʼxra li Jehobʼa tateʼxnajtobʼresi rikʼin. Joʼkan peʼ naq li Santil Hu naxye naq tqasikʼ chiʼus ebʼ li qamiiw. Chiqajunilo us nokooʼelk wi ebʼ li qamiiw nekeʼxra li Jehobʼa. Joʼkan naq naqayuʼami li naʼlebʼ aʼin: «Cheekʼe xkawubʼ eechʼool ut chetenqʼa eeribʼ chi ribʼil eeribʼ» (1 Tesalonicenses 5:11).

2. Kʼaru naxkʼoxla li Jehobʼa chirixebʼ laawamiiw?

Li Jehobʼa naxsikʼ chiʼus ebʼ li ramiiw. Joʼkan naq «naxrahebʼ li tiikebʼ xchʼool» (Proverbios 3:32). Chan tawiʼ ru trekʼa ribʼ li Jehobʼa wi naqochbʼenihebʼ li inkʼaʼ nekeʼrahok re? Trahoʼq xchʼool! (Yaabʼasi Santiago 4:4). Joʼkan naq tsahoʼq xchʼool li Jehobʼa wi inkʼaʼ naqochbʼenihebʼ li yibʼebʼ ru xnaʼlebʼ ut nokoojilok chixkʼatq ut chixkʼatqebʼ li nekeʼrahok re (Salmo 15:1-4).

QASIKʼAQ XCHAMAL LI NAʼLEBʼ

Qilaq kʼaʼut aajel ru naq taasikʼ chiʼus ebʼ laawamiiw ut chanru teʼxchaabʼilobʼresi laayuʼam.

3. Weent taabʼaanu rikʼinebʼ li inkʼaʼ usebʼ xnaʼlebʼ

Ebʼ li kristiʼaan li inkʼaʼ nekeʼxra li Jehobʼa ut inkʼaʼ nekeʼroxloqʼi li xchaqʼrabʼ moko chaabʼilebʼ ta joʼ amiiw. Cheerilaq li BʼIDEO ut chexʼaatinaq chirix li patzʼom aʼin:

BʼIDEO: Chanru tqatzʼeqtaana li inkʼaʼ usebʼ xnaʼlebʼ? (6:17)

Wi inkʼaʼ tqabʼaanu weent, chanru tooʼoq rochbʼeninkilebʼ li inkʼaʼ usebʼ xnaʼlebʼ?

Cheeyaabʼasi 1 Corintios 15:33, TNM, ut chexʼaatinaq chirix ebʼ li patzʼom aʼin:

Anihebʼ nakaakʼoxla naq inkʼaʼ us naq teʼwanq choʼq aawamiiw? Kʼaʼut?

Cheeyaabʼasi Salmo 119:63 ut chexʼaatinaq chirix li patzʼom aʼin:

Chanru taanaw ma chaabʼil naq twanq choʼq aawamiiw junaq li kristiʼaan?

Jun li mansaan li qʼeenaq naru tixbʼaanu naq tqʼaaq li xkomon, kʼaru taakʼul wi nakaajunaji aawibʼ rikʼinebʼ li inkʼaʼ usebʼ xnaʼlebʼ?

4. Usta jalan xwanjik junaq li kristiʼaan naru nawank choʼq qamiiw

Li Santil Hu naʼaatinak chirix wiibʼ li winq li keʼwank chaq saʼ li najter Israel, laj David ut laj Jonatán, usta jalan ru li xwanjikebʼ ut li xchihabʼebʼ keʼwank saʼ tzʼaqal amiiwil. Cheeyaabʼasi 1 Samuel 18:1 ut chexʼaatinaq chirix li patzʼom aʼin:

Kʼaʼut naqaye naq moko aajel ta ru naq juntaqʼeetaq li qachihabʼ ut li qawanjik rikʼinebʼ li qamiiw?

Cheeyaabʼasi Romanos 1:11, 12 ut chexʼaatinaq chirix li patzʼom aʼin:

Chanru nekeʼxtenqʼa ribʼebʼ li amiiw li nekeʼxra li Jehobʼa?

Kʼe reetal chanru jun li saaj kixtawebʼ li ramiiw. Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: Taatawebʼ laawamiiw bʼarwiʼ maajunwa nakaawoybʼeni (5:06)

Kʼaʼut keʼok xkʼaʼuxl li xnaʼ xyuwaʼ laj Akil naq keʼril ani narochbʼenihebʼ saʼ li tzolebʼaal?
Kʼaʼut kiʼok chi ramiiwinkilebʼ?
Kʼaru kixbʼaanu re naq inkʼaʼ chik trekʼa ribʼ naq wank xjunes?

5. Chanru tqatawebʼ li chaabʼil amiiw

Tzol chanru taatawebʼ li chaabʼil amiiw ut kʼaru taabʼaanu laaʼat re naq tatwanq joʼ chaabʼil amiiw. Cheerilaq li BʼIDEO.

BʼIDEO: Chanru xnaʼlebʼ li tzʼaqal amiiw? (4:14)

Cheeyaabʼasi Proverbios 18:24 ut 27:17 ut chexʼaatinaq chirix ebʼ li patzʼom aʼin:

Chanru nekeʼxtenqʼa ribʼebʼ li tzʼaqal amiiw?
Ma joʼkanebʼ laawamiiw? Wi inkʼaʼ, kʼaru tatruuq xbʼaanunkil?

Cheeyaabʼasi Filipenses 2:4 ut chexʼaatinaq chirix li patzʼom aʼin:

Re naq taataw li chaabʼil amiiw, tento naq chaabʼilaqat joʼ amiiw, chanru tatruuq xbʼaanunkil aʼin?

Re naq taataw li chaabʼil amiiw, tento naq chaabʼilaqat joʼ amiiw.

WIIBʼ OXIBʼ NEKEʼXYE: «Maakʼaʼ naxye anihebʼ laawamiiw li aajel ru aʼan naq sa tateʼril».

Kʼaru raj taaye?

LI AK XQATZOL

Naq naqasikʼ chiʼus ebʼ li qamiiw naqasahobʼresi xchʼool li Jehobʼa ut chaabʼil nokooʼelk saʼ li qayuʼam.

Qajultikaq

Kʼaʼut wank xwankil choʼq re li Jehobʼa ani naqasikʼebʼ choʼq qamiiw?
Anihebʼ inkʼaʼ teʼwanq choʼq qamiiw?
Chanru tatruuq xchaabʼilobʼresinkil laaʼamiiwil rikʼinebʼ li chaabʼilebʼ xnaʼlebʼ?

Li tzolom xraqmank saʼ li kutan:

Bʼaanu aʼin

Yal aaqʼe chi xnawbʼal ru chixjunilebʼ li hermaan li wankebʼ saʼ li chʼuut.

Malaj aʼin:

Malaj aʼin