TZOLOM 55
Tenqʼank saʼ laachʼuut
Chi miyon ebʼ li kristiʼaan nekeʼxloqʼoni ru li Jehobʼa chi sa saʼ xchʼoolebʼ saʼ naabʼal chi chʼuut. Oxloqʼ chiruhebʼ laj paabʼanel li naʼlebʼ li nekeʼxkʼul ut chi anchal xchʼool nekeʼtenqʼank saʼebʼ li xchʼuut. Ma joʼkan nakaawekʼa aawibʼ saʼ laachʼuut?
1. Chanru taawoksi laahoonal ut laametzʼew re tenqʼank saʼ laachʼuut?
Chiqajunilo naru nokootenqʼank saʼ li qachʼuut. Jun eetalil, ma wankebʼ hermaan cheekebʼ chik malaj yajebʼ saʼ laachʼuut? Ma naru nakaayeechiʼi aawibʼ re xkʼambʼalebʼ saʼ li chʼutam? Ma naru nakaatenqʼahebʼ chi xloqʼbʼal li kʼaru naʼajmank saʼ rochochebʼ, chi xsaabʼesinkil li rochochebʼ malaj jalan chik li kʼanjel? (Yaabʼasi Santiago 1:27). Naru nokootenqʼank ajwiʼ re xsaabʼesinkil ut xyiibʼankil li Chʼutlebʼaal Kabʼl. Maaʼani napuʼersink qe chi xbʼaanunkil li kʼanjel aʼin; naqayeechiʼi bʼan qibʼ xbʼaan naq naqara li Jehobʼa ut ebʼ li qechpaabʼanel (Salmo 110:3, Wy).
Wank jalan chik li naʼlebʼ bʼarwiʼ naru nekeʼtenqʼank ebʼ laj Testiiw li ak kubʼenaqebʼ chik xhaʼ. Ebʼ li hermaan winq li kawebʼ saʼ xpaabʼal naru nekeʼwank joʼ aj tenqʼanel saʼ li chʼuut ut moqon joʼ cheekel winq. Chiqajunilo naru naqakʼe xtzʼaqobʼ li qakʼanjel joʼ aj kʼamolbʼe saʼ li puktesink. Wankebʼ laj Testiiw li nekeʼtenqʼank re xkabʼlankil li ochoch re loqʼonink. Junchʼol chik nekeʼqʼaxonk re tenqʼank saʼ junaq li chʼuut bʼarwiʼ naʼajmank.
2. Chanru naru naqatenqʼa li chʼuut rikʼin li qatumin ut rikʼin li kʼaru wank qe?
Li Santil Hu naxye: «Chakʼe xloqʼal li Qaawaʼ rikʼinebʼ laasahil eechej» (Proverbios 3:9). Nasahoʼk qachʼool chi roksinkil li kʼaru wank qe saʼ li xkʼanjel li Yos (yaabʼasi 2 Corintios 9:7). Ut rikʼin li tumin li naqakʼe nokootenqʼank naq nawank junaq li rahilal. Wankebʼ kʼaynaqebʼ chi «xokbʼal bʼayaq li xtumin» re tenqʼank (yaabʼasi 1 Corintios 16:2). Naru ajwiʼ naqakʼe qatenqʼ tumin saʼebʼ li kaax li wank saʼebʼ li Chʼutlebʼaal Kabʼl malaj saʼ Internet saʼ donate.pr418.com. Li Jehobʼa naxkanabʼ naq tqoksi li kʼaru wank qe re xkʼutbʼesinkil naq naqara.
QASIKʼAQ XCHAMAL LI NAʼLEBʼ
Qatzʼilaq rix wiibʼ oxibʼ li naʼlebʼ bʼarwiʼ tatruuq tenqʼank saʼ li chʼuut.
3. Naru nakaawoksi li kʼaru wank aawe
Li Jehobʼa ut li Jesús nekeʼxra li nakʼehok chi anchal xchʼool. Li Jesús kiʼaatinak chiʼus chirix jun li malkaʼan li kixkʼe xtenqʼ saʼ rochoch li Jehobʼa usta nebʼaʼ. Cheeyaabʼasi Lucas 21:1-4 ut chexʼaatinaq chirix ebʼ li patzʼom aʼin:
-
Ma aajel ru naq naabʼalaq li tumin tqakʼe re naq sahaq saʼ xchʼool li Jehobʼa?
-
Kʼaru nekeʼrekʼa li Jehobʼa ut li Jesús naq nokookʼehok chi anchal qachʼool?
Re rilbʼal chanru naʼoksimank li tenqʼ tumin, cheerilaq li BʼIDEO. Moqon chexʼaatinaq chirix li patzʼom aʼin:
-
Kʼaru rusilal nekeʼxtaw ebʼ li chʼuut saʼ chixjunil li Ruuchichʼochʼ rikʼin li tenqʼ tumin li naqakʼe?
4. Yeechiʼi aawibʼ re tenqʼank
Ebʼ laj kʼanjel chiru li Yos li xeʼwank chaq junxil moko kaʼaj tawiʼ rikʼin tumin xeʼtenqʼank, xeʼkʼanjelak ajwiʼ chi anchalebʼ xchʼool saʼ rochoch li Yos. Cheeyaabʼasi 2 Crónicas 34:9-11 ut chexʼaatinaq chirix li patzʼom aʼin:
-
Kʼaru keʼxbʼaanu ebʼ laj Israel re rilbʼal chiʼus «li rochoch li Yos» malaj li naʼaj bʼarwiʼ nekeʼxloqʼoni ru?
Re rilbʼal chanru ebʼ laj Testiiw nekeʼxkʼam re rikʼin li eetalil aʼin, cheerilaq li BʼIDEO. Moqon chexʼaatinaq chirix ebʼ li patzʼom aʼin:
-
Kʼaʼut aajel ru naq saqaq ut chaabʼilaq ru li qachʼutlebʼaal kabʼl?
-
Chan raj ru tattenqʼanq laaʼat?
5. Ebʼ li hermaan winq naru nekeʼxyal xqʼe re xkʼebʼal xtzʼaqobʼ li xkʼanjel
Li Santil Hu naxye naq ebʼ li hermaan winq naru nekeʼxkawubʼresi li xpaabʼal re tenqʼank saʼ li chʼuut. Re rilbʼal junaq li eetalil, cheerilaq li BʼIDEO. Moqon chexʼaatinaq chirix li patzʼom aʼin:
-
Kʼaru kixbʼaanu laj Ryan re naq tkʼiiq saʼ li xpaabʼal ut ttenqʼanq saʼ li chʼuut?
Li Santil Hu naxye kʼaru teʼxbʼaanu ebʼ li hermaan li teʼraj wank choʼq aj tenqʼanel malaj cheekel winq saʼ li chʼuut. Cheeyaabʼasi 1 Timoteo 3:1-13 ut chexʼaatinaq chirix ebʼ li patzʼom aʼin:
WIIBʼ OXIBʼ NEKEʼXPATZʼ: «Bʼar nekeʼxtaw xtumin ebʼ laj testiiw re li Jehobʼa re xbʼeresinkil li xkʼanjelebʼ?».
-
Kʼaru raj taasume?
LI AK XQATZOL
Oxloqʼ chiru li Jehobʼa li qahoonal, li qametzʼew ut li kʼaru wank qe re tenqʼank saʼ li chʼuut.
Qajultikaq
-
Chanru tqoksi li qahoonal ut qametzʼew re tenqʼank saʼ li chʼuut?
-
Chanru tooruuq xtenqʼankil li qachʼuut rikʼin li kʼaru wank qe?
-
Chanru taawaj tenqʼank saʼ laachʼuut?
SIKʼ XKOMON LI NAʼLEBʼ
Tzol kʼaʼut li Yos inkʼaʼ chik naxpatzʼ rehebʼ laj kʼanjel chiru li xlatjetqil li kʼaʼaq re ru.
«Kʼaru naxye li Santil Hu chirix li xlatjetqil ebʼ li kʼaʼaq re ru?» (Li naʼlebʼ re jw.org)
Li Santil Hu naxkʼe xkʼanjelebʼ li winq li kub’enaqebʼ xhaʼ. Abʼan kʼaru tkʼulmanq wi junaq li hermaan ixq tixbʼaanu li kʼanjel aʼin?
«Li jolomink saʼ li chʼuut» (Laj Kʼaakʼalehom, febrero 2021)
Il kʼaru nekeʼxbʼaanu wiibʼ oxibʼ aj Testiiw re xjekʼinkil ebʼ li qahu rehebʼ li rech aj paabʼanel.
Kʼe reetal kʼaʼut naq moko juntaqʼeeta natawmank li xtuminal li qakʼanjel chiruhebʼ li junchʼol chi paabʼal.
«Bʼar nachalk xtuminal li xkʼanjelebʼ laj testiiw re li Jehobʼa?» (Li naʼlebʼ re jw.org)
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
